Luka 1:38-80

³⁸Tegani i Marija phenđa: “Ače, sluškinja e Gospodesiri injum. Nek ovel maje palo klo lafi.” I o anđeo dželo olatar.

³⁹Adala dive i Marija spreminđa pe hem siđarđa ko bregalo krajo e judejakoro.

⁴⁰Ked resli adari, đerdinđa ko čher e Zaharijasoro hem pozdravinđa e Jelisaveta.

⁴¹I ked i Jelisaveta šunđa e Marijakoro pozdrav, o čhavoro oti radost zorale mrdinđa olaće ano vođi, a oj pherdili e Svetone Duhoja.

⁴²I bare glasoja phenđa e Marijaće: “Najblagoslovime injan maškaro đuvlja hem blagoslovime o čhavoro kole akhareja ano vođi!

⁴³Akavai bari čast maje so tu, mle Gospodesiri daj, aljan kora mande.

⁴⁴Adalese so ked šunđum to pozdrav, o čhavoro oti radost zorale mrdinđa maje ano vođi.

⁴⁵Blago tuće so verujinđan da ka ovel adava so phenđa će o Gospod!”

⁴⁶Tegani i Marija phenđa: “Barjari mlo vilo e Gospode;

⁴⁷Radosnoi mlo duho ano Devel, ano mlo Spasitelj

⁴⁸so ulo milostivno upri pli na edobor bari sluškinja. I ače, od akana sa o generacije ka phenen da injum blagoslovime đuvli

⁴⁹adalese so but šukaripe ćerđa maje o Zoralo Devel kasoro anavi sveto!

⁵⁰Ovi milostivno e manušenđe oto sa generacije kola darana olestar.

⁵¹Ple zorale vasteja ćerđa bare stvarija; frdinđa pestar e manušen kolai barikane ano pumare vile.

⁵²Peravđa e vladaren taro lengoro tron a vazdinđa e poniznonen.

⁵³Čaljarđa e bokhalen šukaripnaja a čučen muklja e barvalen.

⁵⁴Pomožinđa e Izraelconenđe, ple slugenđe. Na bisterđa te ovel milostivno

⁵⁵e Avraamese hem lesere potomkose sar so dinđa plo lafi amare pradadenđe.”

⁵⁶I Marija ačhili e Jelisavetaja đi ko trin masek, i tegani irinđa pe čhere.

⁵⁷A e Jelisavetaće alo o dive te bijani, i bijanđa murše.

⁵⁸Ked lakoro jeri hem lakere komšije šunde so o Devel ćerđa laće baro šukaripe, radujinde pe olaja.

⁵⁹A ked e čhavore inele ofto dive, koro Zaharija čedinde pe o manuša zako obreziba e čhavoresoro. I mangle te den le lesere dadesoro anav–Zaharija,

⁶⁰ali i Jelisaveta phenđa: “Na! Lesoro anav ka ovel Jovan!”

⁶¹A on phende laće: “Niko te jerjestar na vičini pe ađahar.”

⁶²I vastencar pučle e Zaharija savo anav mangela te del ple čhavore.

⁶³Tegani o Zaharija rodinđa te den le nesavo kotor ko savo pisinđa: “Lesoro anavi Jovan.” I sare čudinde pe.

⁶⁴I otojekhvar o Zaharija šaj ine palem te vaćeri, i lelja te slavini e Devle.

⁶⁵I uklinđa i dar sa lengere komšijen. Ko sa o bregalo krajo e Judejakoro vaćerđa pe adalestar so ulo.

⁶⁶I sare kola šunde adava, razmislinde adalestar hem phende: “Akava čhavoro isi te ovel baro manuš. Čačei upro leste o vas e Gospodesoro.”

⁶⁷A o Zaharija, e Jovanesoro dad, pherdilo e Svetone Duhoja hem prorokujinđa:

⁶⁸“Slava e Gospodese e Izraelesere Devlese adalese so alo hem otkupinđa ple narodo!

⁶⁹Vazdinđa amenđe zorale Spasitelje oto pleme e carosoro e Davidesoro, ple slugasoro

⁷⁰sar so vaćerđa pana angleder kroz o muja ple svetone prorokonengere.

⁷¹Vazdinđa amenđe zorale Spasitelje te spasini amen amare dušmanjendar hem sa e manušengere vastendar kola mrzinena amen.

⁷²Mothovđa milost amare pradadenđe hem ispuninđa plo sveto savez

⁷³sovli savi xalja e Avraamese amare pradadese:

⁷⁴so ka ikali amen amare dušmanjengere vastendar te šaj kanda le bizi dar

⁷⁵ano svetost hem ano pravednost anglo leste sa đikote injam dživde.

⁷⁶A tu Jovane, mlo čhavo, ka ove pendžardo sar proroko e Najbare Devlesoro adalese so ka dža anglo Gospod te phrave lese o droma.

⁷⁷Ka sikave lesere narodo sar te pendžaren o spasenje kroz oprostiba lengere greja

⁷⁸palo amare Devlesoro milosrdno vilo o svetlost odupral ka avel kora amende sar ikljojba e khamesoro

⁷⁹te svetlini okolenđe so bešena ani tomina hem ani senka e meribnasiri te legari amen ko drom oto mir.”

⁸⁰A o čhavoro o Jovan barjola ine hem zoraljola ano duho. Ked barilo, živinđa ani pustinja sa đikote na iklilo anglo Izraelci te propovedini.