Luk 22:8-67

⁸Ra o Iesu i tulu ru o Pita ma o Jon, ma i watungi tander lena, “Mur in nan ma mur in waninar andat a utna sur a labino bung na lotu na Wanlakai.”

⁹Ra der tingi lena, “U nemi sur mir in waninari awai?”

¹⁰I balu der lena, “Ra mur in nanpat sapat o Jerusalem, mur in etorom nam ara musano i los in labino koto na danim, ra mur in muri utiro una rumu ra in ruk uni.

¹¹Ma mur in watungi tan a taman a rumu lena, ‘A Tene Ususer i watungi lena: Awai i a kukur rumu ra met nam anung a kum nat na ususer, met in nan a utna na Wanlakai iai?’

¹²Ma in ese tar mur una labino kukur rumu sapat netes, ra di sa waninar tari. Mur in waninar a utna tiro iai.”

¹³Ra der wan, ma der pastoromi ut a kum utna rop ra o Iesu i sa watung tari tander. Ra der waninar a utna na Wanlakai.

¹⁴Ra a du bung i sa sot, o Iesu ma a kum aposel det kis una inangon.

¹⁵Ra o Iesu i watungi tandet lena, “A nem doko i sur dat in nan a utna na Wanlakai, ra ka taramo i utmakai a ngunungut,

¹⁶uni a watungi tamot lena, kan nan melet mo tu utna na Wanlakai tuk una bung ra o God in pam sot pas a kukurai ina Wanlakai una nun a matanitu.”

¹⁷O Iesu i los pas a kap ma i watung wakak pas uni, ra i watungi tandet lena, “Mot in los pas a kap ri, ma mot rop mot in inum taguni.

¹⁸Uni a watungi tamot lena, kan inum melet mo lako wain, tuk ra a matanitu anun o God in nanpat.”

¹⁹Ra i los pas a beret, i watung wakak pas uni, i tibiki, ma i tabor det nami, ra i watungi lena, “Iri a pining, a pitari sur mot. Mot in ser pami lenri, sur mot in ser nuk melet pas iau.”

²⁰Lenkutkai ra, numur tan a inangon, i los pas a kap ma i watungi lena, “A kap ri, a matok na kunubus tagun a gaping ra i tilingis sur mot, ra i dat tomo tar a taro nam o God.

²¹Tama i! A laman o naro ra in pitar tar iau torom a kum ebar, kuri mir rarakon tomo una kabulu na inangon.

²²A lingmulus ut ra a Nutun a Musano in mat elar nam o God i sa kubus tari. Ikut in laulau sakit torom a musano ra in pitar tari torom a kum ebar.”

²³Ra det ting etetalai det lena, “Osi mo tagun dat in pam a utna ri?”

²⁴Det engaras sur osi na pasandet din watungi lena, i labo taun det.

²⁵Ra o Iesu i watungi tandet lena, “A kum king anun a taro ra awu sur a taro Juda, det kuro laulau det, ma anundet a kum mugumugu det nemi sur din watung det a kum wakak na tene warut.

²⁶Ikut torom mot ken lenra. Osi ra i labo taun mot in elar kut nami ra i natino, ma osi ra i mugumugu in elar kut nama tultul.

²⁷Osi ra i labo? O naro ra i kis una inangon, o, o naro ra i ser taromlu i? I ut ra i kis una inangon, niko? Ikut iau, a kis epotor tamot elar nami ra i ser taromlu.

²⁸“Mot, mot tur tomo nam iau una kum mamaut ra i wanpat torom iau.

²⁹Ma an pitar tar a kinkinis na king tamot elar nam o Tita i sa pitar tari tang,

³⁰sur mot in nangon ma mot in inum una nung a kabulu una nung a matanitu. Ma mot in kis una kum kiskis na king, ra mot in warkurai sur a noino ma aru kabotaro Israel.”

³¹O Iesu i watungi lena, “Saimon, Saimon, tama i, o Satan i sa sasaring pas sur in lar mot, elar nama tene minarut ra i lakro susuaro a wit mulus gusun a pinino.

³²Ikut a sa wararing taru sur ui, Saimon, sur gong anum a nurnur i puku. Ra u sa nukpukus melet, un udekdek a kum tistisim.”

³³O Pita i watungi tano lena, “Labino, a sa waninar taru, sur an nan tomo nam ui una karabus, ma una minat.”

³⁴Ma o Iesu i balu i lena, “Pita, a watungi tam, uniri a kereke ken kurkurirakuk utmakai, ra un ipul a tulu dino lena, ko tasman iau.”

³⁵Numur o Iesu i ting anun a kum nat na ususer lena, “Ra a tulu ru mot, ma katu paus na umubek mani anumot, o tu rat, o tu su, pepetlai, mot sibo ut sur tu utna?” Ra det balu i lena, “Awu.”

³⁶Ra o Iesu i watungi tandet lena, “Ikut uniri, osi ra anunu tu paus na umubek mani, i wakak sur in losi ut, ma a rat kai. Ma osi ra ka tin totok na inaim, i wakak sur in siuru ru anun a saket sur in kul pas tino.

³⁷A watungi tamot, din pam sot pas a tumtumus ri un iau, ‘Di watung tomo det nama kum tene sakino.’ Uni a kum utna ri di sa tumus tari un iau, milau mo din pam sot pasi.”

³⁸Ra a kum nat na ususer det watungi lena, “Tama i, Labino, arin totok na inaim kuri ut.” Ra o Iesu i balu det lena, “I elar kut.”

³⁹O Iesu i pirso gusun a tamon, ra i wan usapat una Tangai na Oliw, elar ut nami ra i ser pami. Ra a kum nat na ususer det muri.

⁴⁰Ra det wanpat una nubual ra, i watungi tandet lena, “Mot in wararing, sur gong mot puku una ululam.”

⁴¹I wan gisen lilik taru kut gusun det, i kis butkeke, ma i wararing lena,

⁴²“Tita, ra u nemi, un los ru a kap na mamaut ri gusun iau. Ikut gong u mur anung a nemnem, un muri ut anum a nemnem.”

⁴³Ra ara ensel tagisapat una langit i wanpat toromi, ma i udekdek tari.

⁴⁴I taramo a dekdek na tupunuk, ra i dekdek doko nama niaring. Ma a misongot na pinino i elar nama tutu na gap i puku pirso utiro upiso.

⁴⁵I urop a niaring ra i tur, i milet melet torom a kum nat na ususer, ra i tama det ra det sa inep dumun, uni a pinindet i tungulu nama tupunuk.

⁴⁶Ra i watungi tandet lena, “Ilai ra mot inep dumun kut? Mot in katutur, ma mot in wararing, sur gong mot puku una ululam.”

⁴⁷Ra o Iesu i wasiso utmakai, a labino kunur na taro det wanpat. Ra o Judas, ara tagun a noino ma aru nat na ususer, i mugu pas det. I wan torom o Iesu sur in gom a pangpagor na wano.

⁴⁸Ra o Iesu i tingi lena, “Judas, pepetlai, un pitar tari mo a Nutun a Musano torom a kum ebar, nama egom?”

⁴⁹Det ra det wan tomo nam o Iesu det tasman asau ra in nanpat, ra det tingi lena, “Labino, pepetlai, met in waim nama numet a kum totok na inaim?”

⁵⁰Ma ara tagun det i tau kutus ru in nosot na talngan a tultul anun a mugumugu na tene etabor torom o God.

⁵¹Ra o Iesu i turbati lena, “Gong!” Ra i pam in talngan a tultul, ma in talngano i wakak melet.

⁵²O Iesu i wasiso torom a kum lamlabino tene etabor torom o God, ma a kum mugumugu anun a kum tene tamtamabat tagun a rumu na etabor, ma a kum mugumugu anun a taro ra det wanpat suri. I watungi lena, “Pepetlai, kutiro iau a tene inaim ma a tene wolong, sur i mo ri mot wanpat nama kum totok na inaim ma a kum nalnal sur iau?

⁵³Una kum bung rop dat ser kis tomo ubalan in noworo ina rumu na etabor ma ka mot pam ukai iau. Ikut uniri anumot a du bung, ra a dekdekin a dumirum i mugu mot.”

⁵⁴Det pam ukai pas o Iesu, ra det ben gisen ru i. Det beni utiro una rumu anun a mugumugu na tene etabor torom o God. Ra o Pita i mur nanan o Iesu, ikut i bakbak ut gusuni.

⁵⁵Ra det sa tagol tar a sungun nago utamon, ma det kis tomo, o Pita kai det ut.

⁵⁶Ara toraro, a tultul, i tama pasi ra i kis taru una talapor ina sungun, ra i nas dekdeki, ma i watungi lena, “A musano ri, i ser wan tomo utkai nam o Iesu.”

⁵⁷Ikut o Pita i ipul lena, “Le, ka tasman o Iesu.”

⁵⁸Numur lilik kut, ara bulung i tama pas o Pita ra i watungi lena, “Ui kai tagun det.” Ra o Pita i balu i lena, “Le, iau awu.”

⁵⁹Numur lilik melet, ara bulung i ngongos lena, “A lingmulus ut, a musano ri i ser wan tomo utkai nam o Iesu, uni i a te Galili.”

⁶⁰O Pita i balu i lena, “Le, ka tasman asau ra u wasiso uni.” Ra i wasiso utmakai, uniutra a kereke i kurkurirakuk mut.

⁶¹A Labino i tupukus, i tamtama tokodos torom o Pita, ra o Pita i nuk pas a wasiso anun a Labino ra i sa watung tari tano lena, “Uniri, a kereke ken kurkurirakuk utmakai, ra un ipul a tulu dino lena, ko tasman iau.”

⁶²Ra i pirso gusun a nubual ra, ma i tangis dokodoko i.

⁶³Det ra det tamtamabat o Iesu, det urongon laulau uni, ma det mirasi.

⁶⁴Det pulus bat pas arin matano, ma det watungi tano lena, “Ui a poropet, un inanos met. Osi ra i takalo ui?”

⁶⁵Ma det mang sakosako i nama susut na wasiso utkai.

⁶⁶Ra i waspi, a kum mugumugu anun a taro, a kum lamlabino tene etabor torom o God, ma a kum tene ususer tagun a Warkurai det wan tomo. Ma di ben pas o Iesu torom det una nundet a kiwung, ma det watungi tano lena,

⁶⁷“Ra ui a Karisito, un inanos met.” Ra o Iesu i balu det lena, “Ra an inanos mot, ka mot in nurnur una nung a wasiso.