Luk 2:11-38

¹¹Iwa endi mame, apan Devit pa sewa mega Betiriem gapan, wat inakam imaini otua gase yanen. Me Ayop di, God mega wa watu eneni Keriso.

¹²Ne paua ma ewaingina gapan pa aisene, ame orup wanupa wa panamen, man kao taba naine arewa gapan ae baraene wandini yawai.”

¹³Anea ap anega wani boge upine kimaniwa barat mutan, anea namua tanan, God inap anega wa atonasen,

¹⁴“God kimani paina iragen yaua ao warivin. Piupa wanumuine nagire atonamu anuini gapan, God baigan mega warain.”

¹⁵Ap anega wane anea kimani sia dot amon. Man kwayup taine nagirewa anega wawa mutan, “Pa Betiriem anepen inak mame venaseni oisewa Ayop wadianeni yawapen.”

¹⁶Ame boge ao yonan, irut yani amone. Amone tauan, Meri ge Diosep amba orup mugawa, man taba naine arewa gapan ae baraene wandeni den yawamon.

¹⁷Ame orup mame yawanewa, anea gaset orup mame nopewa anen wadiamoni iragi ase wat senamene.

¹⁸Man sip kwayup taine nagire oit ame wane waenapan anune no i kap wane.

¹⁹Go Meri inak kakae iragen mame venaseni menan imua upe se wande anuiwandin.

²⁰Man sip kwayup taine nagire entan sia amone. Anea anen wadiamoni inagewa yawane menan God yaua ao waran, wa atonasiwanumun.

²¹Wam nanin yamunaet yamunewa yampo uon tani ewap, Iesu God dugup mega intum tapen menan paua mega etua tunane amba yaua Iesu dian. Yaua ame anea namu dien amba inewa evi digumin tan.

²²Amba Diosep ge Meri, apan Mosis iup namua seni kwayup tapen menan naninanan ta dup iapen wamewa tauen. Amba Iesu God ire di wanapen menan pa Ierusalem dot amon.

²³Iwa wataget God nop mega ok anega seane, Orup namua apan yanepiwa ame Ayop God ase ire di wanep.

²⁴Nop mega den anega wan, Orup yaneni menan nenip bugip dere, o bairantan otua dere tambun gut iran, God wa atonasen. Iesu ine mame, iup mame tapen menan Ierusalem dot amon.

²⁵Wam ame gapan, ap mepe Ierusalem gapan, apan da yaua Simion iniwandin. Me apan kakae iragen iwa God men pot pot anu taiwandin. Isurero nagirewa ao sia wat nagat mumapen menan amat taiwandin. Ap gapan God Guewa Woup Seniwa Simion inap den wandiwandin.

²⁶Guewa ame Simion namu manega wadien, God mega wa watu enepi Keriso namu tauep yavepi amba Simion boeta.

²⁷God Guewa wadieni menan Simion God Paewa gwanap aen. Amba Iesu ine mame apan Mosis iup baraeni gueguewa tapen menan God Paewa gwanap Iesu wat amon.

²⁸Amba Simion amawa Iesu bumagap ma wareni boge God inap anega wa atonasen,

²⁹Ayop negawa, wa agiat nimanegeana tavewa tauia, menan endi ne nao gega taina apanewa, baigan gapan bonigatain.

³⁰Iwa inak ewakewa nunepi, otua watu enaana mame, nek yamanap ase yaviangin.

³¹Ame ge gaset waenapan iragi menan anu ta baraean.

³²Orup ma ganat otua, Diu uon ian ugupe nagirewa, ganat mega gapan guegue gega yao anu awain. Me Isurero gapan yaneni menan ian ugupewa nagirewa, nu ian Isurero nagirewa, wa atonat nimanain.

³³Simion Iesu oisewa ap anega wani menan ine mame dere no i kap wane.

³⁴Simion Iesu ine mame wat aipakam mumeni amba inewa Meri anega wadien, “Wapena anu. Otuga mam Isurero nagire aruga upi wat momak mumapen, amba upi wat inakam mumapen menan God watu enen. Me God ire yaoyao paua mega da go waenapan aruga wawa koko tain.

³⁵Ap wawa koko tapi imumu koeragewa ame wat arogameta. Amba ita enugin vegewa anuiana umap bumagaga enup vegewa anui.” Ap anega wadien.

³⁶Ap mepe God nop mega waini kwapura da yaua Ana iniwandin. Me dugup yaua Asa. Me mamewa yaua Panuero. Me waen aeta di, wataget waenoro ini dena wandeni gapan apan naisen, en nani yamunaet nani yamu dere den iniwandin, amba memewa boen.

³⁷Ap gapan me kwapura ta wandeni en mega apane degede, amba apan da naniwa degede (84) uon tan. Me Ierusalem gapan God Paewa gwanap pot poraet aiwandin. Mum wam pot pot God wa atonasepen menan mup waiwandin, amba wam da da gapan taba virip taiwandin.

³⁸Simion nop mega uon tani amba waen Ana taue God wa atonasiwandin. Amba den Ierusalem gapan wat inakam mumapen menan amat taiwanumune nagirewa, Iesu oisewa wadidiamon.