Lucas 8:39-54

³⁹—Quedacur, wayiquiman cutiquï. Tsecho willacunqui Dios llapanta qampaq rurashqanta. Tsenam cutirnin, jinantinpa ewar, willacorqan Jesus pepaq llapanta rurashqanta.

⁴⁰Galilea marcaman cutiriyaptinnam, atscaq nunacuna shuyarëcayarqan, cushishqa chasquiyänanpaq.

⁴¹Tsemannam ellucayänan wayicho mandacoq Jairu jutiyoq nunapis chärerqan, y Jesuspa nopanman qonquriquicurnam, rogarqan: —Acu, wayïta eweculläshun —nishpa.

⁴²Tse nunapam jucllella chunca ishque (12) watayoq warmi tsurin, pasëpa lastima qeshyar, wanuquicarqan. Jesus ewarëcaptinnam, atsca nunacuna qatirnin quichquipa quichquiyarqan.

⁴³Chopincunachonam ewecarqan juc warmi, chunca ishque (12) watana yawar ewewan qeshyacoq. Tse warmim imecancunatapis pasepa ranticur, usharqan jampicunanpaq; peru meqan jampicoqpis manam cachacätserqantsu.

⁴⁴Pemi Jesuspa qepanman witïcur, mantunpa cuchunta yatecaporqan. Yateconqan öram yawar ewenin paqwepa tsaquirerqan.

⁴⁵Jesusnam tapucorqan: —¿Pitaq ropäta yatamorqon? —nishpa. Llapan nunacuna “Manam noqatsu” niyaptinnam, Pedru waquin yanaqincunawan niyarqan: —¡Mayestru, quelaya nunachoqa jucnin jucnintaq tanqayäshunqui! ˻¿Tsecu qam ninqui, ‘Pitaq ropäta yatamorqon?˼’

⁴⁶Yapenam Jesus nerqan: —¡Pi carpis yatamashqam! Podernï yarqoqtam mäcorqö.

⁴⁷Tseno yatashqanta mäcuriptinnam, mana imano queta puedir, tse warmi allapa mantsacushpa Jesuspa nopanman qonquriquïcorqan. Y willarqan llapan nunacuna wiyarëcayaptin, imanir yatashqanta y cachacärishqanta.

⁴⁸Tsenam Jesus queno nerqan: —Ija, noqaman marcäcurmi cachacärerqonqui. Canan cushishqana euquï.

⁴⁹Jesus tseno parlecaptinmi, ellucayänan wayicho mandacoq Jairupa wayinpita nunacuna shamur chäriyarqan queno nirnin: —Tëte Jairu, ¡tsuriqueqa wanurishqanam! ¡Amana Jesusta afanënatsu!

⁵⁰Jesusnam tseta wiyarirnin, Jairuta nerqan: —Ama mantsaquëtsu. Noqallaman marcäquï; wamrequeqa cachacanqam.

⁵¹Wayiman chärirnam, disipuluncuna Pedruta, Juanta, Santiaguta y wamrapa papäninta y mamäninllata ruriman yecatserqan. Manam waquincuna yecuyänantaqa munarqantsu.

⁵²Waqtachonam nunacuna qaparipa qayaripa waqaquicayarqan, wamra wanushqa captin. Tsenam Jesus nerqan: —Ama waqayëtsu. Wamraqa punicanllam. Manam wanushqatsu.

⁵³Wamra wanushqanta musyarninmi, Jesusta llapan nunacuna asipäyarqan.

⁵⁴Peru Jesusnam maquinpita tsarircurnin, wamrata queno nerqan: —Wamra, sharcamï.