Luka 1:38-80

³⁸Maria chati “ubwene, ni muhikana wo mwanakazana wa Simwine.” Kuve vulyo kwangu kakuya che ñusa lyako. Mi iñiloi chilya musiya.

³⁹Linu Maria ava vuki mwa awo mazuba, mi cha hwelela kuya kwi nkanda ye ziwulu, kwi tolopo mwa Judeya.

⁴⁰Ava yendi mwi nzuvo ya Zakariya mi chaka lumelisa Elizabeta.

⁴¹Cwale kuva pangahali kuti Elizabeta ha zuwa mulumelisezo wa Maria, mbumbu mwi vumo lyakwe ava shili, mi Elizabeta ave zulwa Luhuho lu Jolola.

⁴²Cha koza inzwi lyakwe ni kuwamba kaku huwa “Iwe njo fwiyoletwe mukati kavanakazi, mi ni muselo we vumo lyako ufuyoletwe.”

⁴³Mi chinzi hayi va pangahali kwangu kuti vanyina va Simwine wangu va swanela kwiza kwangu?

⁴⁴Mu vwene, mulumo we ntumeliso zako ha ziza ku matwi angu, mbumbu yo wina mwi vumo lyangu ava shili nche intabo.

⁴⁵Mi uzo u fwiyoletwe yaba zumini kuti ka kuve ni kwizuzilizwa kwezo zintu ziva wambwa kwali ku zwilila kwa Simwine.

⁴⁶Maria cha wamba, “Luhuho lwangu lu temba Simwine”,

⁴⁷mi luhuho lwangu lusanga mwe Ireza mutusi wangu.

⁴⁸Chaba loli ha mazimo avolele hansi a muhikana wakwe wo mwanakazana. Cwale mu vone, ku zwila hahanu onse masika ka a nisumpe kuti ni fwiyoletwe.

⁴⁹Kakuli iye yo wina ziho chavani pangili zintu zikando mi izina lyakwe li jolola.

⁵⁰Chishemo chakwe chikalilile ku mahasi ni mahasi kwabo vamu tiya.

⁵¹Chava tondezi ziho zakwe kache yanza: chaba hasani avo vavali kulikumuseza mihupulo ye nkulo zavo.

⁵²Chava soheli hansi vaana vavene simwine vechi kwame ha vuyendisi vwavo. mi chava nyamuni avo ba mazimo mavi.

⁵³Chave zuzi avo va fwile inzala ni zintu zilotu, kono va humite avava tumini kule niva sena chintu.

⁵⁴Chava hi intuso kwa Isiraele muhikana wakwe, kupangila ku hupula ku tondeza chishemo

⁵⁵(mwava teli ku veshetu) kwa Aburahama niba mwi chilila kuya uko kusena mamanimani.

⁵⁶Maria ave kali ni Elizabeta ka miezi yo tatwe mi cha volela kwi nzuvo yakwe.

⁵⁷Hanu inako chi iva sikite ya Elizabeta kuti ahwizumuke muchiche mi ava pepi mwanaswisu.

⁵⁸Va vambene naye niva kwakwe vava zuwi kuti Simwine ava mutondenzi chishemo chakwe chikando kwali mi vava sangi naye.

⁵⁹Hanu kuvezi kupangahala he zuva li hinda iyanza ni to tatwe vava kezi njeva muchite mupato muchiche. Ni vava musumpi “Zakariya,” ku zwila izina li vesi.

⁶⁰Kono va nyina chive tava ni kuwamba “Ne, mwa sumpwe Johani.”

⁶¹Chiva wamba kwali, “kakwina yenke mukati kava mwenu yo sumpwa keli zina.”

⁶²Vava pangi zi supo kuvesi kupangila kuti vesi ve zive muvavali kusakila kuti a hewe izina.

⁶³Vesi chiba kumbila chiñolelo mi chiva ñola, “izina lyakwe nji Johani”. Vonse vava komokwa.

⁶⁴Haho vulyo kaholo kakwe kave yalulwa mi lulimi lwake luva lukululwa. Ava wambi niku lumba Ireza.

⁶⁵Lyowa livezi havo vavali kwi kala muma bali avo. Zonse izi zintu ziva twala monse mwi inkanda za ziwulu za Judeya.

⁶⁶Mi vonse vava vazuwi vava ziviki mwi nkulo zavo, kuwamba, “cwale uzu muhwile mwave chi?” Kakuli iyanza lya Simwine livena naye.

⁶⁷Vesi Zakariya ave zwile ni Luhuho lu Jolola mi cha polofita, kuwamba,

⁶⁸“Simwine a lumbwe, Ireza wa Isiraele, kakuli avezi kwiza ku tusa mi ava kwanisi kuvozekezwa kwa bantu bakwe”

⁶⁹Chava tuzimikili luziya lwo kuhaza mwi nzuvo yo muhikana wakwe Davida,

⁷⁰hava wambi cha kaholo zama polofita va jolola bakwe va vena mwi nako ya kale kale.

⁷¹Mwa lete vu hazo vuzwilila ku zila zetu mi ni ku mayanza avo batu toyete.

⁷²Mwa pange vovuti ku totendeza chishemo chakwe ku veshetu mi ni ku hupula ku jolola kwe ntumelelano yakwe,

⁷³ku lisumina kwava wambi kwa Aburahama ishe etu.

⁷⁴Ava sepisi kutuha kakuli tuba zwiswa muma yanza e zila zetu, katu mutendele niku sena lyowa,

⁷⁵muku jolola ni muku shiama ha vusu bwake onse mazuva etu.

⁷⁶Eni, nawe, mwana, mo sumpwe mupolofita wa Isiwulu, kakuti moye ha vusu bwe chifateho cha Simwine kuli tukisa inzila zakwe, ku lukisa bantu cha kukeza kwakwe,

⁷⁷kwiza kuha inzivo yo kuhazwa ku vantu vakwe kaku swalelwa kwa zivi zavo.

⁷⁸Ichi kachi pangahale bakeñisa chishemo cha Ireza wetu, bakeñisa ke zuva lizwa kule lyese lize kuku tutusa.

⁷⁹Ku venya havo ve kele mwi fifi navo vena mu munzunde we fu. Mwa pange vovuti kutondeza matende etu mwi nzila ye nkozo.

⁸⁰Hanu mwana ava kuli niku kola mu luhuho, mi avena mumu zuka heisi izuva hali vonekisa kwa Isiraele.