Luka 12:18-59

¹⁸Ebu ani raenaꞌa, 'E ꞌadigine manoḡa! Ogomu tiꞌeteꞌe neḡa ibiꞌaꞌe fahadu boro iziga ogoratihi ebu ogomuhe zu tohehe niduꞌa eꞌea zouniꞌuma.'

¹⁹Ebu ani ane bare raenaꞌa, ꞌE muri faḡa radiu onamite veize ogomu boro hune ruhibe teha. Eꞌanoꞌo eꞌe ogauꞌenaꞌa zu gageꞌenaꞌa matuꞌe onamiꞌuma!'

²⁰Rehano Badiꞌaꞌa niro, raenaꞌa, 'Ḡaꞌe mene huhuzaḡa! Eḡeꞌa izidi ohere ḡae ḡabone mae vaginine, ḡaꞌa ruhibateꞌe toheꞌe iniuꞌa meꞌuma?'”

²¹Iesuꞌa ḡoere ḡonagano reiro, raenaꞌa, “Deꞌeguḡa vazeḡaꞌe ane tohe daꞌo ruhibeꞌohe, rehano Badiꞌa moneo aniꞌe mene maꞌora vazeḡa raꞌohe.”

²²Ebu Iesuꞌa ane tahiꞌatahiꞌa ziro, raenaꞌa, “Eꞌanoꞌo e ziꞌohe. Zae ḡabone veize nagi ogomu aꞌuma ga ahirize veize nagi dabua vidiꞌuma rae ago zamare adudanoꞌi!

²³Mazaḡa ḡabone zu ahiriꞌ e ogomu zu dabua vitinoga.

²⁴Nugo gaoza zamaroꞌi! Ze ezone mene ḡorauꞌohe zu mene hiriveꞌohe. Ogomuze nuꞌoneꞌeteꞌe habaꞌa zu oꞌoꞌa, rehano Badiꞌaꞌa ḡubuzeꞌohe. Zaꞌe nini vitize huneꞌohe!

²⁵Zae boꞌaḡano iniuꞌe zamare adudaune, ḡaboneꞌa tahiḡa zuni faraꞌumahe? Mene!

²⁶Ḡau komeꞌa eꞌe haḡaoga zu mene idaḡa reine, za nougadu ḡau ꞌahoga veize zamare aduduꞌohe?

²⁷Butu kakaḡaꞌe nougenouge ḡuhureꞌeteꞌe ḡianoꞌi! Ze mene gaueꞌohe ga dabuaze mene turineꞌohe. Rehano e ziꞌohe, butu kakaḡa ꞌahogaꞌe maꞌora vazeḡa kini Solomonaꞌa haḡairoteꞌe dabuaḡa manomano vitinoga.

²⁸Ebu butu veḡaꞌe izidi ḡaboga, hena ohoḡoreꞌe vazeꞌa masinadu ireo hufi hauniꞌuma, rehano Badiꞌaꞌa faifaine manohuniꞌohe. Zaꞌe ve vitinoga, eꞌanoꞌo Badiꞌaꞌa hubehune dabua vidauziniꞌuma. Rehano zaꞌe Badiꞌa mazao mene borofe fieꞌohe!

²⁹Nagini aꞌuma zu gagiꞌuma rae ago zamare adudanoꞌi!

³⁰Mazaḡa Badiꞌa aḡuꞌa azaḡaꞌa ꞌahiguḡa niduꞌa vaḡeꞌohe, rehano Mozeꞌe zaꞌa eꞌe ḡauḡa urateꞌetaꞌe edeḡa.

³¹ꞌOugine Badiꞌaꞌa ibitoziniꞌeteꞌe vaḡoꞌi, ebu eꞌe ḡauga niduꞌa zuni ziniꞌuma!

³²Eꞌanoꞌo zaꞌe, mamoe komeꞌa komeꞌa heuḡa, ago rihanoꞌi, mazaḡa aneꞌa ibitohauꞌeteꞌe habaꞌa zinifine, Moze ani matuꞌe rudauꞌohe.

³³Ebu toheze seronadu moniḡaꞌe zahara azaḡa zenoꞌi! ꞌOugine mene zigaꞌuma tunahuḡano toheze nuꞌoneꞌeteꞌe teige, toheze adureo nuꞌoniꞌuma. Eꞌea tine, mene hauḡiꞌuma ebu deꞌeaꞌe ḡonore zu zuhiꞌa mene sausauniꞌuma.

³⁴Mazaḡa zaꞌa toheze nouma tine, zamaroneze zu deꞌea tiꞌuma.”

³⁵Iesuꞌa ziro, raenaꞌa, “Zaꞌe, tuḡure azaḡa teige, gau dabuaḡa haḡae ruhibe radoꞌi, ebu ihureze zu agane modoꞌi!

³⁶Ebu zuhiꞌaze hahu muiḡanonoꞌo ne uꞌa bare feuradu ibihetao toketokerine ibiheta ḡarihe vavaꞌeꞌeteꞌe teige, Zuhiꞌa Boroꞌa onaiteꞌe veize ruhiboꞌi!

³⁷Zuhiꞌazeꞌa bare onaadu tuḡure azaḡaꞌe ani guhine radiuꞌenaꞌa ruhibeꞌeteꞌe horozine, ani matuꞌo zenadu manohuga ziniꞌuma. E hube hune ziꞌohe, zuhiꞌazeꞌa gau dabuaḡa vidanadu ogauꞌeteꞌe fataḡano ohozadu ogomu ziniꞌuma.

³⁸Ebu zuhiꞌazeꞌa ohere ga uzeuze feuradu tuḡure azaḡaniꞌa ani guhine radiuꞌeteꞌe horozine, matuꞌo zenadu manohuga ziniꞌuma.

³⁹Zaꞌe ꞌadi zamaroꞌi! Vaze ꞌahoganiꞌa ḡonore vazeḡaꞌe noꞌe madaḡano ani ne onaiꞌuma rae ederine, ḡonore vazeḡaꞌe diuḡoga mene idarafine, aniꞌe neḡa faine taufiꞌuma.

⁴⁰Eꞌanoꞌo zae zuni ruhibe radoꞌi, mazaḡa eḡe, Vaze Ubugaꞌe zaꞌa mene edereꞌeteꞌe madaḡano bare onaiꞌuma.”

⁴¹Ebu Peteroꞌa niro, raenaꞌa, “Zuhiꞌa Boro, ḡaeꞌa hari ꞌadiꞌe emeḡe veize daꞌo ga vaze niduꞌa veize zuni idaneꞌohe?”

⁴²Zuhiꞌa Boroꞌa naenaeninaꞌa, “Eꞌe iniu huhuzaḡa zu zama tibano gauꞌeteꞌe azaḡa ziꞌohe. Tuḡure vazeḡa ꞌahogaꞌe huhuzaḡa zu zama tibano gauine, zuhiꞌaꞌe ani teite matuꞌiꞌuma. Ebu vaze eꞌe tuḡure azaḡa ḡihiꞌaḡa mae ohonadu ꞌahige reꞌuma, raenaꞌa, 'Tuḡure azaḡa niduꞌa taufoꞌi! Ogomuze zuni mada idunane zenoꞌi!' ꞌOugadu aniꞌe onamiꞌuma.

⁴³Tuḡure vazeḡaꞌe ꞌouge gauine zu zuhiꞌaḡaniꞌa bare feuradu horonine, ani matuadu manohuga haꞌuma.

⁴⁴E hube hune ziꞌohe, aniꞌe zuhiꞌaḡaniꞌa ane tohe niduꞌa taufeꞌeteꞌe vazeḡano ohoniꞌuma.

⁴⁵Rehano tuḡure vazeḡaꞌe aneꞌa bare raenaꞌa, 'E zuhiꞌaꞌe vehuꞌu faḡanobuꞌu onaiꞌuma,' rae zamaradu tuḡureḡa azaḡa niduꞌa bouzine zu ufeta ogau gage baboraune,

⁴⁶zuhiꞌaḡaꞌe, aneꞌa mene edereꞌeteꞌe madaḡano bare onaadu aduga boro haꞌuma ebu zama tibano mene gauiroteꞌe azaḡaniꞌa radiuꞌeteꞌe habaꞌano ohoniꞌuma.

⁴⁷Tuḡure vazeḡaꞌe ane zuhiꞌaꞌa nagini urateꞌeteꞌe haḡaiḡa edeḡa rehano, mene ruhibine zu haḡaiḡa mene haḡaine, aniꞌe boune sausauniꞌuma.

⁴⁸U tuḡure vazeḡaꞌe ane zuhiꞌa ura mene ederadu veꞌoḡa haḡaine, aniꞌe faꞌone tauḡiꞌuma. Iniuꞌe Badiꞌa mazaonoꞌo manohuga boro hidine, Badiꞌaꞌa ani gau boro haḡaoga uratiꞌuma.

⁴⁹Iesuꞌa bare ziro, raenaꞌa, “Eḡeꞌa raha ꞌadi hufoga radu ire roga mae onairo. Ebu ire rogaꞌe amahi raha ꞌadi iri radiune matuꞌiꞌuma.

⁵⁰Rehano e aduga hiditeꞌe bapatizoḡa ꞌahoga meꞌuma zu zamaheꞌe aduga onamo ḡonaga meꞌuma.

⁵¹Zaꞌa zamareꞌetene, eḡeꞌa raha ꞌadi uniho manoḡa mae ovairo ga? Mene! Eḡeꞌa rovoze ḡuzuhoga veize ovairo.

⁵²Izidionoꞌo onamo zama moneo ne azaḡaꞌe rovotiꞌuma, mazaḡa nuꞌe eḡe mazao fieꞌohe, u nuꞌe mene fieꞌohe. Ne eꞌe azaḡaꞌe fuꞌo reine, zeḡe boꞌaḡano rovotadu uḡiduꞌa ꞌaheu teiteagiretitiꞌuma, ga ꞌaheuꞌa uḡidu teite agiretitiꞌuma.

⁵³Aꞌe moganiꞌa ubuga teite agiretitiꞌuma ga ubuganiꞌa moga teite agiretitiꞌuma. Ebu viꞌaniꞌa aboḡa teite agiretitiꞌuma ga aboḡaniꞌa viꞌa teite agiretitiꞌuma. Ebu viꞌaniꞌa ubuga inuga teite agiretitiꞌuma ga ubuga inuganiꞌa iꞌa viꞌa teite agiretitiꞌuma.”

⁵⁴Iesuꞌa vaze ḡuḡuvaḡa ziro, raenaꞌa, “Ḡozeꞌa ḡutanoga horoneꞌetene, zaꞌa raenaꞌa, 'Iruguꞌa ruꞌaꞌuma.' A hube, iruguꞌa ruꞌaꞌuma.

⁵⁵Ebu ohere ḡozeꞌa bororanadu nahuduꞌetene, zaꞌa raenaꞌa, 'Madaꞌa hiaꞌuma.' A hube, madaꞌa hiaꞌuma.

⁵⁶Zae, zama guhi azaḡa! Adure zu raha iraḡa horoneꞌetene naginiꞌa fureraꞌuma zae edeḡa. U izidi madaḡano naginiꞌa fureru radiuꞌeteꞌe mene faine zamare horoneꞌohe.

⁵⁷Zaeꞌa zae bare naginiꞌe haḡai duduḡa rae mene edereꞌohe.

⁵⁸E hari ꞌahoga idaniꞌuma. Ḡaꞌe vaze ꞌahoga moni madu mene bare haune, aniꞌa ḡae kotao ohoꞌihi radu ani teite onamiꞌuma. Eꞌe zamaḡano ḡanine ge ibio uniho manofoꞌi! Mene ꞌougine, aniꞌa ḡa kota ibitohauꞌeteꞌe vazeḡa ꞌevorao ohoꞌiꞌuma, ebu ḡuꞌa neḡa taufeꞌeteꞌe vazeḡa evorao ohoꞌadu ḡuꞌa neḡano ohoꞌiꞌuma.

⁵⁹E hube hune ḡaꞌohe, ḡa mene buaꞌuma onamo ḡaeꞌa ani moni niduꞌa bare haꞌuma.”