Luka 11:2-49

²Ie ribalau aridi eai i ene, “Omi au uura, abo au ene, “Tamamai e, galewa eai, oa esam se hetabuei. Em basileia bena i laoma. Em nuatu, tanoubu eai ta bena se lauwatai, doha hinage galewa eai laulauna.

³Bena asubena esau, asubena esau, aiai ama u ledima.

⁴Ema baaea ta u nuatugabaedi; doha hinage ai tauhebaaeamai edi baaea ai nuatugabaedi, Ena noho ai hearodi tabu u hesagugabaemai; baaea eai oa u hesaguhaimai.”

⁵Iesu i ribalau aridi eai i ene, “Eai, omi arimiu eai, bulinuana eai i lau ena heriam arinai, i ene, ‘Egu heriam e, falawa haiona u sagenaidima;

⁶ehagu esau ena abalauwasi eai i laoma arigu eai, nige egu haitala bena ea tore ia matana eai?’

⁷Numa alo eai ia arinana abo i heuio, i ene, ‘Tabu u hegadotoagu: dobila se guduiyao, ma nanatuguyao ai enoo ema abaeno eai; taba nige ea toro ea lediwa.’

⁸Ea heribamiu ta, ea ’ne ena nige i toro eo i mosei paana ia tau wa ena heriam, paana i awaawanoridaoi arinai abo i toro, eo ginauri aisadi, aisadi i henuadi wa abo i mosei.

⁹Ea heribamiu ta, ea ’ne, Au aiboda, abo se lediwa; au eooi, abo au lobai; au ipeipesi, dobila abo se soeawa.

¹⁰Paana esau, eo esau i aiaiboda abo i abi; eo ia i eooyoo abo i lobai; eo ia i ipeipesi dobila ia arinai abo se soe.

¹¹“Omi arimiu eai aitea tau natuna falawa i aibodai we’u abo i mosei wa? Eo eama i aibodai ia mota abo i mosei wa?

¹²Kamkam kasinona i aibodai abo gaganadenadewa i mosei?

¹³Na, taba omi, baaea tataomiuyao abidi au atao ainauia lolodi au mosedi nanatumiuyao aridi eai: Tamamiu, galewa eai ie mia, Earua Tabuna abo i mosei tauaiaiboda aridi eai.”

¹⁴Demoni esau Iesu i aiduiei, ia i tuutuuri. Demoni wa i lulagelau murimuri eai tau tuutuurina wa ie riba: tatao abo se noonooei.

¹⁵Isi headi si ene, “Belesebulo demoni edi wasawasa debana eai demoni wa i aiduiedi.”

¹⁶Headi hinage, ia se nohoi, heiheinoina bena se eooi galewa eai i laoma.

¹⁷Edi nuatu i itadio, arinai i ribalau aridi eai, i ene, “Basileia ena isibom se haitoremuriuioidi meta abo se tatagorigori; numa hinage ena isi se haitoremuriuioidi abo se guri.

¹⁸Ena Satani hinage iabom i haitoremuriuioi ena basileia abo edoha ena totoro? Paana au ene, Belesebulo debana eai demoni ea aiduiedi.

¹⁹Ena eau Belesebulo debana eai demoni ea aiduiedi, nanatumiuyao eai abo debana eai se aiduiedi? Isi abo enamiu tau heduhedudurai.

²⁰Taba eau Eaubada nima‐gigina eai demoni ea aiduiedi, mamohoi Eaubada ena basileia i lagemao arimiu eai.

²¹Tau adiadidirina ena numa i itawatai ma alahiana, eo ma elepana, arinai ena gogo se ota komakomani.

²²Tau esa i adiadidirisom i laoma, tau wa i toai, ena alahia eo ena elepa eo ena abi gamagamagari i girihaidi, eo abi gamagamagari wa abo i soiedi.

²³Ia nige i saguigu, ia abo i hetataguduguduigu: ia hinage maegu nige ai tanotanogogo, ia abo i hetatagorigori.

²⁴Earua biibiina tau esau i laugabaei, abo i laulau malapitapitari eai, ena abaaiyawasi i eoo; i eooasa nige i lobai, abo i ene, ‘Egu numa ea laugabaei wa abo ea uio arinai.’

²⁵Ie lage, abo ie ita numa wa se uiauia eo se taubigaikomakomani.

²⁶Ia abo i lau earua baabaaeaariridi haligigilabui i abidi; abo se lulau ia boeana eai arinai se miahai; tau wa murina eai abo i baaea ariri, nige doha bagubagunana eai.”

²⁷Teina riba ta i ribaei ma ribana na sine esau tatao boeadi eai i eaba lailai i ribalau Iesu arinai, i ene, “Bogana eai u laoma, eo susuna u madoidi se sae ariri.”

²⁸Iesu abo i ene, “Isi mo se lolo ariri, Eaubada ena riba se ataiei, eo se sogohididini.”

²⁹Tatao se oigogoma ia arinai, se gamagari, ena riba i hetubu, i ene, “Teina isi ta i baaea; heiheinoina se eooi: heiheinoina taba nige se mosedi, Iona peroveta mo ia heiheinoina.

³⁰Doha Iona Nineva tataodi edi heiheinoi ede, tau Natuna hinage teina isi ta ia edi heiheinoi.

³¹Tupo eawana edi wasawasa sine abo i toro, teina isi ta tataodi i hegirudi, eo abo i hebaaeadi paana tanoubu sigasigana eai i laoma wa bena Solomona ena sonoga i ataiei, na esau ede ina Solomona i saetawatawai.

³²Nineva tataodi abo hinage se toro isi ta abo se hegirudi, eo se hebaaeadi: paana Iona ena guguia eai nuadi se buidi: esau ede ina Iona i saetawatawai.

³³Nige tau esau lamepa i healasi abo i toreyamui, eo gulewa eai hinage taba nige i hebuitawai, na ie tore lamepa ena abaota eai, isi se awasaema marana abo se ita.

³⁴Tauhemara ede mata: ena matam i lolo esegai taum i ohihai hinage abo i mara‐gudui: ena matam i baaea taum hinage i masigiri‐gudui.

³⁵U komakomanim mara boeam eai ata i masigiri.

³⁶Ena taum i ohihai i mara gudui na nige tupo esa i masigiri, taum i ohihai abo i mara gudui, doha lamepa alapurupururuna i hemaram.”

³⁷Iesu ena riba ma ribaribana na Parisea tauna esau ia i heriba bena ia maena se aiai esega: to i awasae i bawabigabiga, bena i aiai mo.

³⁸Parisea tauna meta ie ita, i nooei, paana aiai sora, Iesu nige i nimadeuri baguna.

³⁹Guiau i ribalau ia arinai, i ene, “Omi Parisea kaputi eo gaeba murimuridi mo au heaadi: boeamiu eai hari baaea eo hari baaea se monauboriboriri.

⁴⁰Au eauyaure, murimuri wa tauginaurina aloalo hinage i ginauri, e nige’e?

⁴¹Emi ginauri aisadi au abidi wa au ainauiaedi; abo ginauri gamagaridi arimiu eai se heaadio.

⁴²Kapore omi Parisea tataomiu e! minete eo pagano eo lagau aiai gamagaridi au peini saudoudoi, lausoisoi esega saudoudoi eai wa au ainauiai: abidudurai eo Eaubada ena gadosisi nige au nuatui: i lolo wau wa au abiwatai, esau wa tabu au nuahuiedi.

⁴³Kapore omi Parisea tataomiu e! paana sunago alodi eai abababawa saesaedi au gadosisiedi, eo abauneune eai bena se aitoiemiu.

⁴⁴Kapore omi tauuriuri eo Parisea tataomiu e, omi tauboraborasom! Paana omi doha bousa nige se masaraha, eo tatao potadi eai se laulau nige se nuatuidi.”

⁴⁵Laugagaeo taulauheata esau Iesu arinana i heuio i ene, “Tanuagamai e, oa u riba doha meta ai hinage u ribasuuimai.”

⁴⁶Iesu abo i ene, “Kapore omi hinage laugagaeo tau‐laulauheataena tataomiu e! Oibahe poroporohedi tatao dabaearodi eai au hebaheidi, omi mo oibahe wa nige nima‐gigimiu esega arinai au abilau.

⁴⁷Kapore omi! paana peroveta bousadi numadi au hetorodi, tubumiuyao se unuhematedi wa.

⁴⁸Arinai ede au hemasaraha ta tubumiuyao edi laulau au ene se lolo: mamohoi isi se unuhematedi, omi bousadi numadi au hetorodi.

⁴⁹Arinai hinage Eaubada ena sonoga si ene, Peroveta tataodi eo aposotolo tataodi abo ea hetamaridi aridi eai, headi abo se unuhematedi, eo se heamamnadi: