Lucas 6:3-39

³Aituo Jesus aguely: — Enanâguewâdaungâ typynigueba tâituo, kydamu Davi, eagonro modo warâ aitomobyry, toenzepa tâwindymogue.

⁴Deus ety odaji myakâwândy Davi egawândyly. Deusram xuduypy pão modo nhanâdyly, nhedawynly idyly. Tagonrodo nhedawyn-hoem xuduwânmy warâ. Judeu domodo eynynâ olâ tâise akaemo awârâ pão modo nedawympa. Kurâdo eynynâ Deus agâ aguenri lelâ mawânkâ tâise mârâ pão edawynrim, âkelo modo lâpylâ warâpa. Deus olâ myakâwândy nehoguebyramo nipyra mârâ nhedawynduomo.

⁵Uguondo Kaynâpa Âetyby urâ. Âdy iwâkuru adyeseim, adyesenry warâ tâzekobyzegueho oday xuturim urâ — kely Jesus.

⁶Tâzekobyzegueho oday Jesus egawântondyly âtâ tâdâtâdyguyho odaji. Âwântybyem, Deus xunârygue tonlo modo nhenomedâdyly. Târâ uguondo emary eahoru eynynonro âzemapiluguedânrybe myani.

⁷Tâlâ lâpylâ myani târâ fariseu domodo, Moisés inweniby wâgâ enomedâni modo warâ. Jesus tiunâguedoem kulâ aidyly enuagaeni modo xunâzelymo: — Tâzekobyzegueho oday Jesus awâkâ uguondo emary kua nhedyly watay, Deus ezewenry arapa aitobyry kyzegatunre. “Deus aiedyseba ato amientai” kykenre — kelymo.

⁸Jesus olâ myani tutuze akaemo nhangahumo oday xunârymo. Awylygue uguondo âzemapiluguedânryam aguely: — Aukâ. XYDYK ikâ; âekâ xarâ waunroem — kely Jesus. Agueduo uguondo saudyly, XYDYK idyly.

⁹Jesus tonlo modoram aguely: — Âdaraka Moisés inweniby tâzekobyzegueho oday aguienkyly wâgâ aguely? Âdyka adyeseinhe agueho, koendonro aguiendyly, inakai aguiendyly, kely? Ânguylâ tâzekobyzegueho oday kâmaynoem watay, kienmakely, tâwâlâ kingueânehonly? — kely Jesus.

¹⁰Aituo Jesus idânârâ kehoem kurâdo tydonro modo nhenuagaendyly. Aguely uguondo âzemapiluguedânryram: — Âzemapiluguegâ — kely. Jesus agueduo, uguondo âzemapiluguely myani, emary kua ienipyryem awylygue.

¹¹Awârâ tientuo myani Moisés inweniby wâgâ enomedâni modo, fariseu domodo warâ iewiâpadaynlymo. Âjigue aguelymo: — Âdakiendylyka ise awâkâ Jesus? — kelymo.

¹²Ilâpygueduo Jesus iwy onwa âkuly, tynynonro modo agâ, Deus agâ agueze. Tâmese myani Deus agâ xunâgu.

¹³Emetybyem, tynynonro modo ingâsedyly. Akaemo ewy doze lelâ induakely. Aituo eyanmo aguely: — Âduakelymo, ywâgâ amyguehomoem — kely.

¹⁴Doze lelâ iduakeyby: Simão (“ ‘Pedro’ ise izedy” Jesus kehobyry.) André (Simão iukono) Tiago João Filipe Bartolomeu

¹⁵Mateus Tomé Tiago (Alfeu imery) Simão (tâty anary izetonro lelâlâ tawylygue, Roma donrogue tywymâgu izepaom)

¹⁶Judas (Tiago imery) Judas, Queriote donro (Jesus egamenribyry izepanro modoran-ro.) Warâ Jesus induakely.

¹⁷Ilâpyryem myani Jesus xytâguyly eagâmo iwy wogompyryem. Toenzepa iwy iakoay eynynonro modo. Toenzepa lâpylâ myani iwagueno modo ewy: Jerusalém donro modo, Judéia eynynonro modo, azagâ xidadâ parutabâ emelano Tiro, Sidom warâ donro modo warâ.

¹⁸Âdy Jesus agueho awyly xutuze, kua âiehoze warâ myani akaemo idâly. Kadopâgue taseim modo idâly myani, kua âieholymo lelâ.

¹⁹Idânârâ tâwânuneim modo MÂʼ tiendyse, eon-honrugue kua tâitomoem. Idânârâ MÂʼ ienipyry modo kua itaunmâmomy.

²⁰Ilâpygueduo myani Jesus tynynonro modoram MYK idyly. Eyanmo aguely: — Tuomareim kuru âmaemo âdy pebaom modo. Deuslâ olâ âwymârymo, nhenimo warâ.

²¹— Tuomareim kuru âmaemo tâwinzeim modo. Ilâpyryem ise idânârâ ize matomo tâlâ lelâ. — Tuomareim kuru âmaemo tytyruneim modo, tuoguruneim modo warâ. Ilâpyryem olâ ise omarumo, âilumo lelâ warâ.

²²— Tuomareim kuru ise âmaemo. Iwerâ kulelâ mâjiewiâseolymo; ânguy izepa ato modo, tywykeduneim modo, tunâgueduneim modo warâ. Urâ Uguondo Kaynâpa Âetyby xurâem mawylymogue ise mâzenagazeolymo.

²³Arâ watay, tytywanzeba itaungâ, tuomare lelâ. Deus olâ eydâ tatodâ imâem âyanmo nhudulype, omazeânimoem nhekanâdybybe. Deus izepanro modoram mâzenagazeolymo. Alâ mykâinane akaemo idamudo lâpylâ Deus xunâry egatuwâni modo nhenagazedyly — kely.

²⁴Tynynâbaom modoram aguely lâpylâ: — Kaikâlâ ise âmaemo âdypeom modo. Iwerâ kulelâ omarumo. Ilâpyryenma ise tuomareba âmaemo.

²⁵— Kaikâ âmaemo iwerâ pyni sodo modo. Âsewinzeze âmaemo. — Kaikâlâ âmaemo iwerâ tuomareim, tyeileim warâ. Âjityenze, ohogüenze warâ âmaemo.

²⁶— Kaikâlâ ise âmaemo, Deus izepa ato aieni modoram âzehogueorim modo. Alâ pylâ mykâinane âdamudomoram iozepa kulâ Deus itaumbyry egatuwâni modo âzehogueoly — kely Jesus.

²⁷Aituo myani Jesus agueondyly eyanmo: — Ydataynrim modoram xirâ auguely. Âwynedânrymo agâ koendâ lelâ itaungâ, ataen-homo mâinwyneguylymo agâ matomo ara lelâ. Âewiâsenimo agâ koendâ lelâ itaungâ.

²⁸Ânguylâ âmeodoram igameduomo, âmeodoram igameinmobyry xurâem Deusram ekadaungâ koendâ lelâ nhetoem.

²⁹Mâjiwapagainhoduomo, tâpeânzeba itaungâ. MYRYK itaungâ, iladune âwapagain-homoem lâpylâ. Âgamizary âzemagazeoduomo, tâwâlâ âwalitoru nadâ lâpylâ.

³⁰Âyanmo âdylâ ekanibyryram âunduwâtaungâ. Ânguylâ âsejiguy nhemagazeduo, “Epywagâne” tâkezeba itaungâ.

³¹Koendâ itaungâ âkelomo agâ, agâmo koendâ awyse matomo ara.

³²— Koendâ lelâ itaungâ idânârâ agâ, ataen-homo agâ kulelâ inkâba. Agâmo koendonro agâ kulelâ koendâ mawylymo watay, âdyem nitaymba awârâ. Ânguy takazeno mâkeba âmaemo. Kurâdo inakai modo kuru tataen-ho agâ koendâmo lelâ.

³³Agâmo koendonro agâ kulelâ koendâ mawylymogue, “Deus koendonro kurâem xuduze, koendonro kydawylygue” tâkewâzeba itaungâ. Âdyem itaymba awârâ. Kurâdo inakai modo kuru, tagâ koendonro agâ koendâmo lâpylâ.

³⁴Ipywanimoem awyly mâuntulymoram kulelâ âdylâ mâundulymo-ro watay, “Deus âdylâ koendonro xuduze aguitobyry wâgâ” tâkewâzeba itaungâ. Deus einwântânry modo arâ adâisemo lâpylâ.

³⁵— Akaemo ara inkâba itaungâ. Inagazenimo agâ koendâ itaungâ. Koendâ lelâ xurâem aitaungâ, ipywadomo peba awylymo umelâ. Inagazenimo koendâ lelâ mâendylymo watay, ise Deus koendâ nhedylymo, koendonro nhuduly âyanmo warâ. Kurâ koendonro agâ kulelâba Deus koendâ awyly, kurâ inakanhe aini modo agâ lâpylâ, “Kagâ koendonro mâkeba Deus” kewâni modo agâ. Idânârâ agâ koendâ mataymo, Deus eynynonroem mawylymo âdutuoze.

³⁶Koendâ itaungâ, Kunwym kaynonro ara — kely Jesus.

³⁷Jesus aguely myani: — Ânguy kâzewentâdaundâ, Deus iwentâbyramo itoem lâpylâ. Ânguy kâdunâguedaundâ, Deus âunâguebyramo itoem lâpylâ. Âkelomo inakanhe aitobyry enanânehonwâdaungâ, Deus inakanhe amitomobyry nhygakehoem.

³⁸Âkelomoram ipa ato âunduwâtaungâ, tâwânrempa, Deus ize matomo nhuduhoem lâpylâ, saku kiampazezeduo, xumykadyly ara. Arâ lâpylâ ise Deus âyanmo imâem nhuduly, tâwânrempa mataymo. Imâem mâundulymo watay, imâenlâ ise Deus âyanmo nhuduly. Imâemba watay, imâembalâ ise nhuduly warâ — kely Jesus.

³⁹Aituo Jesusram âzenomedâolymo, aguely: — Epy, eagonro epy akobâniem nitaymba. Aidyly-ro watay, azakâlâ tyihuguezemo tâtagueim odaji.