Luk 21:24-33

²⁴En avong ten vaeen, isal vini tei en keil imat hetal min naef keil, ka teimun en keil ipar kat keil ka ilamun keil iha en hen asuv keil ten kantri sav. Ka Ahi hemaen taon ten out Serusalem min koakeil arvitei Siu keke ito eni ka ipuruni hetokol avong koa Ahi hehiteni keke avong one vinvin.

²⁵“Tounah keil hehi houlu hekur out en meteiai, en avati, ka en hitu keil emun. Sakini, en out netan, hesakin mari tahe keil imea ka imavul kat out ut en kantri keil houlu. Navong meatin keil ilesi, ilanglango en demkoen ka iat lohe en metauen.

²⁶Navong meatin vasi keil iles tounah keil ekek mul mai en out netan ka iles tounah vasi keil ten teilang mul viles, houlu en keil, mete hemalikelik ven metauen.

²⁷Ka navong keil iseipat hehina nesa, iles ‘Natin Meatin hel hemita en mahmah keil ten out nesa’ hetal min keihoen ka mari muohien onen.

²⁸Navong tounah keil ekek hekur out, mihelomal hekeih ka mihehati lat vatumi hehina nesa veni Ahi vesesal vamai keke voutut moulien onen meatin keil onen.”

²⁹Evus, Iesu viten tatavolien koanik min meatin keil onen vit, “Mihendem vis vati fik keil hetal min vatiai sav keil emun.

³⁰Navong aling oute keil one, mikilea keke avong ten romrom vesesal ke.

³¹Ka en vati sise ekek emun, navong miles mahien keil ten avong ekor keil mul kistal, miheilea keke avong Ahi hemai houmon hiasuvien onen hel en out netan vesesal ke.

³²“Naviteni anatin min kami, meatin keil etin koa amoul kosa iles mahien keil ekek hekistal en taon ten out Serusalem.

³³Out nesa ka out netan luhevus, ka selusien keil onak sakras vavuol en avong etai.”