Luk 1:12-52

¹²Di kite Sakaraya i kasaligan, taknal kenen na likò.

¹³Bay man i kasaligan di kenen, “Sakaraya, nang ge likò du ta linge Dwata i dasalam. Na i yaanam, dunan Ilisabét, mngà kenen lagi na yé dagitam dun Dyan.

¹⁴Na too bong klehewyu di ksutan, na i dademe dad to, lê ale magin flehew di gamu,

¹⁵du mgimò kenen mdatah di kanfe Dwata. Na là fakay kenen minum i dad gamflangal. Bay di laman fa là sut, yé mebe kenen dunan i Mtiu Tulus.

¹⁶Na di ktulenan i Tnalù i Dwata, nun dee bel Israél geben samfulê di kaftoola di Amu, dunan i Dwatala.

¹⁷Na Dyan i muna di Amu fan kel. Na salngad i gnagan blé i Tulus Dwata di kenen di gnagan gablé di satu tugad i Dwata di muna, dunan Ilaydya. Na sanfyen i smà na sngà, na i dad to là mimen di Dwata, neben ale di tluh dalan du fye fulung ale faldam gambet i dad to tluh. Yé nimò Dyan kadang du falan fatlagad i fandam i dad to di kakel i Amu.”

¹⁸Bay smalek Sakaraya na manan, “Dét i ilègu dun, na glut i manam, du ta tua gami yaan-gu na landè kibòan mngà?”

¹⁹Na tmimel i kasaligan, manan, “Do sa Gabriél, i satu snalig Dwata gal tadag di kanfen. Yé duenam man, dekan agu salu dini du fye fgadègu di ge i fye tulen ani.

²⁰Bay ge, Sakaraya, du là fantoom i tulenta ge ani, mdà ani baling ge umu. Silang ge gtalù ku ta kel i du kagdohò i man-gu gine. Na i tulenta ge gine, gdohò kadang di satu du ku ta bangan kel.”

²¹Na i dad to di lwà, sana kfatanla ku Sakaraya na tikeng ale du too kenen mlo di lam i Bong Gumnè Gumangamfù di Dwata.

²²Na kanto lamwà Sakaraya, ta là gtalùan. Na gadèla ta nun fite Dwata kenen di lam i Bong Gumnè ayé du sigi kenen sminyas du ta là gtalùan.

²³Na kanto fnge Sakaraya i nimòan di Bong Gumnè Gumangamfù di Dwata, ta mulê kenen.

²⁴Na di là mlo kafnge ayé, ta mlalu i yaanan, dunan Ilisabét, na lime bulen klon fanak di lam gumnèla.

²⁵Na man Ilisabét, “Yé duen Dwata mimò ani du kandon agu. Ta nwèan i gamlé do kyà di kanfe i dad to.”

²⁶Kanto nam bulen i tien Ilisabét, ta lê dek Dwata Gabriél salu di Nasarét, i satu lunsud glam di probinsya Galili.

²⁷Yé gusalun di satu sawang libun dnagit Méri, i yaan to Dyosip, satu bel Harì Dabid.

²⁸Na kanto kel Gabriél di ku Méri, manan di kenen, “Flehew ge. Too kando Dwata ge na kenen i magin ge.”

²⁹Bay kaklinge Méri i man i kasaligan, too msamuk i nawan na toon fandam ku dét gumtatek i manan.

³⁰Bay man i kasaligan di kenen, “Méri, nang ge likò du banlé Dwata ge kafye.

³¹Tadè ge maltien, na lagi i ngàam, na yé dagitam dun Dyisas.

³²Too kenen mdatah na tlo kenen Ngà i Too Mdatah Dwata. Na i Amuto Dwata mlé kenen glal magot i kdee salngad di kagot i gutambulan, Harì Dabid.

³³Na neben kel di landè sen i dad bel Dyékob na landè gusen i kagotan.”

³⁴Bay smalek Méri, manan, “Dét i kibògu mngà ani du sawang libun agu fa?”

³⁵Na tnimel i kasaligan kenen, manan, “Salu i Mtiu Tulus di ge du fite Dwata di ge i kgaganan. Na yé duenam man, i ngà ayé, too kenen mtiu du landè salàan na yé katlo kenen Ngà i Dwata.

³⁶Na fandamam i satu flanekam Ilisabét, manla là mngàan na ta tua, bay ta maltien. Ta nam bulen i tienan.

³⁷Du landè ti là gnagan Dwata.”

³⁸Na man Méri, “Fasak agu i Dwata. Mulà moon mkel di do i kdee manam ayé.” Na kafnge ayé, ta tnagak i kasaligan kenen.

³⁹Di là mlo, ftifas Méri klon mdà du sagwê kenen salu di satu lunsud di dad bulul di probinsya Dyudiya.

⁴⁰Na fusuk kenen di gumnè Sakaraya, du stulen ale Ilisabét.

⁴¹Na kanto linge Ilisabét i talù Méri, lamyak i ngà di lam tienan na fnò Ilisabét i Mtiu Tulus.

⁴²Na falbongan i talùan, manan, “Di kdee dad libun, ge i gumlé Dwata too bong kafye. Na lê banlé Dwata kafye i Ngà lantienam.

⁴³Sawe là gtenan ku yé lmauy do yê i Amugu.

⁴⁴Kantogu linge i talùam gine, ta lamyak i ngà di lam tien-gu du mdà di klehewan.

⁴⁵Banlé Dwata ge kafye du fantoom i ta fgadèan di ge.”

⁴⁶Na talù Méri, manan, “Toogu dnayen i Amugu Dwata mdà di nawagu,

⁴⁷na too bong klehewgu mdà di Dwata, i Falwà do,

⁴⁸du balù ku logu fasak na too agu mdanà, bay gafaldaman agu. Na yé duenam man mdà ani, yé man i kdee dad to gablà di do na do i gumlé Dwata too bong kafye

⁴⁹du too bong mgimòan di do. Too maltulus i Dwata na too kenen tluh.

⁵⁰Mdà di kagatbùan kel di gusenan, toon fite i kakdon di dad to mafè kenen.

⁵¹Ta gfiten i bong mgimòan fagu di kaltulusan. Na i dad to fdatah i ktola, ta snamukan i fandamla.

⁵²I dad mdatah to nun glal, fdanàan ale, bay fdatahan i dad to mdanà.