Luk 22:35-58

³⁵Baing Yesu xusungadi ba, “Waleu bungina ngasoxiang mala, axola mana tanga sianggam, tanga xaung xai sanggandi, bing araxap mana axamang tela kimbo tegu?” Dahaxuya ba, “Tegu.”

³⁶Harua nadi ba, “Ne hatata, gaxarea ung tangam sianggam kimbo tangam, bing oxop mala. Gaxarea oxola mana waxang sabanga bing usina imangima bu ugim tela,

³⁷namua na dibung Urana Xuania ba, ‘Baing dimogu ina lipu dian tela.’ Baing ngabalang ba haruanga li bagula sok maxuna manga. Maxung sibuna, baraxinta dibung mari manga, aningonoa sok maxunauba.”

³⁸Lipudi dinaxu mana daharua ba, “Toxoratamona, ubagu, waxang sabanga luwadi li.” Baing harua ba, “Sanga lo.”

³⁹Yesu ila sangua saing haing Xaxagania Olip, bila ina kubolunoa ba. Baing lipuxindi dinaxu mana dila xauna.

⁴⁰Disok saing harua nadi ba, “Asabu, nam tubaiga xapkang.”

⁴¹Sauyadi saing ila monga, bila lipua ting sianga mala, gung king tuxundi saing sabu ba,

⁴²“Tibugu, nabu ung murungama, bing unia xuba salakkamga li mala sangua nga. Ne heku usu mana murungagua, ne usu mana ung murungama.”

⁴³Baing Urana uleginam tela ri long xaiya ma, owa masok mana, saing haringia.

⁴⁴Gamonoa mauxang sibuna, binabu sabu haringing sibuna, saing salaksalaginoa sok bila sip marandi saing diri titia.

⁴⁵Sabu masup saing mesa goxoya ma rangua lipuxindi dinaxu mana, bagudi dikinu matabu, haringingading disup namua na ayangading buk.

⁴⁶Xusungadi ba, “Akinu baru? Amesa asabu, nam tubaiga xapkang.”

⁴⁷Yesu haruauyu, baing buranga tela sok, saing lipua duxu ba Yudas, ina mana Lipu 12 tela, muga manadi. Ma haxek rangua Yesu bu libu,

⁴⁸ne Yesu xusunga ba, “Yudas, uraxata ulibu Lipua Ma Rangua Urana bu usina mala bixuandi rimadingia?”

⁴⁹Bungina lipuadi dinaxu mana Yesu dibagu baraxinta bo ba sokkuba, duxusunga ba, “Toxoratamona, am gating waxangimam sabangadi manadi?”

⁵⁰Baing dingia tela ting waxanginoa mana lipu hananiangam mugamugangama lipuxing oxata olanggama, saing taxiti tangangliang rimamo.

⁵¹Ne Yesu harua ba, “Asauya!” Baing ring lipua tanganglianoa saing sok xai muli.

⁵²Baing Yesu harua na lipu hananiangamdi yanamidingdi, lipu haungingamdi duwasa mana Urana Numana yanamidingdi, xaung lipu haringindi dima bu dituxu ba, “Ai, ang gama xaung waxang sabangadi xaung xaidi bila nga lipu hanaunggam tela, bo?

⁵³Xaidapxaidapka lo ngawa ranguang, ngatubatuba Urana Numang yabania, ning atuxu nga te. Ne hatata ang xaidabima, xaidaba mana labiang haringinganoa wa etua mana axamandi.”

⁵⁴Kimuya mana dituxu, daxai mala lipu hananiangam mugamugangama numania. Pita su manadi mala, ne wa hasoya monga.

⁵⁵Ning bungina dibura yaba liwe mana numa yabana, dirungguba, baing Pita rung mari ranguadi.

⁵⁶Haing haulingam tela bagu rung mari yabia. Bagu haringina mana saing harua ba, “Lipua li wa rangua Yesu xauna.”

⁵⁷Ne hatiam mana. Harua ba, “Haing, ngaxabia lipua ba teke.”

⁵⁸Mongaita baing lipu tela bagu saing harua ba, “Ung xauna, ung dingia tela.” Ne Pita haxuya ba, “Lipu, nga riadinga te!”