LUCAS 23:25-43

²⁵Wselaa Pilato Barrabás, men ne wlaan yra mén guin ne yláá, no por ne wzobnadil men mén nuu men chegyiib no por ne wket men mén. Lex wdekwent Pilato Jesus lo yra mén chen ylaa men Ne zegne rlaantee men.

²⁶Chene zano men Jesus ne ykaa men Ne lo kruz, nëz wtsëlo men te men-Cirene ne la Simon, den wberee men guin; lex wnëëz men men, wnegweey men men xekruz Ne, lex zanal men zhich Ne.

²⁷Ndalyaa mén zanal Ne no ndalyaa wnaa ne roon robtsaatee por ne nles nuu lextoo men por laa Ne.

²⁸Per wii Ne lo men, lex re Ne lo men: ―Wna-Jerusalén, goondet de por noo, sinke gugoon por laake de no le por zhiin de.

²⁹Porke sdxiin dxe ne gue de yra de: “Nzoon wnaa ne che nunla ne gapdet mëëd, nzoon wnaa ne axtegue wkaadet mëëd lextoo no le wnaa ne axtegue wguedxdet mëëd.”

³⁰Cheguin selo mén gue men lo gyeey: “Gugyab led noo”; no gue men lo bles: “Gugyixlaan noo.”

³¹Porke belne zeree rlaa mén yagyaa, ¿pezee ylaaleg men yagbidx?

³²No zano men txup ngbaan chen ykaa men men lo kruz yra men Jesus.

³³Chene wdxiin men ledne la Berxtoo Mengut, wkaa men Jesus lo kruz no wkaa ke men yrup ngbaan guin lo kruz: te men wkaa lo kruz ne zob koo Ne ladbëë, le ste men wkaa lo kruz ne zob koo Ne ladbëg.

³⁴Chene le Ne ka lo kruz, re Ne: ―Dëde, gugun men perdon porke nandet men pe rlaa men. Le yra soldad wa pwest gan txu yganen xab Ne.

³⁵Le yra mén ndxin nga rwii, no axtegue xtis rzhidxno Ne, re men: ―Wselaa ménree ste mén; orrenaa yselaa men men laake men, belne nli laa men nak Crist ne wxaal Dëdyuzh.

³⁶Zenga ke rzhidxno soldad Ne, rbig soldad rdee soldad binaguer goo Ne.

³⁷Re soldad lo Ne: ―Belne laa de nak xerrey men-Israel, guselaa de laake de.

³⁸Lex wkaa men leter xtoo xekruz Ne kon diz-griego, kon diz-latín no le kon diz-hebreo, re leter guin: “Laa xerrey men-Israel nee.”

³⁹No te ngbaan ne ka lo kruz wninyaan lo Ne, re men: ―Belne laa de nak Crist, guselaa de laake de no guselaa noo yrup noo zeree.

⁴⁰Per wakndux ste mén guin lo men, re men: ―¿Pe rdxedet de Dëdyuzh, no laake kastig ke gwa kadee de?

⁴¹Laa be rzëël be ne kayak be sufrir, porke zeree rgyizh be ne wlaa be, per le ménree bet ne mal wlaadet men.

⁴²Lex re men lo Jesus: ―Jesus, ynileedxchee de noo chene ydxiin de ledne ynebééy de.

⁴³Wke Jesus, re Ne: ―Nligue yna noo lo de, ne nedxekeree tsuu de ledne nuu Dëdyuzh yrup de noo.