Luk 11:10-40

¹⁰Bawo məna nwɛ məntola mɔ, ampoc’am; məna nwɛ məntɛn mɔ, məŋnəŋk; pagbitɛ nwɛ oŋsut-sut kumba mɔ.

¹¹Kas kəre kəyi nu dacɔ, nkɛ wan kɔn ontola kɔ alop, pəsɔŋ kɔ abok mɔ?

¹²Kɔ pəyɔnɛ fɛ ti-ɛ, wan kɔn pətola kɔ ames ŋɛgbɛŋ, nkɔn pəsɔŋ kɔ tekəleŋcər?

¹³Kɔ pəyɔnɛ fɔ nəna aŋɛ nəlɛcɛ mɔ, nəŋcərɛ kəsɔŋ awut anu ca yɔtɔt, ta ake tɔ Kas nkɛ kəyi nde dareŋc mɔ, kəŋkɔsɔŋ Amera Ŋecempi ŋɔn aŋɛ ŋaŋwer kɔ ŋi mɔ!»

¹⁴Dɔsɔk dɔlɔma Yesu pəc-bɛləs ŋɔŋk ŋɛlɛc nŋɛ ŋɛnasɔŋɛ fum wəlɔma kətɔ-lok-loku mɔ. Ntɛ ŋɔŋk ŋɛlɛc ŋaŋɔkɔ ŋowur kɔ mɔ, kɔ wətɔlok-loku wəkakɔ olok-loku, kɔ pəŋciyanɛ afum.

¹⁵Mba kɔ afum alɔma ŋaloku: «Bɛlsebul wəbɛ wəka yɔŋk yɛlɛc, ɛmbɛlsɛ yɔŋk yɛlɛc.»

¹⁶Ntɛ alɔma ŋafaŋ kəsumpər kɔ dəmoloku mɔ, kɔ ŋaloku kɔ a pəmentər tɔyɔ tɛgbɛkərɛ tin ntɛ teŋmentər a Kanu kəsom kɔ mɔ.

¹⁷Mba ntɛ Yesu ɛnacərɛ pɛcɛm-cɛmnɛ paŋan mɔ, k’oloku ŋa: «Dare ndɛ aka di ŋandeyɛfərɛnɛ taŋan mɔ, dɛŋləpsər kəlɛcɛ. Wɔlɔ wa di wɛtɛmpɛnɛ win win.

¹⁸Kɔ pəyɔnɛ fɔ Sentani eyi kəyɛfərɛnɛ kɔ nkɔn sərka-ɛ, cəke cɔ dare dɔn dɛntam kətesɛ-ɛ? Bawo nəloku a Bɛlsebul imbɛlsɛ yɔŋk yɛlɛc.

¹⁹Kɔ pəyɔnɛ fɔ ina Yesu, Bɛlsebul imbɛlsɛ yɔŋk yɛlɛc-ɛ, awut anu oŋ, anɔ ɔ ŋambɛlsɛ yɔŋk yɛlɛc-ɛ? Itɔ ɔsɔŋɛ ntɛ ŋa yati ŋande kiti nu mɔ.

²⁰Mba kɔ pəyɔnɛ fɔ fənɔntər fa Kanu fɔ imbɛlsɛ yɔŋk yɛlɛc-ɛ, dɛbɛ da Kanu dender haŋ nnɔ nəyi mɔ.

²¹Kɔ fum wəka fənɔntər ɔntɔmpər posutnɛnɛ-ɛ, ombum daka dɔn bel-bel ta tɔlɔm o tɔlɔm tɛnəŋk di-ɛ.

²²Mba kɔ fum wəlɔma nwɛ ɛmbɛk kɔ fənɔntər ender pəsut kɔ kəyɛfərɛnɛ pətam kɔ-ɛ, wəkakɔ ɛmbaŋər kɔ yosutənɛnɛ yɔn nyɛ ɛnalaŋ mɔ, pəlɛk ca yɔn fəp pəyerəs.

²³Nwɛ ɔntɔyi kɔ ina mɔ, enter’im; mba nwɛ ɔntɔloŋkan’em mɔ, məŋsaməsər’em.»

²⁴«Ntɛ ŋɔŋk ŋɛlɛc ŋaŋɔkɔ ŋowur fum nwɛ dəris mɔ, ŋɔc-kɔ ŋec-der ŋec-cepər-cepər mofo mowosu, ŋɛc-tɛn dəkəyi. Kɔ ŋɔntɔsɔtɔ, kɔ ŋoloku: ‹Ilukus nde kəlɔ kem nkɛ inayɛfɛ mɔ.›

²⁵Ntɛ ŋolukus mɔ, kɔ ŋɛbəp kəlɔ kaŋkɔ pafɛŋ ki, palompəs di bel-bel.

²⁶Awa! Kɔ ŋɔŋk ŋɛlɛc ŋaŋɔkɔ ŋɔŋkɔ, ŋɛtɛn akos aŋi yɔŋk yɛlɛc camət-mɛrəŋ nyɛ yɛnanaŋkanɛ kəlɛcɛ yɛtas ŋi mɔ; kɔ ŋosolɛ yi kɔ yender yɛcəmɛ fum nwɛ darəŋ. Awa, kɔ pəlɛc pɛnaŋkanɛ fum wəkakɔ pətas tɔkɔ pənayi kɔ mɔ.»

²⁷Yesu eyi kəloku moloku mamɔkɔ, kɔ wəran wəlɔma oŋkulərnɛ kənay ka afum akakɔ dacɔ: «Pəbɔt kor nkɛ kənabɛkəs’əm mɔ, kɔ mɛsɛ mmɛ anamɛsər’am mɔ!»

²⁸Mba kɔ Yesu oŋkulɛ: «Pəbɔt aŋɛ ŋaŋcəŋkəl toloku ta Kanu, ŋamɛŋkərnɛ ti mɔ!»

²⁹Ntɛ kənay kəŋc-mɛpnɛ Yesu mɔ, kɔ ŋayɛfɛ kəloku: «Afum a ndɛkəl ŋantesɛ fɛ; tɔyɔ tɛgbɛkərɛ ntɛ tɛyɛfɛ ndena Kanu mɔ tɔ ŋafaŋ kənəŋk; mba ali tin afɔsɔ-mentər ŋa kɔ pəyɔnɛ fɛ ta Yunusa-ɛ.

³⁰Bawo tɔkɔ teta Yunusa tɛnayɔnɛ aka Ninewe tɔyɔ tɛgbɛkərɛ mɔ, itɔ teta Wan ka fum tendesɔ-yɔnɛ afum a tɛm tantɛ tɔyɔ tɛgbɛkərɛ.

³¹Dɔsɔk da kiti, wəbɛra wəka kəca kətɔt (kɔ məntɛfərnɛ nde dec dɛmpɛ mɔ), endetimɛ tɛm ta kiti, pəcəmɛ afum a ndɛkəl fɔr kiriŋ. Endeyemsɛnɛ ŋa, bawo kəfo kəbol-bolu ka dare dɔlɔma k’ɛnayɛfɛ k’ender kəcəŋkəl kəcərɛ pɔkɔt ka Sulemany. Mba fum eyi nnɔ nwɛ eŋcepər Sulemany mɔ!

³²Dɔsɔk da kiti, afum aka Ninewe ŋandekɔ-yɛfər afum a ndɛkəl ŋayemsɛnɛ ŋa, bawo aka Ninewe ŋanasəkpər mɔyɔ maŋan, kɔ ŋancəmɛ pəlompu darəŋ, ntɛ ŋanane moloku ma Yunusa mɔ. Mba wəlɔma eyi nnɔ nwɛ eŋcepər Yunusa mɔ.»

³³«Fum nwɛ o nwɛ ɔfɔmot lamp pəkəŋk di kɔ pəyɔnɛ fɛ ti-ɛ pəmɛŋk di, mba pəfos pɔ aŋcəmbər di ntɛ tɔŋsɔŋɛ aŋɛ ŋambɛrɛ mɔ ŋanəŋk pəwaŋkəra.

³⁴Dɔfɔr dam dɔyɔnɛ lamp da dis. Kɔ dɔfɔr dam dentesɛ-ɛ, dis dam fəp doŋmotnɛ; mba kɔ dɔfɔr dam dɔntɔtesɛ-ɛ, dis dam sɔ kubump kɔ deŋyi.

³⁵Məkɛmbərnɛ ta pəwaŋkəra mpɛ pey’əm dəris mɔ pɔyɔn’am kubump.

³⁶Kɔ dis dam domot ta tofo o tofo teyi ntɛ teyi kubump mɔ, tɛm tatɔkɔ dis dam fəp dɛmar, pəmɔ tɔkɔ lamp doŋmot’əm kɔ dendemar-ɛ.»

³⁷Ntɛ Yesu ɛnayi kəlok-loku mɔ, kɔ wəFarisi wəlɔma ɛlɛtsɛnɛ kɔ kəkɔ-di yeri dɔsɔk dadɔkɔ nde ndɔrɔn. Kɔ Yesu ɛmbɛrɛ k’ɔŋkɔ pəndɛ amɛsa kiriŋ.

³⁸Kɔ pəŋciyanɛ wəFarisi nwɛ ntɛ Yesu ɛnatɔ-gbət waca dəromun kərɛsna a pədedi yeri mɔ.

³⁹Mba kɔ Wəbɛ oloku kɔ: «Nəna aFarisi, pəlet kɔ səpɔt tadarəŋ yɔ nəŋsɔkəs, mba bəkəc yonu disrɛ nəlasərnɛ deke dəris kɔ kəyɔ mes mɛlɛc.

⁴⁰Nəna atɔcərɛ mes aŋɛ nəyɔnɛ mɔ, Kanu nkɛ kəlompəs tadarəŋ mɔ, bafɔ ki kəlompəs sɔ tedisrɛ ba?