Lucas 22:3-47

³Penga niyan, dimateng si Satanas diyà ki Judas Iscariote. Sikandin se sebad diyà te sempolò teg dowa tinoledaan i Jesus.

⁴Dimoton si Judas te menge pengolo te simbahan aw menge kapitan te otaw egtonggò te dakel simbahan te Jerusalem. Migpebelaw-belaway dan tepad te pegtolok din ki Jesus amon dekepen dan.

⁵Neluba dan, aw minikagi dan te doen kwarta ibegay dan kandin.

⁶Migsebad dan, aw yan migtagad si Judas te mèpiya aldaw amon itolok din si Jesus te wedad otaw metipon, amon wedad samok.

⁷Nayan, dimateng se aldaw te pegpengaen te menge Judiyo te pan kenà eglebag. Yan heman se aldaw te pegpengiyaw dan te nati te karniro kànen dan te Pista te Pegpelowà.

⁸Simogò si Jesus ki Pedro aw si Juan, kagi din, “Peg-inang kaw den te kànen tadon te Pista te Pegpelowà.”

⁹Mig-insà dan, “Kenan kay lay peg-inang?”

¹⁰Minikagi sikandin, “Eneng-enengi niyo ini. Aw domateng kaw doton te Jerusalem, kitaen niyo se otaw neniang te sibolan nepenò te wayeg. Taking kaw kandin. Aw domateng sikandin doton te balay,

¹¹ikagi kaw diyà te tig-apò, ‘Insogò kay te Pengolo amon meg-insà kay kamno aw kenan se kànan te kedita day te Pista te Pegpelowà.’

¹²Penga niyan, ipekità din diyà kenyo se dakel gibelayan kidoen diatas te balay tapay doen telepagan niyan. Peg-inang kaw te kànen tadon kidoen.”

¹³Penga niyan, dimoton dan aw kinità dan se kedita iling te tapay inikagi i Jesus diyà kandan. Penga niyan, mig-inang dan te kànen.

¹⁴Pegdateng te oras te pegkaen, dimoton si Jesus aw menge sogounun din, aw kimaen dan.

¹⁵Minikagi si Jesus, “Ontò a neibeg komaen te pista seini doma niyo, so agpet a den imetayan.

¹⁶Penenalan kaw te kagi ko. Eked a todà kaen te Pista te Pegpelowà singed aw metoman se kedegdagan niyan kidoen te peglowan te Timanem.”

¹⁷Penga niyan, inabat din heman se tabò, aw migpesiontong sikandin diyà te Timanem, aw minikagi, “Tepedi niyo ini amon mekeinem se kedita niyo.

¹⁸Penenalan kaw kanak. Eked a todà inem te ininem tadon seini singed aw metoman lomowan se Timanem.”

¹⁹Nengabat heman sikandin te pan. Penga te pegpesiontong din, binelà-belà din iyan, aw inteped din diyà kandan, aw minikagi, “Se pan seini, yan se lawa ko imetayan amon mekelowà kaw. Inangi niyo iling kani amon gayed a niyo keeneng-enengan.”

²⁰Penga te pegkaen dan, inabat din heman se tabò aw minikagi sikandin, “Se meinem seini, yan se pengilala te doen kaling peokit ininang te Timanem pineokit te dipanog ko amon tebangan kaw.

²¹“Meneng eneng-enengi niyo ini. Migdoma kanak dini se otaw megtolok kanak.

²²Imetayan a Timanem Migpekeotaw, so yan se ibeg te Amay ko. Meneng mekelelayò se otaw megtolok kanak.”

²³Penga niyan, migpeinsaay se menge tinoledaan din aw sinu se megtolok kandin.

²⁴Nayan, migpedindilay heman se menge tinoledaan din aw sinu se ontò melangkaw diyà te kedita dan.

²⁵Yan minikagi si Jesus, “Gayed egleges se menge selotan te menge sakop dan, aw ibeg dan iduyun dan tandà te keido dan.

²⁶Meneng eked kepakay aw meg-iling kaw kandan, so se melangkaw otaw diyà kenyo, yan se keilangan meinang iling te adi niyo. Se pengolo niyo, yan se keilangan meinang iling te sogounun niyo.

²⁷Aw doen otaw komaen kidoen te lemisa, aw doen heman otaw egtelaban kandin meglamak te kànen, netegahan niyo te labi pa melangkaw se otaw egpenenoo. Meneng pengkey siak se Pengolo niyo, meneng iling a te otaw egsogoen niyo.

²⁸“Pengkey medita se kelimahan ko, meneng sikiyo se gayed timaking kanak.

²⁹Migpunù se Amay ko te siak se lomowan, aw megpunù a den heman te sikiyo

³⁰se megdoma kanak te pegkaen ko kidoen te peglowan ko. Sikiyo heman se isawol ko lomowan diyà te sempolò teg dowa pongan te menge bowad-bowad i Israel.”

³¹Penga niyan, minikagi si Jesus diyà ki Pedro, “Simon, penenalan ka kanak. Pinemoyò i Satanas diyà te Timanem amon megtandà kenyo, iling te inangen te otaw meg-etap te omay trigo.

³²Meneng migtawal-tawal a diyà te Amay ko tepad kamno amon gayed ka somalig diyà kanak. Pengkey tominàyog ka kanak te eked kenamay, meneng aw todà ka tomaking kanak, meketabang ka te menge doma no tinoledaan ko.”

³³Minikagi si Pedro, “Pengolo, neketagad a den tomaking kamno pengkey kelebosowen a aw imetayan a.”

³⁴Minikagi si Jesus, “Pedro, penenalan ka kanak. Te eked pegkolaak se manok kealdaw iselem, ibolon no se pegtaking no kanak te meketelo.”

³⁵Nayan, minikagi si Jesus diyà te menge tinoledaan din, kagi din, “Kedengan, insogò ko sikiyo megtoladà, meneng doen impunù ko te wedad kedònan ibingen niyo, pengkey kwarta aw kelepì, aw sepatos ekasan niyo. Indani a niyo. Nelimahan kaw lay so wedad kedònan niyo?” Timaba dan, “Wedà kay palos kelimahi.”

³⁶Minikagi si Jesus, “Meneng lekat seini, aw doen kwarta niyo aw kelepì, ibingi niyo. Aw wedad ibayad niyo te podok, keilangan ibeligyà niyo se saol amon mekebayad kaw.

³⁷Metoman den se kagi te Timanem insolat tepad kanak, ‘Ipelumun sikandin iling te otaw dakel se salà.’ Agpet a den imetayan, so yan se insolat tepad kanak.”

³⁸Minikagi dan, “Meneng Pengolo, doen dowa podok tadon seini.” Meneng so wedà dan pekelabet, minikagi si Jesus, “Pebeyai niyo.”

³⁹Nayan, nesayo si Jesus aw dimoton te bontod te Olibo, so melikit sikandin egdoton. Timaking heman se menge tinoledaan din.

⁴⁰Pegdateng din doton, minikagi sikandin, “Pegtawal-tawal kaw amon eked kaw keboyo.”

⁴¹Penga niyan, dimeleg si Jesus te kenà mediyò. Limongken sikandin aw migtawal-tawal, kagi din,

⁴²“Amà, aw mepakay diyà kamno, eked a no peokiti te kelimahan seini. Meneng ibeg ko, kamno ibeg se metoman, kenà kanak.”

⁴³Penga niyan, doen anghil insogò lekat te langit amon megpekagsen te pedowan din.

⁴⁴Ontò mebegat se pedowan din, aw yan se doun te ontò sikandin migtawal-tawal. Ontò sikandin pig-etingan iling te pegtedak te dipanog.

⁴⁵Penga te pegtawal-tawal din, dimoton sikandin te menge tinoledaan din, aw timedogi den dan, so migkelomay dan tandà te lidò dan.

⁴⁶Linoka din dan aw minikagi sikandin, “Tay law. Nepela a so timedogi kaw. Enaw kaw den. Pegtawal-tawal kaw amon eked kaw keboyo.”

⁴⁷Telobo pa minikagi si Jesus, dimateng se medita otaw kidoen. Inibing dan i Judas, sìyan tinoledaan i Jesus. Migpedapag sikandin diyà ki Jesus amon mengadek kandin.