LUKA 10:6-26

⁶Unai ruma dekenai bema maino tauna ta ia noho, emui maino be iena latanai do ia noho, to bema lasi, oiemu maino hereva do ia giroa lou oi dekenai.

⁷Unai ruma tamona dekenai do umui noho, emui aniani do idia henia gaudia do umui ania, bona do umui inua, badina be gaukara tauna ese davana ia abia be namo. Ruma idauidau dekenai do umui lao lasi.

⁸“Hanua ta dekenai umui ginidae, bona umui do idia abia dae neganai, emui aniani do idia karaia gauna be do umui ania.

⁹Edia gorere taudia do umui hanamoa, bona do umui hadibaia idia dekenai, do umui gwau, ‘Dirava ena Basileia be umui dekenai kahirakahira ia ginidae.’

¹⁰To do umui ginidae neganai bema umui do idia abia dae lasi neganai, hanua ena ariara dekenai do umui gini, do umui gwau,

¹¹‘Umui emui hanua ena kahuna, aiemai aena dekenai ia kamokau gauna be ai kokia inai, umui dekenai samania gauna do ia lao. To umui laloa namonamo, Dirava ena Basileia be kahirakahira do ia ginidae.’

¹²Lau hamaoroa umui dekenai, Dirava ena Kota henia Dina dekenai, Sodoma ena dika be do ia maragi, to unai hanua be do ia dika bada.”

¹³“Korasina bona Betesaida, madi umui be dika! Badina be siahu karadia umui emui lalona dekenai lau karaia be Turo bona Sidono edia lalonai bema lau karaia, idia be haraga edia lalona be do idia giroa. Mai edia puse dabua, bona edia kopina dekenai mai kahu danu be do idia helai, edia lalona idia giroa toana hedinaraia totona.

¹⁴Dirava ena Kota henia Dina dekenai, Turo bona Sidono be do idia dika maragi, to umui be do umui dika bada.

¹⁵Oi danu Kaperanauma e, oi sibona be guba dekenai do oi abia isi gwauraia, a? Lasi, oi be mase gabuna dekenai oi do idia doria diho.”

¹⁶Ma Iesu ese iena diba tahua taudia ia hamaoroa, ia gwau, “Umui dekenai ia kamonai henia tauna be lau dekenai ia kamonai henia, bona umui dekenai ia ura henia lasi tauna be lau dekenai ia ura henia lasi. Bona lau dekenai ia ura henia lasi tauna be lau ia siaia Diravana dekenai ia ura henia lasi.”

¹⁷Unai tatau 70 idia giroa mai lou, mai moale danu, idia gwau, “Lohiabada e, lauma dikadia ese aiemai hereva idia kamonai, oiemu ladana dainai.”

¹⁸Vadaeni Iesu ese ia hamaoroa idia dekenai, ia gwau, “Lau be Satani lau itaia, kevaru bamona guba dekena amo ia moru.

¹⁹Lau ese siahu lau henia umui dekenai, gaigai bona doadoa do umui moia, bona umui dekenai ia heatu henia tauna ena siahu ibounai danu do umui moia, bona gau ta ese do ia hadikaia lasi umui.

²⁰Gau tamona, lauma dikadia ese umui dekenai idia kamonai henia, be do umui moalelaia lasi, to inai sibona mo do umui moalelaia: Umui emui ladana be guba dekenai ia torea vadaeni.”

²¹Unai neganai Iesu be Lauma Helaga ese ia abia dainai ia moale bada, ia gwau, “Egu Tamana e, guba bona tanobada ena lohia, lau hanamoa oi dekenai, badina be inai gaudia aonega taudia bona diba taudia dekena amo oi hunia vadaeni, to memero maragidia dekenai oi hedinaraia vadaeni. Egu Tamana e, oiemu laloa namona dainai unai bamona oi karaia.

²²Gau ibounai be egu Tamana ese ia henia vadaeni lau dekenai. Tau ta be Natuna ia diba lasi, iena Tamana sibona. Bona tau ta be Tamana ia diba lasi, iena Natuna sibona. To bema Natuna ia ura tau ta dekenai Tamana ia hedinarai henia, be unai tau ese Tamana do ia diba.”

²³Vadaeni Iesu ese iena matana ia giroa, iena diba tahua taudia sibona dekenai ia hereva henia, ia gwau, “Inai gaudia umui itaia taudia emui matana be idia namo vadaeni.

²⁴Badina be peroveta taudia bona king momo herea idia ura umui ese umui itaia gaudia do idia itaia, to idia itaia lasi, bona umui ese umui kamonai herevadia do idia kamonaia, to idia kamonaia lasi.”

²⁵Vadaeni taravatu hadibaia tauna ta ia toreisi, Iesu dekenai ia dibagania gwauraia, ia gwau, “Hadibaia tauna e, lau be edena bamona do lau karaia mauri hanaihanai abia totona?”

²⁶Iesu ia gwau, “Taravatu ena buka lalonai edena bamona ia torea? Edena bamona oi duahia?”