LUKA 11:12-44

¹²Ayai penu iye wakumbira dzai angamupase nyankalize?

¹³Imwepo ndimwe wanthu wakuipa, tsono mumbadziwa kupasa bzinthu bzabwino wana wanu. Ndipo Babanu wa kudzulu ambapereka bzinthu bzabwino kuposa imwepo. Na tenepo an'dzapasa Mzimu wa Kucena kuna wale omwe an'dzamukumbira!

¹⁴Pantsiku ibodzi Jezu akhazula ciwanda comwe cikhadasandusa munthu ubewewe. Pomwe ico cidacoka, munthuyo adayamba adalewa-lewa. Na tenepo wanthu azinji adasusumwa.

¹⁵Tsono wanthu winango akhambalewa kuti: “Omweyu ali kuzula bziwanda mudzina la Berezebu, mkulu wa bziwanda.”

¹⁶Na tenepo wanthu winango akhafuna kuyezera Jezu, ndipo adamukumbira kuti awalatize cizindikiro ca kudzulu.

¹⁷Tsono Jezu akhadziwa kale ndzeru zawo, ndipo iye adawawuza kuti: Dzindza libodzi la wanthu likapambulana iro lin'pfudzika. Na tenepo banja libodzi likabzigawa ndipo iro lin'pasuka.

¹⁸Penu wa kwa Sathanimbo adabzigawa, ndipo ufumu bwacebo bungayenderere lini! Nakuti muli kulewa kuti ine-pano ndiri kuzula bziwanda mu dzina la Berezebu.

¹⁹Penu ine-pano ndiri kuzula bziwanda mudzina la Berezebu, kodi wana wanuambo ali kuzula mudzina la yani? Penu n'bzimwebzo, iwo ndiwo an'dzakuyeruzani.

²⁰Tsono, penu ine-pano ndiri kuzula bziwanda na mphambvu za Mulungu, umambo bwacebo bwakufikirani cadidi.

²¹Penu munthu nyamphambvu akatenepo ali kulindira pamui pace. Ndipo bzinthu bzacebzo bzimbakhocherereka bwino.

²²Tsono pakawonekambo munthu mwinango nyamphambvu kuposa iye, akamenyana naye acimukunda ambamutolera bzifuzo bzomwe akhathembanabzobzo. Ndipo acigawira wanthu bzinthu bzacebzo.

²³Na tenepo munthu omwe ngwangu lini ni muwengi wangu. Na ule omwe an'dithandiza lini kukonkhobza iye animwaza.

²⁴Ndipo ciwanda cikacoka mu munthu, ico cimbayenda mu mbuto zakusaya madzi kuti cikapume. Ndipo cikasaya mbuto, cimbalewa kuti: “Tsapano ndini bwerera kumui kwangu komwe ndacokera.”

²⁵Ndipo ico cikafika, cimbadzawona nyumbayo idapsairidwa ndipo idacena.

²⁶Na tenepo ico cimbayenda kukatenga pomwe bzinango bzinomwe bzakuipa kuposa ico, bzicikhala m'mwemo. Ndipo unthu bwace mumbadzalemwa kuipa kuposa pakuyamba.

²⁷Pomwe akhalewa bzimwebzopo, mkazi m'bodzi adakuwa pakati panthithi wa wanthu aciti: “Wakusimbidwa ni mamako omwe adakubala na kukumamisa!”

²⁸Tsono iye adatawira aciti: Ne-ne-ne, wakusimbidwe mbale omwe ambabva fala la Mulungu aciliteweza.”

²⁹Pomwe wanthu azinji akhakonchezana, Jezu adalewa kuti: “Dzindza la wanthu wakuipa! Iwo an'funa cizindikiro. Tsono palibe cizindikiro cinango comwe cin'citike kuposa comwe cidacitikira Jona.

³⁰Nakuti Jona akhali cizindikiro kuna wanthu wa kuNiniva. Na tenepo Mwana wa Munthu ni cizindikirombo kuna dzindza limweri.

³¹Ndipo Mambokazi wa Kunyantsi an'dzalamuka pantsiku yakutongedwa pakati pawanthu, ndipo acimanga mulandu ntundu omweyo wa wanthu. Nakuti mambokaziyo adacokera kwa kuyambira dziko kuti akabve ndzeru za Salomau. Tsono ali panoyu ni mkulu kuposa Salomauyo.

³²Na tenepo wanthu wa kuNiniva an'dzamukambo pantsiku ya kutongedwa dzindza limwero kuti adzalimangembo mulando. Nakuti iwo adakhumbula bzakuipa bzawo pomwe Jona adapaliza. Tsono ali panoyu ni mkulu kuposa Jonayo.

³³Ndipo palibe munthu ambaphatiza m'bvuniko aciubisa ayai aciukha m'mpfumpfuntsi mwa bwalizo. Tsono iye ambauikha padzulu, kuti wanthu omwe an'pitawo awone ceza.

³⁴Na tenepo maso yako ndico ceza ca thupi lako. Penu iyo yali bwino na thupi lakombo lina ceza. Tsono penu yali lini bwino na thupi lakombo lina m'dima.

³⁵Ndipo, cenjerani kuti ceza ciri m'maso mwanuco cileke kukhala mdima.

³⁶Na tenepo penu thupi lako lentse liribe m'mdima na pang'onopo, ndipo lin'dzayetima ninga momwe umbatoyera mbvuniko ukaugasa.

³⁷Pomwe Jezu adamala akhalewalewa, m'falizeu m'bodzi adamucemera kuti akadye naye. Na tenepo iye adayenda acikakhala patsantsali la kudyera.

³⁸Tsono m'falizeuyo adadabwa pomwe adamuwona kuyamba kudya acisaya kusamba m'manja.

³⁹Ndipo Mbuya adamuwuza kuti: “Afalizeumwe mumbatsuka kunja kokha mikombo na ndiro. Tsono mitima yanu nja ndewo na mingululi.

⁴⁰Mapsirumwe! Kodi ule omwe adakondza kunja, ni m'bodzo-bodzi lini omwe adakondza mkati?

⁴¹Tsono tomani kuthandiza anyakusauka na bzinthu bzomwe munabzo. Na tenepo bzinthu bzentsenebzo bzin'dzacena.

⁴²Tsoka kuna imwe afalizeu! Nakuti imwepo mumbateweza mitemo yentse ya Mozeji, mumbapereka kuna Mulungu cacikhumi ca mbeu zentse za m'munda. Tsono mumbayebwa cilungamo na lufoi la Mulungu. Na tenepo citani bzimwebzi mucisaya kuyebwa bzinangobzi.

⁴³Tsoka kuna imwe afalizeu! Nakuti imwepo mumbafuna kukhala m'mipando ya ulemu ya m'nyumba zakupembera na kumbamusidwa m'misika.

⁴⁴Tsoka kuna imwe afalizeu! Nakuti kuteweza mitemo yanu bzidandendemera ninga munthu ali kupita nthenje aciponda nthutu nakusaya kudziwa, uko ni mukho.”