Lucas 8:3-55

³ne tedib ngot kuu le Juan kuu nak tsaal Cuza, kuu mke tsiin lo rey Herodes, noga Susan ne tedib net re ngot kuu mtsow ayud Jesús kon kuu nap re ngot.

⁴Ne kwaro men mroo laz ngwa gon kuu ni Jesús, ne leettsa ngwalo mkaltaa kwaro men, tsa mni Jesús lo re men kon diiz nanzee, ne nzhab Jesús:

⁵―Nal leen ta thib kwent lo goo, kwent chaan thib zha kuu mroo ndalo nzob xtil lo yu. Ne leettsa ngelaal zhay, thib nete mlaa laaz net, ne lee re men mloo ditse, ne myaad re min ndowe.

⁶Tedib nete mlaa xid ke, ta yent naroob yu, ne leettsa mlene mzhene lut, ne zhega zhega mbize, tak yent naroob naz par gazhene.

⁷Lee tedib nete mla xid yits, mlene ne thibka mzhene kon yits, ne mluux yitse.

⁸Per lee tedib nete mla lo yu naal, ne kwathoz mzhene ne kwaro ngoke, asta thib gayoo nzob xtil mndaa thibka bin. Tata nak kwent. Tsa nex nzhab Jesús: ―¡Os lee goo ndob nza goo ndoblo yen goo koree!

⁹Tsa lee re zha kuu ngeteed lo Jesús mnaabdiz lo Jesús, ne nzhab: ―¿Xomod nak kwent nanzee ree?

¹⁰Jesús mkab lo re zha ne nzhab: ―Diox mtsow tsa yen goo naa xomod nak re kuu nloot chaan ta nabee Diox; per lee lo tedib net zha pur nanzee nin lo zha, tsa tegal wii zhay loote lo zha, ne tegal gon zhay yent zhay.

¹¹’Tenzhee nak kwent nanzee: Lee nzob xtil nak taxal xkiiz Diox.

¹²Lee nzob xtil kuu mla laaz net, nak taxal re zha kuu nzhon xkiiz Diox, per lee Maxuuy nyaad nkibe leettsoo zha, tsa yelaazt zha Diox ne tsowt zha gan yalnaban kuu thitanax.

¹³Lee nzob xtil kuu mla xid ke, ta yent naroob yu, nak taxal re zha kuu nzhon xkiiz Diox; ne kwathoz naley nzo leettsoo zha nkayaa zhay, per taxal ya kuu napt lozh nak zha, nyelaaz zhay lut, per leettsa nzin thib yalti lo zha, tsa nlaa zha Diox.

¹⁴Lee nzob xtil kuu mla xid yits, nak taxal re zha kuu nzhon xkiiz Diox, per lutga lutga lee re xgab yezlyu ree, kuu nak xomod gak rik zha, ne re gust yezlyu ree ntsow gan lo zha, re kona nluux xkiiz Diox leettsoo zha, kona ndaat zha xle.

¹⁵Per lee nzob xtil kuu mla lo yu naal, nak taxal re zha kuu nzhon xkiiz Diox kon dib ndroo leettsoo, ne ntsow zha re kuu mbez xkiiz Diox, ne ney ndo zha lo xkiiz Diox, re zhaʼa ndaa kwathoz xle.

¹⁶Noga nzhab Jesús: ―Neeka thib zha nkeet thib kandil ne ntow zhay kon thib zhibey o ngo zhay xann luun, sinke ntob zhay thib ta ya ndab, tsa teniy lo re zha kuu tab leen yuu.

¹⁷Leeka tata, neeka thib kuu nzogaats gagt loote, ne neeka thib kuu xgaats gagt net re mene, retay tanabeey.

¹⁸’Kona wen kenza goo re kuu nin. Tak lee re zha kuu nkeno kwaa, tekayaa zha masraay, per lee re zha kuu nkenote, asta lut kuu nap zha teyiib lo zha.

¹⁹Lee xnaa Jesús ne re wets Jesús mzin ta ndo Jesús, per gagt big re zha gax lo Jesús, tak kwathoz men nzi tya.

²⁰Tsa mloo zha diiz lo Jesús nzhab zha: ―Lee xnaaʼa ne re wetsa nzi lee, ne nlaaz zha ni zha loʼa.

²¹Jesús mkab ne nzhab: ―Reta zha kuu nzhon xkiiz Diox ne ntsow kuu nzhab xkiiz Diox, re zhaʼa nak taxal xnaan ne re wetsʼn.

²²Thib wiz mndaab Jesús leen kano kon re zha kuu ngeteed lo Jesús, tsa nzhab Jesús lo re zha: ―Nda goo reʼaa tedib lad roo nitdoo. Tsa nda re zha tedib lad roo nitdoo.

²³Ne leettsa nda re zha lo nitdoo, lee Jesús mdat. Ne lee thib mbi thoz ngoth lo nitdoo, ne lee nit mndelo mndaab leen kano, ne asta nlaa loww kano leen nit, ne kwathoz mzhakti re zha.

²⁴Tsa mloo re zha mkaal lo Jesús, ne nzhab zha lo Jesús: ―¡Maestr! ¡Maestr! ¡Mer lowgwaa! Tsa ngwache Jesús ne mkox mbi ne nitdoo lo Jesús, ne oraaka lee mbi ne nitdoo zheta ngok.

²⁵Tsa nzhab Jesús lo re zha kuu ngeteed lo Jesús: ―¿Chebee nzeb goo? ¿Ma kuu ni goo nyelaaz goo Diox? Per lee re zha kwathoz mzeb zha ne mzegey leettsoo zha, ne naabdiz zha lo altaa zha ne mbez zha: ―¿Cho nak zha ree, chebee nzhaak nabee zha lo mbi ne lo nitdoo ne nzhone diiz lo zha?

²⁶Leettsa mzin re zha tedib lad roo nitdoo chaan yezlyu Galilea, yezlyu chaan re zha yez Gadara.

²⁷Ne or mla Jesús leen kano, tsa myaad thib zha yeza mbig lo Jesús. Ne lee zhaʼa ndaʼa tyemp nzo mbi fyer leettsoo zha. Ne neeka nzhogt zha xab zha, ne neeka nzot zha liz zha, sinke leen re baa ta nkaats re men re thebol nyoo zha.

²⁸Per or mwii zha Jesús, tsa mbig zha mtobxub zha lo Jesús ne mrez zha, nzhab zha: ―¿Chebee ndyaada lo nee Jesús Xgann Diox kuu ndob yibaa? ¡Naabʼn loʼa tetita nee!

²⁹Tata nzhab zha, tak lee mbi fyer mkox lo Jesús tsa roo mbi fyer leettsoo zha. Tyen welt nden mbi fyer zha, ne tegal nliib re men zha kon kaden, per ntsow zha gan nchuug zhay ne nyano mbi fyer zha re yubiz.

³⁰Tsa mnaabdiz Jesús lo zha, ne nzhab Jesús: ―¿Cho bleʼa? Lee zha mkab, ne nzhab: ―Leen le, kwathoz. Tata nzhab zha, tak kwathoz mbi fyer nzo leettsoo zha.

³¹Tsa lee re mbi fyer mnaab ne nzhab lo Jesús: ―Taalta nee leen yeerdoo.

³²Ne gax tya nzi naroob nguch ngeyow, tsa nzhab re mbi fyera lo Jesús: ―Taa diiz tab nee leettsoo re nguch baa. Tsa mndaa Jesús diize.

³³Tsa lee re mbi fyera mroo leettsoo mbyiʼa ne mndaab re mbiʼa leettsoo re nguch. Ne oraaka lee re nguch mrezhonn ne mla re maa leen nitdoo, ngwaap re maa nit ne thitanax nguth re maa.

³⁴Per leettsa mne re zha kuu nkenap re nguch kona, tsa lijer ndya zha ne mndaa zha kwent kuu ngok, lo re zha kuu nzi wan ne lo re zha kuu nzo yez.

³⁵Tsa lee re men yez mroo ngwatwii naa kwan kuu ngok. Ne leettsa mzin re zha ta ndo Jesús, tsa mwii zha lee mbyi kuu mroo re mbi fyer leettsooʼa ndoba lo Jesús, ne nok xaba mbyi ne mgweʼa mbyi, tsa kwathoz mzeb re men.

³⁶Ne lee re zha kuu mwii kuu ngok, mndaa zha kwente lo tedib net re zha, naa xomod mgwe zha kuu ngoo mbi fyer leettsooʼa.

³⁷Tsa lee re men kuu nzo yezlyu Gadara, nzhab lo Jesús bi Jesús, tak kwathoz mzeb re zha. Tata mod lee Jesús mndaab leen kano ne mroo Jesús tya.

³⁸Per lee mbyi kuu mroo re mbi fyer leettsoo, nzhab lo Jesús: ―Laaʼa teken ditsa. Per lee Jesús mnabee lo zha, tsa yaan zha, ne nzhab Jesús lo zha:

³⁹―Tyee liza, ne guz re kuu mtsow Diox loʼa. Tsa lee mbyiʼa ndya, ne mndaa kwent lo re men kuu mtsow Jesús lo zha.

⁴⁰Leettsa mretab Jesús tedib lad roo nitdoo, kwathoz laz re men mkayaa re men Jesús, tak reta men ngebet Jesús.

⁴¹Ne ora mzin thib mbyi kuu le Jairo, kuu nak thib zha kuu nabee ta nkaltaa re zha Israel nteed xkiiz Diox, ne mtobxub lo Jesús, ne mnaab zha lo Jesús ya Jesús liz zha,

⁴²tak thibka rtsaap zha nap zha, kuu nap teeka tsiibchop liin, ne mer gath rtsaap zha. Ne or nda Jesús kwaro men mndeke dits Jesús, ne kwathoz mzhoo re men Jesús.

⁴³Ne xid re mena nda thib ngot, kuu ndaʼa tsiibchop liin ndak yiz kuu nlath ren leettsoo. Ne reta kuu nap ngot mluux ngot ngwa ngot lo re doctor, ne yent cho ngok gategwe ngot.

⁴⁴Tsa lee ngota mbig dits Jesús, ne mdiinn ngot xab Jesús. Ne oraaka lee kuu nlath ren leettsoo ngot mlet.

⁴⁵Tsa lee Jesús mnaabdiz, ne nzhab: ―¿Cho mdiinn chon? Ne lee re zha nzhab: ―Yent cho mdiinn choʼa. Tsa lee Pey nzhab: ―Maestr, ¿chu ngwiita reta lad nzhoo zha lu, ne naabdiza, cho mdiinn choʼa?

⁴⁶Tsa lee Jesús mre nzhab: ―Nzo cho mdiinn chon, tak myeen na mroo yalney chon mtegwen thib zha.

⁴⁷Tsa lee ngot myeen ngot ngogaa ngot, tsa mzhiit ngot ne mbig ngot ne mtobxub ngot lo Jesús. Ne tya lo re men nzhab ngot naa chebee mdiinn ngot xab Jesús, ne xomod oraaka mgwe ngot, tak mdiinn ngot xab Jesús.

⁴⁸Tsa nzhab Jesús lo ngot: ―Rtsaapʼn, tak ngwalaaza Diox, kona mgweʼa. Wen bloo leettsooʼa ne tyee.

⁴⁹Bee ngenika Jesús leettsa mzin thib zha liz Jairo, nzhab lo Jairo: ―Lee rtsaapa ngutha, chebee ngenika lu lo maestr.

⁵⁰Per lee Jesús mbin nzhab zha kona, tsa nzhab Jesús lo Jairo: ―Tsebta; beeta gwalaaz Diox, ne lee rtsaapa tegwe.

⁵¹Ne leettsa mzin Jesús liz Jairo, mndaat Jesús diiz gataab re men liz Jairo, beeta Pey, Santiag, Juan ne xut nzaa ne xnaa nzaa.

⁵²Ne reta men nzi nzhonn ne mbetsyath tak nguth nzaa, per lee Jesús nzhab lo re zha: ―Gonnt goo, tak ngutht nzaa, beeta naxat nzaa.

⁵³Tsa mzhizno re zha Jesús, tak ne re zha nguth nzaa.

⁵⁴Tsa mzhen Jesús yaa nzaa, ne nex nzhab Jesús: ―¡Nzaa, gwache!

⁵⁵Tsa lee nzaa mroban. Ne oraaka ngwache nzaa, ne mnabee Jesús taa zha kuu wu nzaa.