Luk 10:11-21

¹¹‘Aso anyas ndren ta kon tinan tado udu kati aso iu, ta leheya ki mada ado, tasah ado badeh, baseken sahou, ma ado ndrandra-i labai. Ma ale, ado badeh, ki tanan, ta tondrok ta Kindrei badeh, ndrame mirihik tado. Arile, ado badeh, baseken bwe.’

¹²Eme jo katiye tado kamwenen, na len Kindrei edeu lau ala ta mada sahou eme kameh, kon tinan dah kameh bwese maha-an laba tinan labai sakalawi maha-an asahan tiri lau ndra-in badu kon tinan Sodom mene ja!

¹³“Eme ya, ado lau badu kon Korasin, hawe ado lau badu kon Betsaida, ado katou! Sisi-in tinan labai kameh ewek bwele-e ado. Tasah, ki buku none lau ra-on mene kala kon tinan Tair hawe Saidon ma kamekes lahou tinan buku none jo ndramekes ereu ndrokowa ado, sebwe ndra bwena iri lau badu kon ma lubuk doh ndrasin awin bokodon, ma ndratahi iri na koloweh, ta leheya buku none iri tikisi handru ta kandriyen ndra-in tiri mene, iri ndrabwidiy.

¹⁴Arile, na len Kindrei le tanan ta adeu lau ala ta mada sahou, ado kameh bwese maha-an udu bwele-en labai ja ta kon Tair hawe kon Saidon.

¹⁵Ya ado lau badu Kapena-um, sebwe iri lau ra-on ja kameh bwese nyara ado ili loken ili kandrah nadeh? Bwe handru en! Kindrei kameh akahei ado ala bolo jih, kon tiri lau ndra-in amak ado aliy.

¹⁶“Ya are lau anuhun ado badeh, iy anuhun jo ale; ya are lau baseken ado bwe, i buku none iy badeh, baseken jo bwe ale. Ma hawe are lau baseken jo bwe, iy ale, baseken Kindrei bwe le, iy ndramak nane suni jo eme dah.”

¹⁷Ano udu badeh, oro lau ma ndro tonoh la-uh (72) nane ame asahan, eme oro sekesek andra-i labai ma oro tiye i ta Jises anya, “Laban, iri malawin ndra-in ale badeh, anuhun boho aso, ya ame len na boto-on ta nyaram.”

¹⁸Eme Jises tiye toro, “Jo badeh, anyolom boto-on ta tama balik Satan badeh, taku udu kandrah eme andri, i buku none kalik takamek.

¹⁹Ado kanuhun! Jo badeh, ndratehei boto-on handru ndrawek tado, ta ado winiyan adek bwele-e mwak ndra-in, hawe adek bwele-e sabiyep; ma boto-on ta sakalau boto-on ta balik; ya eme ari lakou winiyan batok tado bwe.

²⁰Arile, ado badeh, sasekesek ta ado badeh, sakalawi boto-on ta malawin ndra-in, ndri-iy, arile ado badeh, kasekesek, tasah nyara ado badeh, ndratorowenei udu kandrah.”

²¹Na len doh badeh, Jises idih labai na sekesek ta Malawin Ndrabun, eme iy tiye, “Tama, ou Laban badu munyak ma kandrah! Jo masiye ou! Tasah, ou tone lakou dah ta mada iri lau ta tanan, ma hawe iri lau anya iri tanan labai, ya ou leheyani i tiri nah, tana iri lakou bwe. Ehe, idoh asahan na seken tam le.