Luk 12:9-47

⁹Mewömö, kunŋan ni ambazip jeŋine qaŋ köl niŋgimawi, nöŋön mönö mewöŋanök i Anutugö garataurup yeŋgö jeŋine qaŋ kölmam.

¹⁰“Kunŋan Suep gölmegö azi ölŋi qetala keu jimawi, Anutunöŋ mi ölöp mosötmapmö, kunŋan Uŋa Töröŋi ilita mepaqepaik akŋawi, yaŋgö siŋgisöndokŋi mi Anutunöŋ qahö mosötma.

¹¹“Ambazipnöŋ iŋini öröba keu jakeŋine al eŋgigetka köuluk miriŋine me kiap premiö aka kantriŋi kantriŋi mieŋgö kiŋ kembu yeŋgö jemesoholŋine kinmei, nalö miaŋgöreŋ keuŋinaŋgö likepŋi wani keuya denöwö jibinak miaŋgö waimanjatŋi kude mötme.

¹²Mi kewögöra: Iŋini keu jimei, mi Uŋa Töröŋan aua miaŋgöreŋök kusum eŋgiiga jime.” Mewö.

¹³Ambazip kambu sutŋineyök azi kunŋan Jisösgö jiyök, “Böhi, iwiniran kömuiga gi mönö datnaŋgö jinöŋga iwiniraŋgöreŋ börösamotŋi mendeŋda niŋgima.”

¹⁴Mewö jiyökmö, Jisösnöŋ kewö meleŋ waŋgiyök, “O azi, daŋön etkö jimtekötekö toŋiri akŋamgöra kuŋgum niŋgiyöha gölmeŋiri mendeŋbileŋak?”

¹⁵Mewö jiba keu kewö toroqeyök, “Inap ainemalukuŋinan awamŋanök me keleŋmaleleŋ ahöbawak, malmalŋinaŋgö könaŋi mi miaŋgöreŋ qahö ahöza. Malmalŋini qahö kewöta moneŋ sukinapnöŋ möndöme ewö, mönö ayuhume. Miaŋgöra membagun membingö nepaqepalok (gridi) pakpaköra mönö galömŋini memba malme.”

¹⁶Mewö jiba dopkeu kun kewö jii mötket, “Azi pomŋi kun malök. Yaŋön gölmeŋe nene nupŋi meiga töhötmöriam ketaŋi asuhuyök.

¹⁷Mi asuhuiga uruŋan kewö mötmöriba jiyök, ‘Nöŋgö köwe mirini mi morörökŋi. Miaŋgöra padi gösöŋi gösöŋi, koŋ kambuŋi kambuŋi, sehoŋ böranŋi böranŋi mi mönö denikeaŋgöreŋ tokobileŋak? Mönö denöwö akŋamto?’

¹⁸Mewö jiba jiyök, ‘Mönö kewö akŋam: Ni köwe mirini köndeŋda salupŋe köwe miri ketaŋi ketaŋi memam. Mi memba nene töhötmöriamni aka sukinapni pakpak mönö miaŋgöreŋ qezaköbi tatma.

¹⁹Miaŋgöreŋ tariga nanaŋgöra kewö jimam: O gi simbawoŋ! Töhötmöriamgi mönö awamŋi qahö ahöm gihiza. Miaŋgöra mönö nene nem söŋgaiba yambuŋi yambuŋi siyoŋsayoŋi qahö luhut memba ösöŋ malman.’

²⁰Mewö jiyökmö, Anutunöŋ kewö jii mörök, ‘O gi, urugi qahö! Nöŋön nalögi ala jim teköba uŋagi suŋgem kiaŋgöreŋök goaŋgitpiga kömuman. Kömunöŋga öröyuai pakpak buŋa qem aŋguba malnöŋi, mi mönö dagö buŋaya akŋapto?’

²¹“Kunŋan nanŋaŋgöra ainemaluku guli dötnam yuai tokomakzapmö, Anutugö qöhöröŋe urugö töhötmöriamŋi qahö ahöm waŋgizawi, yaŋgöra mönö lömböt ketaŋi mewö asuhuma.” Mewö.

²²Jisösnöŋ gwarekurupŋi kewö jii mötket, “Mewö asuhumapmö, nöŋön eŋgöra kewö jibi mötket: Iŋini gölmenöŋ malmeaŋgö waimanjatŋi mi kewö jiba kude akŋe: Nini mönö wanat yuainöŋ gumohom aŋgubinak aka wanatnöŋ sileninaŋgö löŋgötpinak?

²³Sileŋinambuk maljei, miaŋön bohonŋi aiga opo kereŋnöŋ mönö miaŋgö nembö bapŋe ahöza. Jeŋinambuk maljei, miaŋön bohonŋi aiga nenenöŋ mönö miaŋgö nembö bapŋe ahöza.

²⁴“Mönö koekoe nei eŋgekŋe: Mieŋön nene kötŋi qahö qesiŋ gilakze. Padi ölŋi qahö yandiba köwe miriŋine qahö tokomakze. Yöha sihiŋini mi qeköm nembi mirinöŋ qahö alakze aka Anutunöŋ mi töndup i gumohom eŋgimakza. Ambazip eŋgö söŋgöröŋini mi nei söŋgöröŋini eŋgoŋgita öŋgöba ahöza. Mönö mi mötmöriget anök.

²⁵“Eŋgöreŋök kunŋan waimanjat aka mewö miaŋön gölmenöŋ malmawaŋgö nalöŋi mi sömaŋi mohotkö dop mem toroqema me qahö? Mi qahöpmahöp!

²⁶“Mewö aiga yuai morörökŋi mewö akingö osime ewö, yuai tosatŋi pakpaköra mönö denöwögöra waimanjat akeak?

²⁷Iŋini mönö jariŋ juraŋi aködamunŋinambuk mi eŋgekŋe: Mieŋön opo söröŋinaŋgöra möt qahö loŋgalakze. Nup yuai tosatŋi kun qahö memakze aka mi töndup kewö jibi mötket: Kiŋ Solomonöŋ goul silwöŋi qeraköba malukuŋi asoŋ-bilikbilikŋambuk löŋgöta malökmö, yaŋgö malukuŋi mi kiteŋ soranjiŋgö dop eksihimŋambuk qahö ahöyök.

²⁸“Jariŋ juraŋi töhön mi merak gölmenöŋ kösutnine ahöi uran kölgetka eri gila qezaköba ohoget jema. Mi töndup Anutunöŋ juraŋi mewöŋi kun mi tok ölöpŋanök meŋölömakza. Miaŋgöra yaŋön iŋini mewöyök ölöp esuhum eŋgima. Iŋini jariŋ juraŋi miaŋgö dop qahö akze. Anutunöŋ köyan köl eŋgimamgö mötzawi, sihimŋi miaŋön mönö yuai pakpak eŋgoŋgita öŋgöza. O ambazip, mötnaripŋinan mönö wuanöŋgöra morörökŋi akza?

²⁹“Mewö aiga iŋini mewöyök malmalŋinaŋgöra mötkurumkurum kude akŋe. Mi aka lömböriba kewö jibepuk, ‘Nini mönö wani nene aka wani o nembinak?’ Mewö jiba uruŋini miaŋgöreŋ kude ala urueret aka urukönöpuk miwikŋaibepuk.

³⁰Kantri dop urumeleŋgö kopa yeŋön yuai mewöŋi pakpak buŋa qem aŋgubingö kapaŋ köla urukönöp ahakze. Mi ahakzemö, iŋini nene opo yuaigöra mözöröŋgöba osizei, Iwiŋinan mönö mi möt teköza.

³¹Miaŋgö urukönöp kude akŋemö, mönö Anutugö bemtohoŋnöŋ aŋgotpingö kapaŋ kölme. Uruŋini miaŋgöreŋ alget ahöiga yaŋön mönö galöm köl eŋgiba yuai mewöŋi mi mewöŋanök toroqem eŋgima.” Mewö.

³²“O kambuni morörökŋi, Iwiŋinan bemtohoŋ al eŋgimamgö mötzawaŋgöra mönö keŋgötŋini kude möta malme.

³³Gölmegö moneŋ inapŋi mi kapaŋ köla qeraköbepuk. Miaŋgöra yuai ahöm eŋgizawi, mi mönö söŋgöröŋaŋgö ala moneŋ öröba bahöŋi ambazip wanapŋi kalemŋinaŋgöra eŋgime. Mewö aketka qetbuŋaŋini guli dötnam ewö mi Suep mire ahöba sehiba kude qahöwakŋa. Moneŋ gösöŋini qainŋi kun mi Suep miaŋgöreŋ qahö bölime. Gurem jijilukut aka yoŋgorö meme yeŋön mönö eu öŋgöba yuai mem bölibingö osime.

³⁴“Yuaigöra aködamunŋi memba mötnöŋ öŋgözawi, miaŋön miri kungen ahöiga göŋön mönö urugi mewöyök miaŋgöreŋ qekötahöba malman.” Mewö.

³⁵“Iŋini mönö Anutugö nupŋi membingöra jöjöröba opo söröŋini jöhöm yaköba aködamunŋinambuk kinda uruŋinaŋgö kiwaŋan ohotirigetka jeiga malme.

³⁶Mi kiaŋgö dop: Miri toŋi kun mi ambazip amemegö lömbuaŋnöŋ kaba söŋgaibingöra öröm waŋgigetka anök. Miaŋgöreŋ ani moröurupŋan mire tata liliŋgömapköra jeŋinan yaigep uba ‘Kiŋsiŋ-paŋsaŋ!’ jiba kapaŋ köla mambötze. Mamböta malgetka yaŋön nalö miaŋgöreŋ me miaŋgöreŋ kaŋgota naŋgunöŋ qebawak, yeŋön mönö miaŋgöreŋök naŋgu örögetka kotma. Iŋini mönö morö mieŋgö dop aka jöjöröba malme.

³⁷“Kembunöŋ liliŋgöba kaiga nup memeurupŋi tosatŋan urugwölö malgetka mewö miwikŋaim eŋgimawi, yeŋön mönö simbawoŋ akze. Nöŋön ölŋa kewö jibi mötket: Yaŋön kaŋgota tokom eŋgiba nene dumnöŋ ali tatketka nene gumohom eŋgimamgö jöjöröm aŋguba welen qem eŋgima.

³⁸Yaŋön ömbibiŋe me miri awöraŋgöiga miaŋgöreŋ liliŋgöi tosatŋan urugwölö malgetka miwikŋaim eŋgimawi, yeŋön mönö simbawoŋ akze.

³⁹“Gwölö malbingö keu ki mönö ölöp mötmörime: Suŋgem aiga kegwek azinöŋ wanat nalönöŋ me auanöŋ kamawi, miri toŋan mi mötpawak ewö, yaŋön mönö gwölö mala miriŋi ölöp galöm meiga qesiŋda öŋgömamgö osima.

⁴⁰Iŋini ‘Suep gölmegö azi ölŋan nalö kiaŋgöreŋ qahö kaŋgotma,’ jiba mötmörimei, yaŋön mönö nalö miaŋgöreŋök kaŋgotma. Miaŋgöra iŋini mewöyök jöjöröba malme.” Mewö.

⁴¹Jisösnöŋ keu mewö jii Pitönöŋ qesiyök, “Kembu, gi dopkeu ki mi neŋgöra me ambazip tosatŋi pakpak yeŋgöra mohok jizan?”

⁴²Mewö qesii Kembunöŋ jiyök, “Nup meme ambazip sutŋine daŋön tiŋ kutuba tosatŋi eŋgoŋgitza? Tosatŋan sörörauba nup mosötketka kunŋan mötkutukutu ölöpŋaŋgö qakŋe kapaŋ köla pöndaŋ memakzawi, yaŋön mönö simbawoŋ akza. Miri toŋan ahakmemeŋi kewöta eka kungen anda miriŋaŋgö öröyuaiŋi mi yaŋgö böröŋe ali galöm akŋa. Galöm aka welenqeqeurupŋi jiyöhaŋgö dop köyan köla nalö diŋdiŋe gumohom eŋgimakŋa.

⁴³Mewö köyan köl eŋgiba maliga toŋan liliŋgöba kaba mewö eka mönö simbawoŋ jima.

⁴⁴“Nöŋön keu ölŋi kun kewö jibi mötket: Toŋan simbawoŋ jiba sukinapŋi pakpakö galömŋi kuŋgum waŋgima.

⁴⁵Kuŋgum waŋgimapmö, nup meme okonŋi yaŋön uruŋan mötmöriba kewö jima ewö, ‘Kembunaŋgö kaka nalöŋan mönö köröpŋi ahöza.’ Mewö jiba könahiba nup meme ambazipurupŋi eŋgum ureiba közölömbuaŋ ala söŋgaiba o köhöikŋi nemba uruŋi sohoiga eŋololoŋ silekmalek aka malma.

⁴⁶Mewö mala nalö kunöŋ Kembuŋi kaŋgotmapköra qahö mambötmawi, mönö miaŋgöreŋ kaŋgotma. Nalögöra ikmaok iŋululuŋ mali mönö aua miaŋgöreŋ kaŋgota qeba yaijapaleleŋ mem waŋgiba jim kutuiga qeqetal ambazip ewö könöp sianöŋ geba sihimbölö mötma.

⁴⁷“Nup meme kunŋan Kembuŋaŋgö jitsihitŋi möt yaköyökmö, keu areŋi jiyöhaŋgö dop qahö jöjöröm aŋguba nupŋi memba malöhi, Kembuŋan miaŋgö likepŋi jiiga jöhöba ihileknöŋ ambemŋi gwötpuk qeaköba qeme.