Luk 19:17-35

¹⁷Na talù i harì, manan, ‘Too fye nimòam. Too ge fye fasak. Du gsalig ge di tukay nimò, yé duenam man fagotta ge sfalò syudad.’

¹⁸Na lê kel i satu, manan, ‘Amu, i mlatuh fagotam do, ta mngà lime latuh.’

¹⁹Na talù i harì, manan, ‘Fagotta ge lime syudad.’

²⁰Na lê nun kel déé, manan, ‘Amu, ani i mlatuh filak fagotam do. Ta fnungasgu masala du busekgu.

²¹Likò agu di ge du too ge labè. Galam nwè i ise ge nfun, na kantum i ise ge fele.’

²²Na lê talù i harì, manan, ‘Falnayamta ge mdà di dad talùam du too ge sasè fasak. Gadèam na too agu labè, na galgu nwè i ise do nfun, na kantugu i ise do fele.

²³Na kan ku là fngàam i filakgu di bangku du fye di kulêgu, di kwègu i filak ayé, nun ngàan.’

²⁴Na lê kenen talù di dad to di safédan, manan, ‘Nwèam i filak di fasak ayé na lêam blé di to magot mlibu.’

²⁵Bay talù i dad to ayé, manla, ‘Amu, ta mlibu sa i filakan.’

²⁶Bay tmimel i amula, manan, ‘Tulenta gamu i kaglutan na ku simto gsalig magot i ta blé di kenen, lê tananù i fagot dun. Bay ku simto là gsalig magot i tukay, balù i too tukay déé di kenen, lê nawì.

²⁷Na i dad to muteh do nawa, dunan i là mayè ku mgimò agu harì, nebeyu ale dini na fnatiyu ale di kanfegu.’ ”

²⁸Kafnge Dyisas man ayé gine, ta muna kenen fles salu ditù di Dyérusalém.

²⁹Na kanto ale mdadong di dad malnak banwe Bétfagi na Bétani di Bulul Olib, dekan muna i lwe to galan tdò, manan,

³⁰“Fles gamu di tukay banwe gsen munayu, na ku ta kel gamu ditù, nun teenyu ngà dongki là fa lmen snakay batang déé. Ntehyu na nebeyu dini.

³¹Na ku nun to smalek gamu, na manan, ‘Kan ku ntehyu i ngà dongki ayé?’ ani manyu di kenen, ‘Nun gukmamu i Amu dun.’ ”

³²I dad to dekan ayé, ta mdà ale, na i kdee teenla too ti salngad di ta falan man dale.

³³Na lamla mteh dun, snalek i funan ale, manan, “Kan ku ntehyu i ngà dongki ayé?”

³⁴Na tmimel ale, manla, “Nun gukmamu i Amu dun.”

³⁵Na kafnge ayé, nebela i dongki ayé di ku Dyisas, na yé afidla dun i dademe dad klawehla, na fsakayla Dyisas.