Luka 10:6-26

⁶Eme fic ira ŋic moc wamare biŋe jume wamadâŋ‐ŋeŋicte fârinezi erao fotâcnerâ foocmu. Arictac eme wamadâŋ‐ŋeŋicte fârine ŋoŋerao mocwâc risieocmu.

⁷Fic feniŋmu ijaha ŋeŋe juju ehuc nânâ gumec‐ŋopapie nânʒepieŋ. Gie bapa ŋic wiac furimâc jare gumec ezo. Ŋoŋe ficbiri mi junʒepieŋ.

⁸Hae mocko fisipie hezu hewâneŋ eŋarehuc nânâ gumec‐ŋopapie nânʒepieŋ.

⁹Erâ ŋic huchec ɋiɋicne bacjoparâ hae rune ʒiŋuc jazanʒepieŋ: ‘Anuture uucmaŋzi maic‐ŋopakac.’

¹⁰Hae mocko fisipie qikiŋ‐ŋopapie hae ʒoŋao domahuc‐ʒiŋuc jazanʒepieŋ:

¹¹‘Gâc wândoc‐ŋeŋic kike‐nâŋecko bohotakac, i âteickepene waha foŋarezejec. Erâ ine ʒiŋuc mananiŋ: Anuture uucmaŋzi maic‐ŋopame bâsuembieŋ.’

¹²No ŋazape mananiŋ: Okac dameŋko Sodom haeonec katucne bawahahuc ejarezo â hae iŋucne jaŋe bafehuc ejarezo.

¹³“Jei Koraziŋ rune, jei Besaida rune, ŋoŋerao mâsi hâhâwicne fuawec, iŋucne Tiro Sidoŋ haeo fuame muzac jaŋe mârâc jaha ki busâqoc ehuc maŋjeŋic bârisienʒapiŋ.

¹⁴Irec juku okac dameŋko Tiro Sidoŋ haeonec katucne bawahahuc ejarezo â ŋoŋe ine katucne bafehuc eŋarezo.

¹⁵Erâ Kafanaum rune, go sambâŋko bafecguo me? Aricne, go hârâcko tuŋguzo.

¹⁶Ŋoŋere dâŋ manaocmuzi nore dâŋ manaocmu. Â ŋoŋe qikiŋ‐ŋopaocmuzi no qikiŋnuocmu. No qikiŋnuocmuzi ine sorecnuwec e qikiŋneocmu.”

¹⁷Motec 70 jaŋe juku risierâ ʒeri ehuc Jesu dâŋ binaŋ ʒiŋuc ecnembiŋ: “Wofuŋ, gore ʒâŋe muhuc demoŋ jâpe‐jarepene micnâŋec reŋke‐jâmbâŋkeŋgopieŋ i!”

¹⁸Mupie ʒiŋuc jazawec: “Sataŋ e sambâŋkonec bâbâric iŋucne waha qame honepo.

¹⁹Manaŋgopieŋ, ŋoŋe homa â omeqaqa â râsire wiac ʒârâ hâriŋ irec faio âtepie mi sipiric‐ŋopaocte tâpiri râe‐ŋarepo.

²⁰Eme ŋoŋe ine demoŋzi micŋeŋic reŋkeŋgopieŋ irec mi ʒeri enʒepieŋ, ʒâŋe‐ŋeŋic sambâŋko qâreŋkekicne fokac irec ʒeri enʒepieŋ.”

²¹Eme dameŋ ijaha Tiri Mârozi Jesu bufahac qacneme ʒeridâŋ kecʒiŋuc muwec: “Mamac, sambâŋ â mâreŋ rune, go mamana‐jeŋicte manapie kâcɋene eekac ŋic i jaŋe mitidâŋge hesoŋke‐jareekic, â maŋjeŋicte manapie gegecne eekac jaŋe ine mufua‐jareekic, eme no irec muteŋgukopac. Go iŋuc fua biaŋ raocte mupaŋkemeŋ hâcne ine.

²²Wiac sasawa i Mamac‐nanezi râe‐nare‐fârewec. Eme ŋic moczi Ŋokâ mi ʒâŋitaekac, Mamaczi buc ʒâŋitaekac. Erâ Mamac iŋuc jaha ŋic moczi mi ʒâŋitaekac, Ŋokâzi buc ʒâŋitaekac. Erâ Ŋokâzi ŋic moc Mamacte fuŋne mufuacneme e wâc ʒâŋitaocmu.”

²³Iŋuc murâ motecfâcne jaŋacne ʒiŋuc jazawe: “Ŋoŋe wiac ʒâŋe furu honehuc jueŋgopieŋ irec ʒeri enʒepieŋ.

²⁴No ŋazape mananiŋ: Porofete â ŋicwofuŋ bocjaha jaŋe ŋoŋe wiac hone manac eeŋgopieŋ i hone manac eniŋte ejare‐bipiehame sifu mi hone manac embiŋ.”

²⁵Sâcmutâc mamana ŋic moczi Jesu ʒiŋuc muhuc esâickewec: “Qaqazu, no weniŋuc erâ juju sanaŋte biŋe epemu?”

²⁶Mume Jesuzi okacne ʒiŋuc wiocnewec: “Sâcmutâc dâŋ weniŋuc fome woseekic?”