Lucas 24:3-18

³isonga pag da et senggep, ngem magay dinatngan da sin awak Apo Jesus.

⁴Idi pinmipika das di, nasdanasdaaw da, nanpaila et di dowa ay lalaki ay mansilsilap di bado da ay nakipipika en daida.

⁵Nanyongo din babbabai begew si palalo ay egyat da, ngem kanan din doy lallalaki en daida, “Apay nga an-anapen yo din natago sin kad-an di natey?

⁶Iwed si Jesus isna, tan natago kasin. Ay nilinglingan yo din inbaga na en dakayo sin kad-an yo ed Galilea

⁷ay masapol ay maipolang din Anak di Ipogaw sin managbasol ta ilansa da sin krus, ngem matago kasin sin maikatlo ay agew?”

⁸Et pag dan nemnemen din inbagan Jesus.

⁹Mantaoli da pay et inbaga da sin sinpo ya esa ay pasolot na ya din iib-a da din naamag.

¹⁰Din ngadan di babbabai ay nay et da Maria Magdalena, Joanna, ya si Maria ay inan Santiago. Daida ya odom pay ay babbabai di en nangibaga sin aapostol sin naamag.

¹¹Ngem kanan din aapostol en taytayoktok et anggoy din inbagan di babbabai, isonga adi da pinati.

¹²Ngem si Pedro pay et nanagtag ay inmey sin kad-an di liyang. Domateng pay isdi, nanyakog-ong ay nangitining, ngem magay inila na powira din lopot ay inbotibot da. Pag somaa ay manganaanap sin nemnem na mo sino di naamag.

¹³Sin doy met laeng ay agew, mandad-an di dowa ay pasolot Jesus ay emey sin esa ay baryo ed Emmaus ay nasurok si sinpo ya esa ay kilometro din kaaddawi na ed Jerusalem.

¹⁴Idi mandad-an da, ngalngalaten da din maipanggep sin am-in ay naam-amag.

¹⁵Manngalngalat da pay yan inmasag-en si Jesus et nakiey en daida.

¹⁶Ngem olay mo inila das sisya, adi da naimatonan tan kaman nagodab mata da.

¹⁷Kanan Jesus en daida, “Sino di ngalngalaten yo dowan kayon mandad-an?” Sinmaldeng da et maila sin mata da ay mansasadot da.

¹⁸Pag kanan di esa en daida ay manngadan si Cleopas, “Anggoy mon samet si mantetee ed Jerusalem si adi makin ammo sin naam-amag isdi en dana ay agew ay nalabas.”