Luka 12:18-59

¹⁸I phenđa: 'Akava ka ćerav! Ka peravav mle purane šupe hem ka vazdav po bare, i adathe ka čhivav sa o điv hem sa soi mlo.

¹⁹Tegani ka vaćerav korkoro maje da isi man baro barvalipe bute beršenđe. Ka šaj te odmorinav, te xav, te pijav, te uživinav!'

²⁰Ali o Devel phenđa lese: 'Hulavona! Akaja rat ka mere! A sa adava so spreminđan, kasoro ka ovel?'

²¹Ađahari okolese kova pese čedela blago ki phuv, a na barvaljola okoleja soi šukar e Devlese ano jaćha.”

²²Tegani o Isus phenđa ple učenikonenđe: “Adalese vaćerava tumenđe: ma oven zabrinuta zako tumaro dživdipe: ka ovel tumen li so te xan; ni zako tumaro telo: ka ovel tumen li so te hurjen.

²³Adalese soi o dživdipe po bitno e xajbnastar hem tumaroi telo po bitno e šejendar.

²⁴Dikhen e gavranen! Ni sejinena ni čedena, nane len ni šupa kote te čhiven o điv, a palem o Devel parvari len. A tumen injen e Devlese po bitna e čirikljendar!

²⁵A ko tumendar šaj adaleja so brinini pe te produžini plo dživdipe za jekh dive?

²⁶Znači te našti ni adava najxari te ćeren, sose onda injen zabrinime zako bilo so aver?

²⁷Dikhen o divlja luluđa sar barjona. Na ćerena buti, čak na sivenafse šeja, a vaćerava tumenđe da ni o caro o Solomon, kova inele but barvalo, na inole edobor šuže šeja sar jekha olendar.

²⁸Te o Devel ađahar šukar hurjavela i čar ko polje savi avdive adari, a tejsa frdela pe ani jag, kobor li više tumenđe ka del šeja, tikora verakere manušalen!

²⁹Tumen ma oven zabrinuta zako adava so ka xan hem so ka pijen.

³⁰Ađahar ćerena okola manuša kola na džanen e Devlese. Tumaro Dad, o Devel, džanel da valjani tumenđe sa adava.

³¹Nego roden o carstvo e Devlesoro, a ov ka del tumen sa adava so valjani tumenđe!

³²Ma daran, mle učenikonalen! Tumare Dadesiri volja inele te del tumen o carstvo.

³³Bikninen so isi tumen hem o love den e čororenđe! Ćeren tumenđe kese zako love save na properena hem barvalipe ko nebo savo niked na tikorini. Niko na ka šaj te avel adari te čorel tumaro barvalipe hem nijekh moljco na ka uništini le.

³⁴Adalese so tumaro vilo ka ovel adari kaj tumaro barvalipe.”

³⁵O Isus ple učenikonenđe phenđa hem akava: “Oven spremna, hurjavde zaki buti hem tumare svetiljke te oven tharde,

³⁶sar sluge kola adžićerena ple gospodare te irini pe čhere taro bijav. Ked irini pe o gospodari hem ked khuvela ko udar, o slugei spremna te phraven lese.

³⁷Blago okole slugenđe kolen o gospodari, ked ka avel, ka arakhi len džangale sar adžićerena le! Čače, vaćerava tumenđe, ov, o gospodari, ka phandel pe i kecelja, ka bešljačeri len te xan hem ka kandel len.

³⁸Blago e slugenđe kolen o gospodari ka arakhi džangalen čak i te alo ki ekvaš i rat ili angli zora.

³⁹Ali akava te džanen: te o čherutno džanel ine ko savo sati avela o čor, na ka mukel lese ine te đerdini ko čher te čorel.

⁴⁰Hem tumen oven stalno spremna, adalese so me, o Čhavo e Manušesoro, ka avav tegani ked na nadinena tumen!”

⁴¹Tegani o Petar pučlja e Isuse: “Gospode, vaćereja li akala uporedbe samo amenđe e učenikonenđe ili sarijenđe?”

⁴²O Gospod o Isus phenđa e Petrese: “Kovai, onda, verno hem mudro upravniko kas o gospodari ka čhivel upreder ple sluge te del len xajba ko vreme?

⁴³Blago okole slugase kas lesoro gospodari, ked ka avel, ka arakhi sar ćerela ađahar.

⁴⁴Čače vaćerava tumenđe, upreder sa o barvalipe plo ka čhivel le sar upravniko.

⁴⁵A te vaćerđa adava sluga ana peste: 'Na ka avel pana mlo gospodari' i lela te marel avere slugen, hem te xal, te pijel hem te maćol,

⁴⁶lesoro gospodari ka avel tegani ked na ka očekujini le, ka čhinel le ko ekvaš hem ka čhivel le maškaro nevernici.

⁴⁷A okova sluga kova džanđa i volja ple gospodaresiri, a na inele spremno ili na ćerđa pali e gospodaresiri volja, but mariba ka xal.

⁴⁸A okova kova na džanđa e gospodaresiri volja, a ćerđa nešto zako savo avela lese kazna, xari mariba ka xal. Kasei dindo but, but ka rodel pe lestar. Kasei poverime but, više ka rodel pe lestar.”

⁴⁹Tegani o Isus phenđa: “Aljum te frdav jag e sudosiri ki phuv. So bi mangava već te ovel thardi!

⁵⁰A valjani te nakhavav bare muke. But maje pharo đikote adava na ovela!

⁵¹Mislinena da aljum te anav mir ki phuv? Na. Aljum te ćerav o manuša te ciden pe jekh averestar.

⁵²Adalese od akana, oto pandž čherutne, trin ka oven ki mli strana, a duj ki aver ili duj ki mli strana, a trin ki aver.

⁵³Ka uštel o dad upro čhavo hem o čhavo upro dad, i daj upri čhaj hem i čhaj upri daj, i sasuj upri bori hem i bori upri sasuj.”

⁵⁴Tegani o Isus vaćerđa e narodose: “Ked dikhena da o kale oblaci avena taro zapad, tegani phenena da ka perel bršin, i čače perela.

⁵⁵Ked phudela i barval taro jug, phenena da ka ovel tatipe, i ovela.

⁵⁶Dujemujengere manušalen! O izgled e phuvjakoro hem e nebosoro šukar pendžarena, ađahar da pendžarena o znakija adalestar so ovela akana, a na mangena te den lenđe značaj.

⁵⁷Tumen korkore valjani te pendžaren okova soi ispravno.

⁵⁸Te neko legari tut ko sudo te tužini tut adalese so na irinđan lese o love, odrumal de sa tutar te mirine tut oleja angleder nego so resena adari. Te na ćerđan ađahar, ov šaj te vucini tut anglo sudija, a o sudija ka del tut ko manuš kova ka čhivel tut ano phandlipe.

⁵⁹Vaćerava će da čače na ka ikljove adathar sa đikote na irineja đi i zadnjo para.”