LUK 11:18-32

¹⁸Kale ulutap Saatan so ilami sinik mafak sino ulimal igil waasi kebina tala ke bigi ko miit alop ke dinan-kalip nimnam, ulimal kulip iyo titil fagata tambaliim albaalip e minte, bilip imi titil uyo binimanepman o angbu no kuta ko. Kale ibo bogopne-nilip, ‘Belsebul iyo Yesus imi diim kal bom-nalata, dong daga-e-balata, unang tinum sinik mafak imdugan unsu bilip iyo fot tebela yak iinan-bilip o,’ agan-bilip (kuta, ipmi weng bagane-bilip bomi magam uyo bogo-nulu e, ‘Saatan iyo tebe ilami sinik mafak sino dinan-bilip o,’ agan-bo kuta, Saatan iyo kanum-nama binim kale, ibo amon amon ke-bom-nilipta, weng boyo bagan-bilip) kuba.

¹⁹Niyo sinik mafak iyo fot tebeli yak iinan-nuubip kale, ulutap ipmi okumop man igil mungkup sinik mafak iyo fot tebelip yak iinan-nuubip kale, ibo bogopne-nilip, ‘Saatan ita Yesus beyo dong dogobelata, sinik mafak iyo fot tebela yak iinan-bilip o,’ nagan-bilip kuta, ipmi okumop man bilip iyo utamipta e, tinum iyo maak Saatan imi titil uyo ku-nalata, sinik mafak iyo fot tebela yak iinoma binim kalaa age utamsip kale, bota utamipta e, ibo nimi sang bagane-bilip boyo bisop weng bagane-bilip kalaa agan-bilip kuba.

²⁰God yagal niyo titil kopnelata, sinik mafak iyo fot tebeli yak iinan-nuubip kale, God yagal niyo titil kopnelata, niyo sinik mafak iyo fot tebeli yak iinan-nuubip kale, siin God imi tebe ipmi bogobe-nala, ‘Nimi tinum ulaa duli kamok kesa iyo daali tal ipmi diim abe dong daga-e-balata, ibo mitam nimi daam tem e tolon-temip o,’ agela fen tebesip iyo nita kale, ibo nimi kuguup ko kanu-bii boyo utamipta e, fen kalaa agelin o,” age Yesus iyo baga-ema ko.

²¹Kale Yesus iyo ilami titil kiim uta uta ke Saatan imi titil kubaganu kupkasu umi sang uyo felep yak ku to do weng maak bogobe-nala e, “Tam tinum titil tebesa maak ilami mufekmufek uyo kan ke kulep tam ilami am to-nalata, dinan-kalin mufekmufek uyo fiko ko bigi-bom ilami am uyo tiin mo-balata, ilami mufekmufek uyo tambaliim nuubuta minte,

²²tinum maak atin titil kup tebesa iyo tal tamata, isino dinan-bii ita ita ke-nalata, ipkum am kayaak imi waasi dinan-kalin mufekmufek fiko ko-nala, ‘Kaal non-temaalu o,’ agan-be so e minte ipkum imi mufekmufek kan ke kulep tam am toba so uyo alugum dugu kulep no ilami waasi dinan-kalin tinum imi togopman-tema bole, tinum am kayaak bemi titil uyo ko biniman-temu ko.

²³“Kale unang tinum iyo dogap ita nimi ogok kenemin binim min, ipkumal dong daga-e-bilip meng nimi daam tem e telemin binim min umdii, bilip iyo nimi waasi ilitap ke unang tinum uget taga-bilip nimkaa yang iinebip ulutap ke-bomta kanum-nuubip o,” age Yesus iyo baga-ema ko.

²⁴Yesus iyo do weng migik maak baga-ema ko. “Sinik mafak iyo tinum maak imi diim kal nuubata, dupkaa daage no ok binim bagan umi diim maak kugol yang o meng o ke-bomta baan diim umaak utam-nilita, nan o age-nala e, fen te te kemata e, baan diim umaak utamin-tem keli kalaa age-nala e, bogola, ‘Nimi am binim kale, asok no nalami tinum dupkaa ti-sii imi diim kal nan-temi o,’ age-nala e,

²⁵asok unanbu no abomu, imi tinum imi iibak tem uyo am umi ifip tolo alugum mufekmufek kan kelip albu ulutap kebu kalaa age-nala e,

²⁶no sinik mafak ban kal maak iyo itamata e, bilip imi kuguup mafak uyo nimi kuguup uyo nimkan ke ita ita kesip kalaa age-nala e, asok kulep tal tinum imi diim tola e, alugum maagup bom-nilip e, kamaki umi sinik mafak ilasinon nuuba beyo kubagana e minte, aaltam umi sinik ban kal bilip ita ita kelipta, kamano komi tinum bemi aget mafak fugunin uyo atin mafagan uta uta ke-nuluta, kamaki umi aget fugunin mafak kanum-nuuba uta kubaganu kupkalu o,” age Yesus iyo do weng baga-ema ko.

²⁷Kale Yesus iyo weng boyo unang tinum kwiin tagang tem kugol bogopma e, unang maak usiik Yesus imi fomtuup bogobelu, “Kabaa. Tambaliim kale, kapmi kogen uyo kamo-nuluta, muuk uyo kupkake-bom tiin mo-bom-buluta, fito te tam tinum ke-salap kale, God iyo tebe kogen uyo kuguup tambal kupka-e-balata, deng tebe-buluta o,” agelu e,

²⁸Yesus iyo bogopma, “Dam bogolap kuta, unang tinum iyo dogap ita God imi weng uyo tinangka-bom God imi kuguup tambal uyo waafuu kwep tebe-bom no kemip umdii, kulip ita God iyo tebe kuguup tambal uyo maak so kupka-emin kup keman-tema o,” age-nala e, Yesus iyo unang bomi weng uyo yan kebe bogobela ko.

²⁹Unang tinum kwiin tagang iyo, no Yesus iyo atama-bulupta, mirakel ko age kuguup ugulumi migik umaak kanubela utamum o age tal fufala dolip e, bogopma, “Ibo aget fugunin mafak uyo fugun-bilip kale, ibo bogopne-nilip e, ‘Mirakel ko age kuguup ugulumi migik umaak kafalebelapta, utamupta, fen God yagal kamdala ti-salap kalaa agelum o,’ age-nilip e, fomtuup dagagamin kup ke-bilip kuta, niyo kanupmin kuguup boyo maak kanupmita, bomi deng uyo tebeman-temaalip kale ki, maagup maak uta kup kafalepman-temi boyo Jona imi top aniing kwiin kiim umi mat tem kugol bii, am alop ke-nala am asuno diim komi mitam e tisa ulutap uta maak kafalebelan-temi ko.

³⁰Sugamiyok uyo God imi profet ko age weng kem baga-emin tinum Jona iyo ilami abiip uyo kupkaa unanbu no tinum miit maak imi abiip miton Ninive kutam iinom-nala e, Ninive kasel iyo bogopma, ‘Ibo kuguup mafak kanum-nuubip boyo kupkalin o,’ age bogobe yakyak kemsa ulutap kale, Mo Tibil imi Man niyo tal kamano komi unang tinum albip ita bogobe-nili, ‘Ibo kuguup mafak kanum-nuubip boyo kupkalin o,’ age baga-eman o ageta ti-sii ko.

³¹Sugamiyok uyo Seba kasel imi tiin molin unang ko age kwiin uyo, Solomon imi weng tambal uta tinangkulan o age-nuluta, umi abiip uyo kupkaa talanbu tal Israel kasel numi bagan koyo ti-suu kale, son-temu nala am afungen am daanan-temu uyo, God tebe unang tinum alugum imdep no weng telelamin baan diim daa-nala yegeman-tema uyo, unang bota fen mo-nuluta, ipmi sang uyo bogo-nulu e, ‘Solomon imi weng tambal uyo kubaganuta, Yesus imi weng tambal uta uta kesu kuta, unang tinum kulip iyo tolong dosaalip binim o,’ age God imi bogobelan-temu ko.

³²Ulutap kale, am afungen am daanan-temu uyo, God tebe unang tinum alugum imdep no weng telelamin baan diim daa-nala yegeman-tema uyo, Ninive kasel iyo fen mo-nilipta, ipmi sang uta bogo-nilip e, ‘Nuyo Jona imi weng tambal uyo tolong do-nulupta, aget fupkela ko-nulupta, numi fengmin uyo kupkasup kuta, Jona imi weng tambal uyo kubaganuta, Yesus imi weng tambal uta uta kesu kale, unang tinum kulip iyo Yesus imi weng uyo tolong do-silip kuta, kulip iyo bogo-nilip, “Nuyo aget fupkela ko-nulup numi fengmin uyo kupkalan-temaalup o,” agesip o,’ age Ninive kasel iyo ipmi sang uyo God imi bogobelan-temip o,” age Yesus iyo baga-ema ko.