Luka 12:18-59

¹⁸Abo i ene, ‘Teina mo abo ea abi: egu sanara abo ea lopahaidi, lailaidi ea abidi: alodi eai egu masuri, eo egu gogo egu abapeiauri.

¹⁹Nuagu ea ’ne, Nuagu e, gogo gamagaridi u peiauridi borimai gamagamagari adi laubagi: abo u aiyawasi, u aiai, u nomnom, eo u kode.’

²⁰Na Eaubada i ribalau ia arinai, i ene, ‘Oa eauyaure, maiona ta earuam abo se abihai: wau ginauri wa oa u peiauridi wa abo aidimo enadi?’

²¹Doha ede ina ia gogo i peiauri iabom enana, eo nige ena gogo Eaubada arinai.”

²²Ie ribalau ena heaheatayao aridi eai, i ene, “Arinai ede ea heribamiu ta, ea ’ne, Tabu maurimiu au nuatudaoiei, saha abo au ai; eo taumiu saha abo au helui.

²³Mauri mo i sae ariri ede, aiai nige’e, taumiu hinage se sae, lulu nige’e.

²⁴Boeoboeo au nuatuidi: nige adi se uma; eo nige adi se paipaisoa; eo nige edi sitoa, eo edi sanara nige’e; na Eaubada mo i heaidi; omi manudi au saetawatawaidi, e nige’e?

²⁵Esau arimiu eai taba i nuatudaoi abo siarina i heloha kubita esega wa?

²⁶Ginauri gagiridi wa nige abina au ata, ginauri gamagaridi omi saha au nuatudaoiedi?

²⁷Oea baeobaeodi se inima au nuatui: isi nige se paisoa, eo nige se lulu haturi; hinage ea heribamiu ta, Solomona ana tepo lolodi eai ana ao nige i lolo doha hinage isi.

²⁸Taba Eaubada ina doha oea leidi i heluidi, wau ie ota oea eai, maraitom se gabu um boeana eai: omi abo nige i heluimiu wa, sunuma gagiri tataomiu e!

²⁹Eo saha abo au ai, eo saha abo au nom, tabu au eoo, nuamiu tabu se dagugu.

³⁰Paana teina ginauri gamagaridi tanoubu enadi se eooidi: Tamamiu hinage i nuatuiyao omi teina ginauri gamagamagari bena au abidi.

³¹Eaubada ena basileia mo au eooi: abo teina ginauri gamagaridi se hepatulediwa arimiu eai.

³²“Eawoi gagirina e, tabu au matausi; paana ede Tamamiu ena gadosisi lailai bena basileia abo i leawa.

³³Emi gogo au uneuneidi, eo au aiainauiaedi; tobo abo au abidi taba nige se beabea, gogo wa galewa eai taba nige i ohi, arinai nige tauaiyahari i awasae eo hinage motamota nige se hebaaea.

³⁴Haedi emi gogo abatorena, nuamiu ede metai.

³⁵“Taumiu au taididinimiu, eo omi emi lamepa au healasinonohaidi;

³⁶omi hinage abo doha tatao edi Guiau se laubagibagiei, tawasora mataasina eai bena i uioma; ia i laoma eo i ipeipesi, arinai abo ma esega dobila se soe.

³⁷Meta heaheari se lolo, Guiau ena huia laoma i hearodi ma silasilawahetetedi: mamohoi ea heribamiu ta, ia abo i taididiniuioi, abo i hebawabigabigadi se aiai, eo i laoma i taubigaidi.

³⁸Ena bulinuana eai i lagema, e ena kamkam ie dou i lagema, isi ma silasilawahetetedi i lobaidi, meta heaheari se lolo.

³⁹Teina ta au nuatui, ena numa tanuaga i nuatui mahana hisa tauaigirihai abo i laoma, ia abo i silasilawa eo taba nige se awasae ena numa eai.

⁴⁰Omi hinage abo au abihetoanonohai: paana tau Natuna abo i laoma ena huia laoma nige au nuatui.”

⁴¹Petero abo i ribalau ia arinai, i ene “Guiau, e, wau parabole ta u ribaeyama enamai, e tatao gamagaridi enadi?”

⁴²Guiau i ene, “Eai heaheari tauna i lolo, eo i sonoga, ena Guiau abo i hetoro ena numa tataodi tanuagadi eai i lau, huia gamagari adi aiai abo i mosedi?

⁴³Heaheari wa i lolo ena guiau i lagema i lobai ena laulau nei doha.

⁴⁴Mamohoi ea heribamiu ta, ia abo i hetoro ena gogo gamagaridi tanuagadi eai i lau.

⁴⁵Na, heaheari wa ena nuaboeana eai i ene, ‘Egu guiau ena laoma taba nige i heulama’; ena heaheari, tatao eo sisine, i pidiridi eo i aiai eo i nomnom eauyaure.

⁴⁶Asubena esau, heaheari wa nige i nuatuhetoa, ena guiau abo i lagema, mahanana hinage nige i nuatui, eo ia abo i helautom, tatao riba nige se ataataiedi aridi eai i heoiesegaidi maenayao.

⁴⁷Meta heaheari, ena guiau ena nuatu i nuatuiyao, eo nige i abihetoanonohaiuioi, eo ena nuatu nige i abiwataidi, abo se lubilubini eo se pidiri.

⁴⁸Taba tau esau nige abina i ata, ena laulau debana eai taba se pidiri, taiede taba nige se pidiridaoei. Paana tau esau ginauri gamagaridi se mosei wa, ia arinai hinage gamagaridi bena se abiuioidi: ia hinage tatao ginauri gamagaridi se mosedi, aridi eai ginauri gamagaridi hinage abo se hetaladi.

⁴⁹“Ea laoma ta oeagi alaalasina abo ea gabadobei tanoubu potana eai ta; egu gadosisi saha? ea ’ne taba se healasi maodai!

⁵⁰Na, eau bapatiso esau arinai abo se hebapatisoigu; nuagu i hisihisili i lau e abo ea heohi!

⁵¹Omi au ene ea laoma ta bena loni ea leama tanoubu eai ta? Ea heribamiu, nige’e; ea peilabuiemiu mo.

⁵²Paana ede maraitom‐asubena numa esega tataodi haligigi se mia: haiona, labui abo se hewahewaiunuuioidi, eo labui, haiona abo se hewahewaiunuuioidi.

⁵³Tamana, natuna tau abo i hewaiunu, eo natuna tau tamana abo i hewaiunu; sinana natuna siu abo i hewaiunu, eo natuna siu sinana abo i hewaiunu; lawana ia malawana abo se haihewaiunuuioidi.”

⁵⁴Ie ribalau hinage tatao aridi eai, i ene, “Ania dubana teha lalasi eai au ita, abo au ene, ‘Nabu abo i leama;’ abo hinage ie taru.

⁵⁵Eo eawana i toama, abo au ene, ‘Mahana abo i posinasina;’ abo hinage ie tubu.

⁵⁶Omi tauboraborasom, galewa eo tanoubu aniadi au italobaidi; edoha teina huia ta hinage nige au italobai?

⁵⁷“Aue saha omibom laulau dudurai nige au nuatui?

⁵⁸Em waiunu maidam au lau tauheduhedudurai matana eai, dobila eai aue lau u aipate u aulabi ia arinai; ata i woeaim tauhedudurai matana eai, eo ia hinage abo i moselaem polisimani arinai, eo ia abo i gabasaem numa tutugudu alona eai.

⁵⁹Ea heribam ta, taba nige u pesagabaei, sora moni gamagaridi wa u hemaisaheohidi i lau e pene gagirina anasiga!”