Luk 12:3-52

³Asau ra mot sa watung tari una dumirum, numur din longoro i una waspi, ma asau ra mot wasisik eno taru nami tiro urumu, numur din tur sapat netes una rumu, ma din watung puaso i.

⁴“A watungi tamot a kum paspasang: Gong mot ngaran det ra det um doko i kut a pinindi. Ra det sa pam len tari ra, ka det in pet lar pasi sur det in pam melet tu utna kai.

⁵Ikut an inanos kapo mot un o naro ra mot in ngara suri: Mot in ngara sur o naro ra a dekdekino i labo sur in um doko mot, ma in woro ru mot una labino sungun kai. A lingmulus a watungi tamot, o God kut ra mot in ngara suri.

⁶Di ser kul a limanin nipiko liklik nama nat na mani kut, niko? Ikut o God ken dumano ru tinolik tagun det.

⁷I lingmulus sakit, o God i sa luk rop tar a kum tekteken iwu na lorimot, ma i sa tasman tari. Gong mot ngara, uni mot labo sakit umatan o God taun a susut na piko.

⁸“A watungi tamot, osi ra in watung puaso i umatan a taro lena, i tagun iau, a Nutun a Musano kai in watung puaso i umatan a kum ensel anun o God lena, i tagun iau.

⁹Ikut osi ra in ipul ru iau umatan a taro, a Nutun a Musano kai in ipul ru i umatan a kum ensel anun o God.

¹⁰Det ra det in watung tar tu sakino wasiso una Nutun a Musano, din unus ru i kut, ikut osi ra in wasiso laulau una Tokodos na Nion, ka din unus lar pasi.

¹¹Ra din dat pas mot sur a warkurai una kum rumu na lotu, ma umatan a kum tene warkurai ma a kum mugumugu, gong mot nuknuk bing sur asau ra mot in balu lako kum etakun nami, o asau ra mot in watungi.

¹²Uni una du bung ut ra, a Tokodos na Nion ut in ususer mot un asau ra mot in watungi.”

¹³Ara tagun a kunur na taro i watungi tan o Iesu lena, “Tene Ususer, un inanos o tisinglik sur in isuaro a kum ululeng un mir, ra a tamamir i sa mat pas gusuni.”

¹⁴Ra o Iesu i balu i lena, “Le, osi ra i ubek tar iau sur an tene warkurai ma sur an isuaro anumur a kum ululeng torom mur?”

¹⁵Ra i watungi tandet, “Mot in nuk pasi, ma mot in tumarong mot gusun a nemnem sur a susut na ululeng, uni a nilaun anun taio ken kibino pas tagun anun a susut na ululeng.”

¹⁶Ra i inanos det una ara wasiso elelar lenri, “A kinobot anun ara tene gongon i wu a susut na wino.

¹⁷Ma i nuknuk lena, ‘Asau an pami? Uni katu rumu ra an ubek a win anung a kinobot uni.’

¹⁸Ra i watungi lena, ‘An pami lenri, an rege ru anung a kum rumu na umubek tomo, ma an pam melet lako kum lamlabino, ra an ubek rop a win anung a kinobot ma anung a ululeng uni.

¹⁹Ra an watungi tan a niong lena, “A niong, anum a kum ululeng i susut doko, sur in kis lako susut na kilalo. Un mana, un nangon, un inum ma un gas.” ’

²⁰Ikut o God i watungi tano lenri, ‘Ui a longlong! Uniutri una mirum, un mat! Osi mo in los a kum ululeng ra u sa ubek tomo tari sur ui?’

²¹In lenra torom det ra det ubek tomo a ululeng sur det ut, ikut ka det gongon umatan o God.”

²²O Iesu i watungi torom anun a kum nat na ususer lena, “I mo ra a watungi tamot lena, gong mot nuknuk doko una numot a nilaun sur asau ra mot in nani, ma una pinimot kai sur asau ra mot in emar nami.

²³Uni a nilaun i labo taun a utna na inangon, ma a pinindi kai i labo taun in namalu.

²⁴Mot in tama a kum kotkot. Ka det marut tu utna, ma ka det pasong tomo lako utna, katu rumu na umubek anundet, ikut o God i ser tabor det. Ma mot, mot labo doko taun a kum piko.

²⁵Ra taio tamot in nuknuk doko una nun a nilaun, pepetlai, in pet lari sur in tugus walos lilik anun a nilaun? Awu!

²⁶Ra ka mot in pam lar pas a utnalik ri, sur asau ra mot nuknuk doko sur lako kum utna kai?

²⁷“Mot in tama a kum purpur tagisa ubual, ra det lubung pepetlai. Ka det papam ma ka det ser pam malu. Ikut a watungi tamot, a ememar rop anun o king Solomon ut i tamtama wakak bing, ikut ke tamtama wakak elar nama kum purpur ra.

²⁸O God i mar a kum wuliso sa ubual nama kum wakak na purpurindet, ra i puspus uniri, ra markan din tun ru i una sungun. Ra i pami lenra una kum wuliso, i lingmulus ut ra in mar mot utkai. Anumot a nurnur i natino doko.

²⁹Gong mot nuknuk doko sur asau ra mot in nani, ma asau ra mot in inumi, ma gong mot ngara suri.

³⁰Uni a taro nin una rakrakon bual ra ka det nurnur, det ser dekdek sur a kum utna rop ri, ikut a Tamamot i tasmani lena mot sibo sur a kum utna ri.

³¹Mot in sisio sur anun a matanitu, ra in tabor mot nama kum utna ri.

³²“A nat na kunur na sipsip, gong mot ngara, uni a Tamamot i sa gas sur in pitar tar a matanitu torom mot.

³³Mot in siuru anumot a kum ututna sur a mani, ma mot in tabor a kum sibo na taro nami. Mot in waninar pas anumot lako kum paus ra ken moroto, a wakak na ululeng sapat una langit ra ke ser rop, ma katu tene wolong in nan milau i, ma a koropos ken ban laulau i.

³⁴Uni a nubual ra anumot a wakak na ululeng i kis iai, anumot a nilaun rop in kis uni.

³⁵“Mot sa emar pas, ma mot sa ungangon pas anumot a kum lam, gong mot dumun, mot in kis na waninar mukut.

³⁶Ma mot in elar nama kum tultul ra det kis langlang sur anundet a labino ra in milet melet tagun a lukaro na nolin. Ra in nanpat ma in pinpidik, uniutra det in papos pasi.

³⁷Ra a labino in nanpat, ma anun a kum tultul det sa waninar, det dan. A inanos mot nama lingmulus, in emar pas sur in pam anun a pinapam, ma in ukis tar det nisan a kabulu na inangon ma in tabor det.

³⁸Ra in nanpat kai torom det una labino mirum, o una lar, ma det in kis langlang ut suri, a kum tultul ra det in dan.

³⁹Mot in tasman a utna ri: Ra a taman a rumu in tasman a du bung ra a tene wolong in nanpat uni, ken madek ru anun a rumu sur din wolongi.

⁴⁰Mot kai, mot in koikoi taru, uni a Nutun a Musano in nanpat una du bung ra ka mot nuki lena in nanpat uni.”

⁴¹O Pita i ting o Iesu lena, “Labino, u watung a wasiso elelar ri un met kut, o una taro rop?”

⁴²A Labino i balu i lena, “A tene tamtamabat ra i lingmulus una nun a pinapam ma i mananos kai, anun a labino in ukis tari sur in mugumugu anun a kum tultul, sur in ser tabor det nama andet a utna na inangon una kum du bung na inangon.

⁴³A tultul ra, in dan ra anun a labino in nanpat ma in tama i ra i pam sot pas anun a pinapam.

⁴⁴A inanos mot nama lingmulus, anun a labino in ubek tari sur in tene tamtamabat una nun a kum utna rop.

⁴⁵“Ikut, ra a tultul i nuki lena, anun a labino ken nanpat lakit, ra i turpasi sur in um a kum tultul na musano ma a kum tultul na ino, ma in nangon, ma in inum ma in sipak.

⁴⁶Anun a labino in nanpat un tu bung o tu du bung ra a tultul ke tasmani, ma ke nuki lena in nanpat uni. Ra a labino in tau kutkutusi, ma in pitar tar a warkurai na minabalu toromi, sur in kis tomo nam det ra ka det nurnur.

⁴⁷“Tu tultul ra i sa tasman tar a nemnem anun a labino anunu, ikut ke waninar, ma ke papam elar nami ra a anun a labino i nemi, din taktakalo dekdeki.

⁴⁸Ikut tu tultul ra ke tasman asau ra anun a labino i nemi, ma i pam a utna ra ke tokodos, din rapus liliki kut. Ma torom taio ra di pitar tar a susut tano, din nemi kai lako susut ut gusuni, ma osi ra di ubek tar a susut ulamano, din tingi ut sur lako susut.

⁴⁹“A wanpat sur an tagol tar a sungun una rakrakon bual, ma a nem doko i lena i sa wangon.

⁵⁰Anung a baptais na ngunungut kura utmakai sur din baptaiso iau nami, ma iri a los a tarai na maut tuk ut ra din pam sot pasi.

⁵¹Pepetlai, mot nuki lena a wanpat sur an pitar a malmal una rakrakon bual? Awu, a wanpat sur a taro det in kis sarara.

⁵²Turpasi uniri, a limo det una ara rumu det in kis sarara, atul detul ut, ma aru tander ut.