Luk 23:31-50

³¹Bawo k’ayɔ ti kətɔk kəcaŋk-ɛ, cəke cɔ andeyɔ kəwosu-ɛ?

³²Kɔ ŋasolɛnɛ sɔ kəkekərɛ calbante mɛrəŋ aŋɛ anakɔ-difɛnɛ kɔ Yesu mɔ.

³³Ntɛ ŋambɛrɛ kəfo kaŋkɔ aŋwe «Kəmbɛmbəlɛ» mɔ, kɔ ŋaŋcaŋ kɔ dəkətɔk kəpandən ka defi dəndo. Kəlɛkɛnɛ calbante akakɔ mɛrəŋ; wəkin pəyi kɔ kəca kətɔt, wəkɔ pəyi kɔ kəca kəmerya.

³⁴Kɔ Yesu oloku: «Papa məŋaŋnɛnɛ ŋa, bawo ŋaŋcərɛ fɛ ntɛ ŋayi kəyɔ mɔ.» Kɔ asɔdar akaŋɛ ŋayerɛnɛ yamos yɔn ŋac-gbalɛ ti kɔla.

³⁵Afum ŋacəmɛ, ŋac-mɔmən. Abɛ ŋac-fani Yesu, ŋac-loku: «Bawo ɛyac akɔ, pəyacnɛ oŋ ma nkɔn sərka, kɔ pəyɔnɛ fɔ Krist, nkɔn ɔyɔnɛ Wəyɛk-yɛk nwɛ Kanu kəsom mɔ-ɛ!»

³⁶Kɔ asɔdar sɔ ŋaŋcɔŋnɛ kəkɔ-fani kɔ, kɔ ŋasɔŋ kɔ member modokət.

³⁷Ŋac-loku: «Kɔ pəyɔnɛ fɔ məna ɔyɔnɛ wəbɛ ka aSuyif-ɛ, məyacnɛ oŋ ma, məna sərka!»

³⁸Anacic kɔ domp takəroŋ: «Wəkawɛ ɔyɔnɛ wəbɛ ka aSuyif.»

³⁹Kalbante kin akakɔ anacaŋ mɔ, pəc-lɔməs Yesu, pəc-loku: «Bafɔ məna ɔyɔnɛ Wəyɛk-yɛk wəka Kanu? Məyacnɛ oŋ ma, kɔ səna!»

⁴⁰Mba kɔ kalbante kamɛrəŋ kəŋkɔ anacaŋ mɔ, kəŋgbəŋ-gbəŋər kɔ, kəc-loku: «Cəpɔ məfɔnesɛ Kanu ba, məna nwɛ andeyɔ pəmɔ səna mɔ?»

⁴¹«Ta səna, kaŋce kɔ, tantɛ tɔ pəmar pasɔŋ su kəway ka mɛləsər mosu; mba wəkawɛ ɔyɔfɛ tɔlɔm o tɔlɔm tɛlɛc.»

⁴²K’oloku: «Yesu məde məcɛm-cɛmn’em kɔ məndekɔ-bɛrɛ dɛbɛ dam dəntɔf-ɛ.»

⁴³Kɔ Yesu oloku kɔ: «Kaŋce kɔ, ic-lok’əm: Mɔkɔ, səna aŋkɔyi Ariyana kɔ məna.»

⁴⁴Daŋ dɛnabəp, dec dosurɛnɛ afum dəsəbomp, kɔ kubump kəkəbaŋ atɔf fəp, tɛnabɔlɛ kətɛŋc haŋ dec maas.

⁴⁵Dec dɛnakalɛ, pənabiyɛ. Kɔ kəloto nkɛ anagbɛk kəkump ka kəfo kəcempi ka kəlɔ kəpɔŋ ka Kanu mɔ, kəwalɛ dacɔ.

⁴⁶Kɔ Yesu oŋkulərnɛ dim dɔpɔŋ: «Papa, ilɛk amera ŋem, k’imbɛr’əm dəwaca!» Ntɛ elip kəloku moloku mamɔkɔ mɔ, k’eŋgbiŋ kifir.

⁴⁷Ntɛ wəsɔdar wəRom wəbɛ ka asɔdar tasar tin (100) ɛnəŋk mes mamɔkɔ mɛnacepər mɔ, k’ɛŋcam debeki da Kanu pəc-loku: «Kaŋce kɔ, fum wəkawɛ ɛnalomp!»

⁴⁸Ntɛ kənay ka afum aŋɛ ŋanader kədetəŋnɛ mes mamɔkɔ mɔ, ŋanəŋk ntɛ tɛnacepər mɔ, kɔ ŋalukus ŋac-sut-sutnɛ bəkəc nɔnɔfɔr.

⁴⁹Aŋɛ ŋanacərɛ Yesu mɔ fəp, kɔ aran akɔ ŋanacəmbər kɔ kəyɛfɛ Kalile mɔ, ŋanacəmɛ pəbɔlɛ, ŋac-mɔmən tɔkɔ mes meŋcepər mɔ.

⁵⁰Wərkun wəlɔma ɛnayi pac-we kɔ Isifu. Wəboc kiti wəpɔŋ wəlɔma nkɔn ɛnayɔnɛ sɔ; fum wətɔt, pəlomp.