Luka 12:3-52

³Zato, sa so phendine ande tama ašundola po svetlo thaj sa so phendine varekašće po kan ande sobe katar e krovurja propovedilape.”

⁴O Isus nastavisardas: “Phenav tumenđe mungre drugarenđe: na daran katar okola save šaj te mudaren samo o telo, a pale godova naštik ćeren tumenđe khanči.

⁵Ali phenava tumenđe kastar trubun te daran: daran katar o Del savo, šaj lel o trajo thaj askal čhudel les ando pakao. Lestar daran!

⁶Pa či li bićinenpe pandž čiriklja pale samo duj lovora? Pa palem ni jećhe lendar o Del či bistrel.

⁷A tumenđe si svako bal po šoro đinado. Zato na daran! Kaj sen e Devlešće maj vredne nego but e čiriklja!”

⁸Ko akate pe phuv anglo them priznajil kaj pripadil manđe, pale leste me o Čhavo e Manušesko phenava, angle anđelja e Devlešće kaj pripadil manđe.

⁹Ali okova savo odreknilpe mandar angle manuša akate pe phuv, gajda vi me odreknivaman lestar angle anđelurja e Devlešće.

¹⁰Ali phenav tumenđe ko god mothol alav protiv mande o Čhavo e Manušesko, jartolape lešće. Ali okolešće ko vređol (hulil) po Sveto Duho, či jartolape lešće.

¹¹A kana anena tumen po sudo thaj ande sinagoge, angle poglavarja thaj angle vlast, na vodin briga so phenena te branin tumen!

¹²Kaj o Sveto Duho ande godova časo sikavela tumen so te phenen.”

¹³Vareko maškar o them phendas lešće: “Sikavneja, phen mungre phralešće te podelil manca so muklas amenđe amaro dad.”

¹⁴Pe godova o Isus phendas lešće: “Manuša, ko čhuta man te avav tumaro sudco ili deliv maškar tumende?

¹⁵Askal phendas savorenđe: “Lentumen majdur katar svako pohlepa, kaj o čačo trajo či avel katar okova so situmen.”

¹⁶Askal o Isus phendas lenđe akaja prispodoba: “Varesave barvale manušesće but bijanda e phuv

¹⁷thaj ačhilo te gndil ande peste: “So te ćerav? Kaj najman kaj te čhav sa akava so bijanda manđe e phuv.”

¹⁸Thaj phendas: “Ake so ćerava! Haravava mungre žitnice thaj vazdava majbare thaj okote čhava sa mungro điv thaj mungro lačhipe.

¹⁹Askal phenava korkoro manđe ake situ ande zalihe but lačhipe pale but e brš kaj aven. Dušo mungrije, akana odmoritu, ha, pi thaj veselitu!”

²⁰Ali o Del phendas lešće: “Bigođavereja! Već arjat mereja! A sa so ćidan, kasko avela?

²¹Gajda avela okojeja kaj ćidel pešće barvalipe, a či ćidel barvalipe savo si vredno ande Devlešće jakha.”

²²Askal o Isus phendas pire učenikonenđe: “Zato phenav tumenđe: na han holji palo trajo: so hana; ni palo telo so dena pe tumende.

²³Kaj o trajo si maj vredno katar o habe, a o telo katar e drze.

²⁴Dićhen pe gavranurja! Či sadin niti ćiden, najlen spremište ni žitnice, a palem o Del pravarelen. Kozom sen tumen majvredne nego e čiriklja!

²⁵A ko tumendar šaj e brigenca te lunđarel piro trajo samo pale jek đes?

²⁶Dakle, ako tumen naštik ćeren ni okova so si maj cara, sostar askal stalno han holji pale sa aver?

²⁷Dićhen e poljske luluđa sar barjon! Niti trudinpe, niti štrikon pešće drze. A palem, phenav tumenđe: “Kaj ni o caro Solomon ande pire kuč e drze nas majl lčhardo katar ni jek lendar.

²⁸Ako o Del del pe poljsko čar gajda šukar drze, savi ađes si, a već thejara čhudelpes ando bov te phabol, kozom majbut dela pe tumen šukar drze. Tumen cara paćivalen!

²⁹Zato vi tumen: na samo gndisaren pe godova dali situmen dosta te han thaj te pijen. Na uznemirin tumen zbog godova!

³⁰Sa godova roden e manuša save či pindžaren e Devles. Tumaro nebesko Dad džanel kaj sa godova trubul tumen.

³¹Nego roden o carstvo e Devlesko, a godova sa nadodajla pe tumenđe!”

³²Na dara mungro cikno stado! Kaj si e volja tumare Dadešći te del tumen o carstvo.

³³Bićinen okova so si tumen thaj e love den e čorenđe! Gajda ćidena tumenđe trjaste save či phurjon thaj blago savo či propadnila, večno blago savo si ando nebo kaj o čor či avel thaj kaj o moljco či halales.

³⁴Kaj phenav tumenđe, kaj si tumaro barvalipe, okote avela vi tumaro ilo.”

³⁵O Isus phendas lenđe vi akava: “Aven spremne te služin thaj tumare svetiljke neka phabon.

³⁶Aven sago okola kaj ažućaren pire gospodare kana boldelpes andar e svaturja te odma putren lešće čim aresel thaj marel po vudar,

³⁷Blago o kole slugonenđe saven o gospodari, kana avela, araćhel džungade! Čačes phenav tumenđe, kaj korkoro o gospodari čholalen pale sinija te bešen, thaj čhola pe peste o kecelko, te poslužil len.

³⁸O gospodari šaj te boldel pes ande opaš e rjat ili ande zora a blago e slugenđe saven o gospodari araćhela kaj si još džungate thaj ažućaren les.

³⁹Ali akava džanen: kana džanglasas o domaćino ande savi vrjama avela o čor, či muklasas te del ande lesko ćher.

⁴⁰Vi tumen uvek aven spremne kaj me o Čhavo e Manušesko avava kana či nadina tumen.”

⁴¹Pe godova o Petar phendas: “Gospode, phenes li godoja usporedba samo pale amende ili vi pale savorende?”

⁴²A o Gospod Isus phendas: “Ko si okova verno thaj razumno upravniko saves o Gospod čhola te vladil pe leše sluge thaj te delen habe ande pravo vrjama?

⁴³Blago okole slugašće saves o gospodari kana boldelape, araćhel kaj gajda ćerel.

⁴⁴Čačes, phenav tumenđe, o gospodari čhola godole slugone te upravljil lešće saste barvalipeja.”

⁴⁵Ali ako godova sluga phenel ande piro ilo: “Mungro gospodari či avela gajda sigo” thaj ačhel te marel e slugonen thaj e sluškinjen, te hal, te pijel thaj te matol,

⁴⁶avela o gospodari godole slugasko ando đes savo či nadilapes thaj ando časo savi či ni slutil; strogo kaznilales gajda kaj čhinela les pe kotora te delil e sudbina okolenca save či paćan.”

⁴⁷O sluga savo pindžarel e volja pire gospodarišći, a khanči či ćerdas te pripremil pes pale vrjama kana boldela pes lesko gospodari, avela strogo kaznime.

⁴⁸A okova sluga kaj či džanglas e gospodarešće volja, a ćerda vareso kaj zaslužisarel e kazna, cara avela mardo. A katar okola kašće but dijas lendar majbut vi rodela. Okolestar kasće si but poverime lestar but vi rodela pes.”

⁴⁹“Askal o Isus phendas: “Me avilem te čhudav e jak e sudošći pe phuv! Sar volisardemas te već počnisardas te phabol!

⁵⁰Ali majsigo trubul te pretrpiv e muke thaj o smrto, zurales si manđe pharo dok godova či avel gata!

⁵¹Gndisaren kaj me avilem te anav miro pe phuv maškar o them? Nisar. Avilem te anav razdor.

⁵²Kaj katar akana e familije rspin pes: trin džene avena pe mungri rig, a aver duj protiv ili duj pe mungri rig a trin protiv mande.