Luk 4:4-26

⁴Kɔ Yesu oloku sentani: «Aŋcic ti dəbuk ba sariyɛ sa Kanu: ‹Bafɔ kəcom gbəcərəm kəŋsɔŋɛ fum kiyi ka doru.›»

⁵Kɔ sentani səmpɛnɛ kɔ sɔ tofo teŋeci kəroŋ, kɔ səmentər kɔ pipic tɔf ya doru fəp.

⁶Kɔ səloku kɔ: «Indesɔŋ’əm kətam fəp kɔ pəmot pa pəlel pa dɛbɛ da tɔf yayɛ fəp; bawo anasɔŋ’im yi, ina sɔ ic-tam kəsɔŋ yi nwɛ o nwɛ iŋfaŋ mɔ.

⁷Awa, kɔ məna məntontnɛn’em fɔr kiriŋ-ɛ, yayɛ fəp yam yɔ yɔŋyɔnɛ.»

⁸Kɔ Yesu oloku sentani: «Aŋcic ti dəbuk ba sariyɛ sa Kanu: ‹Kanu Kəpɔŋ nkɛ kəyɔnɛ Kanu kam mɔ, pəmar məc-tontnɛnɛ; nkɔn gbəcərəm ɔ pəmar sɔ məc-cəpəs tewe tɔn.›»

⁹Kɔ sentani səŋkekərɛ kɔ sɔ Yerusalɛm, kɔ səŋkɔ səcəmbər kɔ nde kəlɔ kəpɔŋ ka Kanu kəroŋ. Kɔ səloku kɔ: «Kɔ pəyɔnɛ fɔ Wan ka Kanu məyɔnɛ-ɛ, məyokɛ oŋ ma nnɔ dəntɔf. Bawo aŋcic ti dəbuk ba Kanu:

¹⁰‹Kanu kəndesak mɛlɛkɛe ɔn aŋɛ ŋande kəc-bum’əm mɔ;›

¹¹k’aŋcic sɔ: ‹Ŋandetɔmpər’əm dəwaca ntɛ tɔŋsɔŋɛ ta məmpət tasar mɔ.›»

¹²Kɔ Yesu oloku Sentani: «Aŋcic ti dəbuk ba sariyɛ sa Kanu: ‹Ta məwakəs Kanu Kəpɔŋ, Kanu kam.›»

¹³Ntɛ Sentani səlip kəwakəs Yesu kəciya mɔ, kɔ səmbɔlɛ kɔ haŋ tɛm tɔlɔma.

¹⁴Kɔ Yesu olukus Kalile kɔ fənɔntər fa Amera ŋa Kanu disrɛ, kɔ tewe tɔn tɛsam dɔtɔf fəp.

¹⁵Pəc-təksɛ afum nde dəkəcəpəs daŋan, kɔ afum fəp ŋac-cam debeki dɔn.

¹⁶Kɔ Yesu ender Nasarɛt nde anadusum kɔ mɔ, k’ɛmbɛrɛ dəkəcəpəs simiti, dɔsɔk da kəŋesəm, pəmɔ tɔkɔ ɔŋc-yɔ ti mɔ. K’ɛyɛfɛ kəkɔ-karaŋ,

¹⁷k’asɔŋ kɔ buk ba wədəŋk wəka Kanu Esayi. K’emperi buk, k’ɛmbəp da aŋcic:

¹⁸«Amera ŋa Kanu Kəpɔŋ ŋey’im kəroŋ, bawo Kanu kəyɛk-yɛk’im ntɛ tɔsɔŋɛ iloku afum atɔyɔ daka toloku tɔtɔt mɔ; Kanu kəsom’im kədedəŋk kəyac ka acar aŋɛ asumpər dəkəwan mɔ. Ideloku atɔnəŋk a ŋandenəŋk; kədekekərɛ aŋɛ ŋayi kətam disrɛ mɔ, bəkəc yoforu disrɛ

¹⁹kədedəŋk kəren ka kəmar nkɛ Kanu kəndeŋaŋnɛnɛ afum səbe nsɛ ŋantɔmpər mɔ.»

²⁰Ntɛ Yesu elip kəkaraŋ mɔ, k’ɛnɛp buk, k’ɔsɔŋ bi wəmarəs nwɛ ɛnatɔmpər teta səbuk mɔ, k’ɔŋkɔ pəndɛ. Akɔ ŋanayi dəkəcəpəs disrɛ mɔ fəp kɔ ŋaŋgbətnɛ kɔ.

²¹Kɔ Yesu ɛyɛfɛ kəlok-lokər ŋa: «Mɔkɔ toloku tecic tatɔkɔ nəne mɔ, tɛlarɛ.»

²²Kɔ fəp fəmentər kɔ ntɛ pəmbɔt kɔ nnɔ eyi mɔ, kɔ tɔkɔ pəŋciyanɛ ŋa moloku ma kəmar kəfili mmɛ moŋc-wur kɔ dəkusu mɔ, kɔ ŋaŋyifətɛnɛ: «Bafɔ wan ka Isifu ɔfɔ ba?»

²³Kɔ Yesu oloku ŋa: «Iŋcərɛ a nəndelok’im capafɔ ncɛ: ‹Wətɛn-cɔl mətaməsnɛ məna sərka!› Nəndesɔ-lok’im: ‹Səne mes mɔkɔ məŋcepərɛnɛ Kapɛrnayum mɔ fəp, məyɔ sɔ mes min mayi nnɔ aŋkom’əm mɔ.›»

²⁴Kɔ Yesu oloku ŋa sɔ: «Kaŋce k’indelok’un: Ali wədəŋk wəka Kanu wəkin afɔselɛnɛ bel-bel nde aŋkom kɔ mɔ.

²⁵Kaŋce kɔ kaŋkɛ indesɔ-lok’un mɔ: Aran aŋɛ awos aŋa ŋanafi Yisrayel mɔ ŋanala tɛm ta Eliya, tɛm ntɛ kɔm kənagbətnɛ meren maas yof camət-tin mɔ, a kɔ dor dɔpɔŋ dosumpər atɔf mɔ.

²⁶Mba kənasom fɛ Eliya nda nwɛ o nwɛ, mɛnɛ nda wəran wətɔlɔ wəlɔma, nde Sarepta nde atɔf ŋa Sidɔŋ.