Lucas 23:38-49

³⁸Cruspa puntanchomi juc letreru queno escribirëcarqan: “Quemi israel nunacunapa reynin” nishpa. ˻Griegupa, romanupa y hebreupa parleninchomi escribishqa carqan.˼

³⁹Tsenam tsecho clabarëcaq jucnin mana alli ruraq nunapis Jesuspita burlacurnin, queno nerqan: —Qamchi Dios Acrashqan canqui. Mä, tseno carqa, quiquiqui salbacurïcur noqacunatapis salbarayämë.

⁴⁰Peru jucnin caqnam mana alli ruraq mayinta piñaparnin, queno nerqan: —¿Manacu Diosta mantsacunqui condenashqa quecarninpis?

⁴¹Noqantsicqa mana alli rurenintsicpitam quecho jipecantsic. Peru que nunaqa manam ni ima mana allitapis rurashqatsu.

⁴²Jesustanam queno nerqan: —Tëtalla, noqalläta yarpecamanqui yö mandaquiniquicho quecar.

⁴³Jesusnam nerqan: —Rasontam neq: Canantämi noqawan canqui paraiso nishqan shumaq cawaqui marcacho.

⁴⁴Tse öram pullan junaqpita asta lastrescamayaq patsa pasepa paqasyäcurcorqan.

⁴⁵Intipis manam atsicyarqantsu. Templu rurincho cortinapis tse öram ishqueman rachirerqan.

⁴⁶Jesusnam qayaricorqan queno nishpa: —¡Diosllä, qamtam almalläta qoycoq! Tseno nirirnam wanurerqan.

⁴⁷Soldaducunapa capitanninnam tsecuna pasacoqta riquecur Diosta alabarnin, queno nerqan: —Rasonpam que nunaqa alli ruraq cashqa.

⁴⁸Tseman ellucashqa llapan nunacunanam tsecuna pasaconqanta riquecur, allapa llaquiquiwan pechuncunatapis cutarraq cuticuyarqan.

⁴⁹Jesusta reqeq nunacunanam y Galileapita qatimushqa warmicunanam carullapita llapanta ricarar quecayarqan.