Luk 11:9-39

⁹Godibolo po weyu tama tiao. Nago mu meni ebo nai sainu da, hanaludu bidama, nosali Godigo nagebolo mawaibao. Hauwa sogo gegedu bidibaso da, Godigo nagebolo ola mawaibao. Be tųba nogogo begobego udu bidibaso da, ta nagebolo dala munaibao.

¹⁰Magi baso meni. Tigidali bidigo gedu haluasa po God dali hanalu wabo bidi dabe, augwaligo te nai saibao. Te nai gegebo sę ebo bidi, agai te nai sueibao. Tama te be tųba elebo bidi, teda Godigo te bidibolo tų dalobo dao,” Jisasgo augwalibolo te po wai.

¹¹Te Godibolo po wabode, Jisas agai augwalibolo te po me wali, “Dage meba duga ogwago sųgų tuainu hanalu badi yaide, dwai hasamani mawaibawe? Menio.

¹²Ba ge tuainu hanalu badi yaide, bidi gąų kelebo nai hwą mawaibawe? Menio.

¹³Dage dwai dwai sę ebo bidi dabe goli, duga wai dabebolo dwagi yai nai mabo dao. Dagalude bidibo Aya me aga Dwagi Yai Mobo Bidi sainu hanalubo bidibolo mu mawaibao. Tama agai te dwagi yai nai mabo kolesagago dagego mabo kolesaga aiyaba mu elaluaibao,” Jisasgo te po wali.

¹⁴Me sogo Jisasgo te po wasiąbo dwai noma haubo bidi sela sądubadi, te dwai noma haubo bidigo te bidi tagala palobadi, te bidigo nosali po ma wabo gagalali. Tama te we bidi dabego te sę ebo sulama, noma mu salio.

¹⁵Tiali goli, mebago ma “Te dwai noma tobolu bidi Belsebulgo bomo menama, te dwai noma te sela sąbo dao,” wali.

¹⁶Te bidi mebago Jisas tola sabo bono gaga muyu te aga habela palomainu, te po wali, “Godigo bomo nagebolo mani dago sumainu wida, te nago da noma sabo bomai sę me deli ela suao,” te po wali.

¹⁷Tiali goli, Jisasgo augwaligo ebo homu koneama, te po wali, “Te deli bulu tǫ kantri pedai bidi hani si ma bugulama, te boi hwįbaso da, teda polo tama te bulu tǫ pedai dolaibao. Ma, te deli ayago togwali hani sibi tomode bugulama digi hwįbaso da, teda te deli hani sibi bidibo page dolaibao.

¹⁸Tama te Satango hani bage si bugulama, hwįgi sogo da, teda magi ilama agai te tobage sę ebo bomogo te nai dabe tonalugi dawe? Dagego enabolo dwai noma haubo tobolu bidi Belsebulgo te enabolo bomo mawai digi eno te sę ebao, te po dagego obao.

¹⁹Mu tama ena te Belsebulgo bomo ena dali elalubaso, eno te dwai haubo noma bidi dabe sela sąsą bilibao te homu ebaso da, teda dego dage wali pabo hani bage augwali me te tau sabo sę egi dawe? Tiali goli, te duga hani dabego digi te dagebolo te po dolo ola mobaso, te dagego konebao, augwaligo te agai bomogo te sę ebo menio.

²⁰Te sę ebogo te dagego geda muani sę te ola mobao. Dagego geda mubo po obao. Eno e sę ebo te Godigo bomogo naga te dwai haubo noma bidi dabe sela sąsą bilibo dao. Te sę ebogo te Godigo we bidi tonalubo sę dage pageba asai elalubo te ola mobao,” wali.

²¹Jisasgo te po ma wadolali. “Bomai bidi me deligo aga te boi hwįbo bainat hwą te nai dabe dali te aga bede sisi elalu, aga be tonalubadi yaide, te bede mubo nai dabe bugagia munalubo da.

²²Tiali goli, te boma pai bidi me deli pedelama, te boi sulama te bidi dali hwįnama, te bidigo bomo aiyaba elalubaso da, teda te be page bidi aga tobade tiąduali te boi hwįbo nai dabe tigidali te bomai bidigo sela pabo dao. Tama te be page bidigo polobadu wi sali nai te bomai bidigo ma selama, tama dobabo dao.

²³Bidi mebago ena dali homu muisąbo bidi da, te bidigo ena dali te boi bidi tiwai te ebao. Ena sipsip tonalubo tau sisąbo bidi da, te agai eno sipsip dabe osalubo bidi tiwai eyu te ebao,” Jisasgo te po wali.

²⁴Jisasgo te po wabo ma gagalali, “Te dwai nomago bidi me taga pelama, wa pai buluba toma nabo pesage gegegi pobao. Tiwai pesage me susiąbaso da, aga homugo tama te ebao, ‘Ena taga soali beba ma geasa paibao.’

²⁵Tama tibaso, bugagia ma dodolama, pobele bage meni yai beba ma pabo ąǫ te bidi pageba peyu te ebo dao.

²⁶Tama ma pelama, te 7 te tama dwai haubo noma bidi dabe agai odasa asobo da. Tama te gasa dwai noma haubo bidi dabego dwai dwai sę ebo kolesaga te ebogo te hasia dwai mobo haubogo ebo dwai kolesaga aiyaba elalubo dao. Augwali asama, aga dali te bidi ma te tuagasobao. Tama tibaso, polobadu yali sę tagalama, ugwanu mu te egi pobao,” Jisasgo te po wali.

²⁷Te Jisasgo te genuai we bidi hani tomode te po dagayu, te po obadi yaide, te we me deli augwali tomode bididuali wego te po dagą olama, te tiwai po wali, “Nage ame nenama negali we da, bugai homu ebadi bogo dao,” te po wali.

²⁸Tiali goli, Jisasgo wei ponoyu, te po wali, “Te mu dao. Tiali goli, Godigo po odama, wali pabo we bidi augwali dwagi yai homu mu ebadi bogo dao,” wali.

²⁹Te we bidi umabo Jisas odoga sagasobaso, agai te po wali, “Dage megi e sogo bidalubo hani we bidi dabe da, te dwai mu da. Dagego enabolo te ‘Godigo bomode te bomai sę ebao te koneainogo te sę ola mao,’ po wabo yabao. Tiali goli, dagego te bomai sę yabo dąį tiwai ilibo dagego me sugobeo. Menio. Te Godigo te profet bidi Jonabolo polobadu yaligia enabolo me te sę ebo dagego sueibao.

³⁰Polobadu Godigo po ola mabo bidi Jona aga isali tiwai. Tama ma hodolama, agai Godigo po te moni hanu te be nani nogi Ninive tede bidali we bidibolo Godigo po pusigi pali. Tama te tiwai ena te Godigo Bidi Mu te dage megi bidibo bagebolo pedelaibao.

³¹Te Godigo te we bidi augwali po tų ilabo dąį ilali side, te e tǫ pedai saut badu bidali genuai nogi yai we kwin agai te megi e sogo bidalubo we bidi dabego dwai sę yali po hania hanilama pusaibao. Magi baso meni. Te kwin we bogo badu mu bidali goli, te aga polobadu te Juda dabego king bidi nogi Solomongo dwagi yai kolesaga ebo po odai hagede, digibulu buludu genuai bulu tonalubo we asai dao. Tiali goli, eno Solomon aiyaba elalualio. Eno nogigo me agai nogi aiyaba elaluali goli, dagego eno po odobe dao. Tama dagego eno po odisąbaso, te Godigo te we bidi po tų ebo sogo te genuai wego ‘Dagego te dwai sę te yaliao’ po waibao.

³²Polobadu Godigo po pusa mabo bidi nogi Jona agai te Ninive we bidibolo Godigo po pusa mobadi yaide, augwaligo odama, dwai dwai sę tagalai dao. Tama eno Jona aiyaba elaluali goli, dagego eno po odobe dao. Nosali Godigo we bidi po tų ela mabo sogo te Ninive we bidigo dagebolo ‘Dwai sę dagego te yaliao’ po waibao,” Jisasgo te po wali.

³³Jisasgo te po ma wadolama weyu te po wali, “Te bidi dabego te lam sole udulama, te be dedageba aiya muyu, ma te baket me deli tomoba dualogobeo. Menio. Te tebol daiba ugadu munama, tama te be tomoba asobo bidi dabego te sole sumainu, sole mubo tebol daiba mubo dao.

³⁴Naga tigigo sole te naga gedu da. Naga gedugo be ula bugagia suyu, naga homu kolesaga dwagi yai yaibao. Tiali goli, naga gedu doyu da, teda nago homu kolesaga me te be hulia selama dwaibao.

³⁵Naga tolalubo sole ula sula sidali weyu, bugagia tonalu dua yao. Tiyu nagede te elalubo ula te be hulia sai pedelabuo.

³⁶Te naga tigide tigidalide te genuai ula usu nai eladu da, te me badu hulia sisąma, te naga tigi tigidalide ula naga usu nai elaluaibao, te lam sole ula elalubogia yaibao,” Jisasgo te po wali.

³⁷Te Jisasgo te po silama, Farisi bidi mego agai beba aga dali nai tuagasao wali. Tama tibaso, Jisas te be tomoba pelama, nai tuainu dugulaluali.

³⁸Jisas agai te Farisi dabego nogo wę telabo sę wali pisąma, nai polo tubaso, te Farisi bidi noma sai.

³⁹Tama Genuai Bidigo te po wali, “Dage Farisi dabego te kap dabe me, pou dabe me te eda badu bulu badu meda elalubaso, te bugagia dua digi me te ąįde telabo dao. Tiali goli, dagego homude dwai sę yabo konealubao, gasa bidigo nai sulama, eno somainawe homu ebo bage dao. Tama te ebogo homu dwai dao ola mabo dao.