Luk 18:26-38

²⁶Djika yene kogoye una embe dji, ni djinden ge, God nono i yem naworda mal mormon we dji.

²⁷Jisas embe dji, una mor ge wal yene kune nayendo mal ge, God yenda kune yendo we dji.

²⁸Djika Pita embe dji, no nonekene numbine gullne kere, er ni boll wopin we dji.

²⁹Jisas embe dji, na kandja kaima dje ye aundo, una porapora God dumoye wopake kantau yendo al kogo ge yembon dje pille, yenekne numbine gullne kere, gamane wombane kere, agane mo, nanemane ne, kambono ge keri dal,

³⁰ga makimb al moye kune ge God wal merkeke plato awo yem woro aunda. Alla, ege are wonda ge une yewordaka gun molo pamoye we dji.

³¹Jisas kogoye una 12 pela dje i djell woro embe dji, ye pillme! Asa propet kambono kandja porapora pepa bolo Una Wombe togoye we dji mal ge, nono er Jerusalem bonka ge kaima panda.

³²Una yemolo Una Wombe i epil djell una auneke, kambono bakalo awo, ye ke ye awo, kungo to,

³³ka pirngangill to kere ipo togoye. Ege sokara erwo pundaka, une aglo erwo gun punda we dji.

³⁴Jisas kandja embe dji ba, kogoye una pillpol natoi. Une kandja embe dji ge seke pai, pille ine napai.

³⁵Jisas er dumo Jeriko manda puno dje yeika, una ta nale emill yei iwa kondwe djeke ami dje molo wal kokane dje moi.

³⁶Una merke wo pumaka une pille embe dji, namba yei pille ye una merke wor po mor ne? dji.

³⁷Una embe dji, dumo Nasaret iwa Jisas ge wo pundo we dji.

³⁸Djimaka une yau to embe dji, Jisas, iwa Depit wariye wonden ge, ni na wandill golo awe! dji.