Luk 22:6-28

⁶Pwen pe Yutas isomwi nongnahu, pe iya iro ten sehe sai hiyan para kiratuni Yesu kiya nimahu, kiro mwonen hu ndramat soyon konto pwi.

⁷Pwen pe Lang Para Ndrinanohun Mepo Yis Aliy Pwi irayah; lang ara, ara andre hu katingundru noru sipsip para Pasopa.

⁸Pwen pe Yesu ipwandrisa Pita hilu Yohanes pe ipwai iya kili hilu, ipa, “Alkaya pe alkamwaniyani anandrinarou para tukayan kiro lenge Pasopa.”

⁹Pwen hilsok yiy, hilpa, “Wou anamiliy para youlu kaya pe karamwaniyaniy kiro hape aleheh?”

¹⁰Pwen isomwi hilu, ipa, “Kapa walu kaya nondriya kol namandran ara, andre ndramat hamou kiro sap kohoyonga ndran kipohonani walu. Pwen alkoho ndruwan pe alkaya nondriya sehe seu nakisong kaliy.

¹¹Pwen alkapwai kiya kili mbukena seu, alkapa, ‘Ndramat para Hinonou isok toro: “Ndrohonoku mbultere ara ita hape aleheh, mepo andre kunamnam kiyapolo ndramiro hu, kiro mwonen Lang para Pasopa?” ’

¹²Pwen yiy andre kiyingani nondriya seu sahin, hongan namandran, hira nondriya seu paingan. Hu kanmwaniyani melit masih tehe keyau pe pwapwai pwen ita mwoimwoi. Pwen alkamwaniyani menmena Pasopa kiro ariya.”

¹³Pwen hiltali Yesu pe hilyau, pe hilya nime melit masih iro mwonen tehe kinpwai pwen kinna kili hilu. Pwen pe hilu mwaniyani hu melit para Pasopa.

¹⁴Iro mwonen paramwandrai para hu nakanamnam irayah, Yesu iyapolo hu aposel tan huroh huye ngilse keyau.

¹⁵Pwen pe ipwai iya kili hu, ipa, “Yo ara, hingorowo pwokeyan iya para kunamnam anandrina Pasopa aro kiyasura wawu kimu; kihipwen, kuya nondriya nopwaran.

¹⁶Yo upwai isa kili wawu, tehe yo andre kunyan anandrinai para Pasopa paiwe pwi yi, kipoo kirayah mannan kiro kolo King Ngindrai.”

¹⁷Iyamulan Yesu iwiri pweniu pe irawuloh, pe ipa, “Akawiriy pe akatainganiy kiho mwalinga wawu.

¹⁸Yo upwai isa kili wawu tehe andre kunuyin ndrunu mbuwa wain paiwe pwi yi, kipoo lenge kolo King Ngindrai kisarayah.”

¹⁹Pwen iwiri ndrinanohun hayah pe irawuloh iya aliy, pe iramburingiy, pe iykiy iya kili hu, pe ipwai iya kili hu, ipa, “Iye ara nombuwe, uikiy isa kili wawu; akambusiy tehen aliy, para akorolohongani yo.”

²⁰Tehen aliy opu, hunamnam ihipwen, iyamulan iwiri pweniu pe ipwai iya kili hu, ipa, “Pweniu iye, ara pweniu para tapaniu howen, mepo iyau ndreye, pe utilingiy imuw para kisopwat wawu.

²¹Hapeko akanimei, nima hiyeh mepo nakiratuni yo kiya nima hu hiyeh humwisnani yo, ara iripo ndrahaso kili keyau.

²²Noru Ndramat, ara andre kiho ndruwa lohongai tehe Ngindrai kinpwai, Hapeko toimwa sehe ndramat mepo andre kiratuni yiy; yiy ara andre kikuni koran.”

²³Pwen ndramiran hu huro sok mwalinga hu mbukenahu, tehe hiyeh tahu andre kimbusiy tehen tora.

²⁴Pwen pe hu ndramira Yesu, ara huro pepet mwalingahu tehe hiyeh tahu imwonen, ara yirowan tehe ihohin tahu.

²⁵Pwen Yesu ipwai iya kili hu, ipa, “Hu king ta hu Ndramira Lah, ara huhohin pe hurayah poh tahu; pe yihu mepo hurayah poh tahu, ara hupohowe hu mbukenahu, tehe hu ndramat hiyan para ponokule.

²⁶Hapeko wawu mbuna akambusiy tehen tora. Yiy mepo ihohin ita mwalinga wawu, ara kirayah tehe kopwan. Pe hiyeh mepo ihohin, ara kirayah tehe ndramat para pwandrendres.

²⁷Pe hiyeh ndrokonan ara ihohin: yiy mepo impo keyau, ndre yiy hiyeh para pwandrendres mepo itara anandrinai? Tana wawu, tehe ara yiy mepo iripompwan keyau, ndre? Hapeko yo ara urupo mwalinga wawu tehe ndramat para pwandrendres.

²⁸Wawu, ara wawu ro sura yo, iro lenge hu nohonou mepo uro nondriyan, pe wawu kantali yo pwi.