Luk 22:3-47

³Nalö miaŋgöreŋ Satanöŋ Judasgö uruŋe geyök. Judas mi Jisösgö gwarekurupŋi 12 yeŋgöreŋök kun. Kariot mireyök kayöhaŋgöra qetŋi kun Iskariot qetket.

⁴Yaŋön jike nup galöm aka jikegö kiripo galöm bohonŋi yeŋgöreŋ anda Jisös mamalolo memba böröŋine almamgö keuŋi jiyök.

⁵Yeŋön mi möta “Ayop!” jiba uruŋinan ölöwahiga söŋgöröŋi moneŋ waŋgibingö keu jöhöget.

⁶Keu jöhögetka Judasnöŋ Jisös ölöŋ mamalolo memba böröŋine almamgö köna möt jaruba köiŋbiŋgöba malök. Mewö.

⁷Beret yistŋi qahö miaŋgö kendon silim kunöŋ Pasowa lama qeba ohozema. Nalö miaŋön kam kuŋguyök.

⁸Jisösnöŋ Pitö aka Jon kewö jiba melaim etkiyök, “Iŋiri anda Pasowa lama mözözömgöyohotka nembin.”

⁹Mewö jiiga qesim waŋgiyohot, “Mi denikeaŋgöreŋ anda mözözömgöbit?”

¹⁰Qesim waŋgiyohotka kewö meleŋnök, “Mörohot! Iŋiri sitinöŋ aŋgorohotka azi kun o kimbut kunduta kaiga miwikŋaimahot. Miwikŋaiba i wuataŋgöba anda mire öŋgömawi, miaŋgöreŋ öŋgömahot.

¹¹Öŋgöba miri toŋi kewö jiyohot mötma, ‘Böhinöŋ göhöra jiza: Ala mirigi denike? Neŋön ölöp miaŋgö uruŋe kaba gwarekurupni yembuk Pasowa lama nembin?’

¹²Mewö jiyohotka möta miri qakŋe eu öŋgöba uruŋi ketaŋi kun kondel etkima. Miaŋgöreŋ dum tatat yuai mözözömgöget ahöza. Mi kondel etkiiga miaŋgöreŋ lama qeba ohomahot.”

¹³Mewö jii anda Jisösnöŋ keu jiyöhi, miaŋgö dop miwikŋaiba kinda lama qeba ohom mözözömgöyohot. Mewö.

¹⁴Nene nalöŋan kaiga Jisösnöŋ aposolurupŋi yembuk nene nembingö eta tatket.

¹⁵Tatketka kewö jii mötket, “Nöŋön Pasowa lama ki embuk nembingö gwötpuk ak niŋgiba malök. Nene ki nembagun mönö sihimbölö mötmam. Miaŋgö nalöŋan töriza.

¹⁶Mi törizawaŋgöra kewö jibi mötket: Nöŋön Pasowa lama kiaŋgöreŋ kun toroqeba qahö nemam. Könaŋgep nene semön kiaŋgö ölŋan aukŋe asuhumawi, mi Anutugöreŋ bemtohoŋ uruŋe euyaŋgöreŋ nemam.”

¹⁷Mewö jiba wain qambi memba kötuetköba kewö jiyök, “Mönö ki memba nanŋinak aŋguba neme.

¹⁸Nöŋön kewö jibi mötket: Ni wain kösögö ölŋi kiaŋgöreŋ kunbuk toroqeba qahö nemam. Kunbuk nemami, mi Anutugöreŋ bemtohoŋ asuhum teköiga miaŋgöreŋ nemam.”

¹⁹Mewö jiba beret memba kötuetköba mindipköba eŋgiba kewö jiyök, “Ki nani busuni. Ki eŋgöra aka tököm eŋgizal. Nemba ni mötmörim niŋgiba malme.”

²⁰Mi eŋgii negetka mewöŋanök wain qambi memba kewö jiyök, “Qambi ki mi jöhöjöhö areŋ dölökŋi akza. Nöŋön amöt qem eŋgimamgöra aka sepni mokoba kömumam. Sep miaŋön mönö Anutugöreŋ jöhöjöhö areŋi mem köhöima.

²¹“Mewö akzapmö, mötket, mamalolo mem niŋgimawaŋön mönö mohotŋe ki nene nemba tatzit.

²²Ölŋa, Anutunöŋ jim kutuyöhi, Suep gölmegö azi ölŋan mönö miaŋgö dop gölme mosöta anma. Anmapmö, mamalolo mem waŋgimawi, yaŋgöra mönö wölziköba ‘Yei!’ jizal. Anutunöŋ mönö likepŋi öŋgöŋgöŋi meleŋ waŋgima.”

²³Mewö jiiga gwarekurupŋan könahiba sutŋine eraum qesim aŋguba jiget, “Neŋgöreŋök mönö daŋön mamalolo mem waŋgibawak?” Mewö.

²⁴“Gwarek neŋgöreŋök galöm bohonŋi mi daŋön akza?” mewö jigetka miaŋgöra mewöyök sutŋine goranora asuhuyök.

²⁵Mi asuhuiga Jisösnöŋ kewö jii mötket, “Gölmegö kantriŋi kantriŋi mieŋgö kiŋinan mönö azi kembu tandök aka galöm köl eŋgimakze. Yeŋgö pom jembonŋinan mönö keu jim kutuba könagesöŋini mindiŋgöm eŋgigetka welenŋini qeba ‘Azi ölöpŋi!’ jiba möpöseim eŋgimakze.

²⁶Mewö ahakzemö, eŋön miaŋgö dop kude akŋe. Eŋgö sutŋine kunŋan ketaŋamŋini akzawaŋön mönö eretŋaŋgö dop aka malma. Galöm bohonŋan mönö welenqeqe ewö aka malma.

²⁷“Kunöŋ tata nene neiga kunŋan nene köl waŋgiba anda kamakzawi, yetköreŋök öŋgöŋgöŋi mi daŋön? Ölŋa, ‘Tata nene nezawaŋön mönö öŋgöŋgöŋi akza.’ Mewö jiget mörakzinmö, nöŋön eŋgö sutŋine welenqeqe ewö aka maljal.

²⁸“Mewö malbi esapköm niŋgigetka wahöjaliŋ wahösömbu uruŋe aŋgotpiga iŋini töndup kapaŋ köla nömbuk qekötahöba mala kotze.

²⁹Iwinan jim kutum niŋgiiga nöŋön yaŋgö bemtohoŋi kukösum qakŋe galöm kölakzal. Miaŋgöra nöŋön toroqeba jim kutum eŋgibiga iŋini mewöyök kukösum qakŋe ambazip kiŋ ewö galöm köl eŋgimakŋe.

³⁰Miaŋgöra iŋini ölöp nöŋgö bemtohoŋne aŋgota nene dumni liliköba tata o aka nene nemba malme aka azi kembu tatatnöŋ tata Israel ambazip kambu 12 yeŋgö keuŋini kewöta jim teköm eŋgime.” Mewö.

³¹Jisösnöŋ jiyök, “O Saimon Saimon! Mötnöŋ! Kölkömöt azinöŋ wit padi kötŋi joutnöŋ ala uturuköiga kamböŋi deŋda erakzawi, Satanöŋ mönö miaŋgö dop eŋön löwöriba yaŋgö böröŋe gemegöra uturuköba esapesap al eŋgimamgö kapaŋ köla jöjöröza.

³²Jöjörözapmö, göhö mötnaripkan sörauba pömsöm qebapuköra nöŋön göhöra köuluköba malal. Miaŋgöra nalö kungen urugi meleŋda nöŋgöreŋ kamani, miaŋgöreŋ mönö mötnarip alaurupki naŋgöba mem köhöim eŋgiman.”

³³Mewö jiiga Saimonöŋ meleŋnök, “Kembu, nöŋön göbuk kösö mire anbitkö aka mohotŋe kömumbitkö jöjöröba maljal.”

³⁴Mewö jiyökmö, Jisösnöŋ jii mörök, “Pitö, nöŋön kewö jibi mötnöŋ: Kuruknöŋ merak qahö qeriga göŋön mutuk ni möt niŋgimamgö qaŋ kölnöŋga indimŋi karöbut akŋa.

³⁵Jisösnöŋ gwarekurupŋi kewö qesim eŋgiyök, “Nöŋön iŋini mutuk gösö qahö, moneŋ gösö qahö, köna esu qahö mewö melaim eŋgibi angeri, miaŋgöreŋ yuai kungöra osiget me qahö?” Qesim eŋgiiga “Yuai kungöra qahö osiin,” jiget.

³⁶Jigetka kewö toroqeba jiyök, “Mutuk mewö aketmö, nalö kewöŋe kungöreŋ gösö aka moneŋ gösö tuŋi ahözawi, mi ölöp memba teŋgöba malma. Bimgö sou ketaŋi mi kungöreŋ qahö ahöza, yaŋön mönö malukuŋi bohonŋi memegöra ala moneŋ miwikŋaiba sou mi bohonŋi mema.

³⁷Nöŋön miaŋgöra kewö jibi mötket: Anutugö keu nöŋgöra jigeri, mi körek pakpak köhöim teköma. Miaŋgö nalöŋan mönö kam kuŋgumamgö akza. Buŋa keu kun kewö ohoget ahöza, ‘Yaŋön bölöŋi meme yeŋgö kambuŋine ahöma, jiget.’ Miaŋgöra jizal: Keu miaŋgö ölŋi mi nöŋgöreŋ asuhum teköma.”

³⁸Mewö jiiga gwarekurupŋan jiget, “Kembu eknöŋ, bimgö sou ketaŋi yahöt ki ahözahot.” Mewö jigetka “Mi dop kölja,” jiba meleŋ eŋgiyök. Mewö.

³⁹Jisösnöŋ miri mosöta silikŋi wuataŋgöba Oil ip kunduŋe öŋgöiga gwarekurupŋan andöŋe anget.

⁴⁰Öŋgöba miaŋgöreŋ aŋgota kewö jii mötket, “Esapesapnöŋ et eŋgubapuköra mönö köuluk nup meme.”

⁴¹Mewö jiba eŋgömosöta köt gilin anakzawi, miaŋgö dop anda simin köla köuluköyök

⁴²Köuluköba kewö jiyök, “Iwini, göŋön urusihimgi mötzan ewö, sihimbölögö qambiŋi kiaŋön mönö nöŋgö qakne öŋgöbapuköra noaŋgitman. Noaŋgitman me qahö, mi mönö nangi jit keugahö dop asuhuma. Mi nöŋgö sihimgö dop qahö.”

⁴³Mewö köuluköiga garata kunŋan Suepnöhök asuhuba mem köhöim waŋgiyök.

⁴⁴Mem köhöim waŋgiiga köŋjiliŋ öŋgöŋgöŋi möta mönö kapaŋ köla uruŋi qezaköba köuluköyök. Köuluköiga nöŋgöpŋi mi sep jöjöl ewö tiŋgita gölmenöŋ etket.

⁴⁵Köuluköm teköba wahöta gwarekurupŋi yeŋgöreŋ anök. Anda miwikŋaiba eŋgehi wösöbiriknöŋ mem et eŋgii sörörauba gaun ahöget.

⁴⁶Ahögetka jiyök, “Mönö wuanöŋgöra gaunök ahöze? Mönö wahöta esapesapnöŋ et eŋgubapuköra köuluköget.” Mewö.

⁴⁷Jisösnöŋ mewö jiba kiniga miaŋgöreŋ azi kambu kaŋgotket. Gwarekurupŋi 12 yeŋgöreŋök kun qetŋi Judas yaŋön jitŋemem eŋgiba Jisösgöreŋ kaŋgota numbuŋi yöhötim neyök.