Lucas 1:38-80

³⁸Siminabat si Maria, “Torobolono tang Gino. Balampa mainabo ong yen tang inaning mo.” Ig nagalin da tang anghil.

³⁹Pagatapos ta si, nagapora si Maria ang napaning ong tatang lansangan don ong kabobokidan tang probinsia tang Judea.

⁴⁰Pagakabot na ong balay da Zacarias, kinomosta na si Elisabet.

⁴¹Asing pagabasi ni Elisabet tang bosis ni Maria, pisan ang kiminaliek tang mola ong sian na. Ginaeman si Elisabet tang Ispirito Santo,

⁴²ig ong sobrang kalipay na naiteg tanandiang ganing, “Yawa Maria, pinalabia ong tanan ang babay, ig pinalabi ka tang aggekel-ekelan mo ong sian mo.

⁴³Angay bato ong yen sindol tang dengeg ang na, ang yo bisitaeno tang nanay tang yen ang Gino?

⁴⁴Gata-wanan mo, pagabasio lamang tang bosis mo, pisan ang kiminaliek tang mola ong siano ong sobrang kalipay na.

⁴⁵Ig yawa masoirtia mandian tenged nagparetang mainabo tang inaning ong nio tang Dios.”

⁴⁶Dayon ang minaning si Maria, “Agdayaweno tang Dios ong popotokono,

⁴⁷ig galipay ta mo-ya tang nemo ong bindoat tang Dios, ang yen ang Maniglibri.

⁴⁸Tenged yo tang pinilik nang inaloyan, maski yo, torobolono lamang nandia. Ig mimpisa mandian, maning tang tanan ang taw ang yo, pinalabio tang Dios

⁴⁹tenged makabebereng tang mga bagay ang bindoat ong yen tang Dios ang Makagagaem. Sagrado tang aran na!

⁵⁰Gate-bekan na tang tanan ang pamaggalang ong nandia mimpisa pa asing tokaw, mandian ig asta ong parakaboton.

⁵¹Pinaita na tang gaem ig poirsa na, Ig pinalin na tang mga taw ang alawig tang pabetang nira ong sadili nira.

⁵²Pinababak na tang mga taw ang alalawig tang katengdanan nira, Ig pinalawig na tang mga taw ang dibabak tang pagkabetang nira.

⁵³Pinaelen na ta mga mo-yang bagay tang mga gangaletem, Piro pinalayas na tang mga manggaden ang anday nae-lan nira.

⁵⁴Sinabangan na itang mga inampo ni Israel, itang mga torobolon na, sigon ong pangako na ong mga kamepet-mepetan ta.

⁵⁵Inate-bekan na si Abraham, asta itang mga inampo ni Abraham ang anday kataposan!” Asia tang pagdayaw ni Maria ong Dios.

⁵⁶Mga tolong bolan ang nagtinir si Maria ong da Elisabet ba-lo tanandia minolik.

⁵⁷Kiminabot tang oras ang mangana ra si Elisabet, ig nangana tanandia ta tatang molang lali.

⁵⁸Pagabalita tang mga kamalay ig mga kaparintian na ang inate-bekan tanandia ta mo-ya tang Dios, nangalipay ka tanirang aroman ni Elisabet.

⁵⁹Asing yawalo rang kaldaw, namansipaning tang mga taw ong balay, tenged torian da tang mola, sigon ong kaogalian nira. Zacarias din tang iparan nira ong mola, pario tang aran tang tatay na.

⁶⁰Piro ganing tang nanay na, “Indi! Juan tang iparan ong nandia.”

⁶¹Ganing tanira, “Yamo, anday kaparintian ming maning atan tang aran na!”

⁶²Animan sininiasan nira si Zacarias, ig sine-ma mga onopa tang galiliagan nang iparan ong mola.

⁶³Nama-dol tanandia ta masolatan, ig nagsolat ta maning ta na, “Juan tang aran na.” Ig nangabereng tanirang tanan.

⁶⁴Oman, golping nabitala si Zacarias, ig nagdayaw ong Dios.

⁶⁵Nangabereng ang pisan tang tanan ang kamalay nira ong nainabo, ig indi naboay nabantog tang mga bagay ang na ong bilog ang kabobokidan tang Judea.

⁶⁶Ang tanan ang nangabalita, dorong isip nira ig namagampang-ampang ang ganing, “Onopa bato tang loan tang molang na?” Tenged aggitaen nira nga ong nandia tang kagaeman tang Dios.

⁶⁷Si Zacarias, ang tatay ni Juan, ginaeman tang Ispirito Santo, ig dayon ang minitala ang ganing,

⁶⁸“Dayawen tang Gino, ang Dios tang Israel! Tenged sinabangan na ig linibri tang banoa na.

⁶⁹Sindolan ita ra nandia ta tatang makagagaem ang Maniglibri, tata ong mga inampo ni David, ang torobolon tang Dios asing tokaw.

⁷⁰Sinobol tang Dios tang mga sagradong propita na asing tokaw pa para magpatako ong yaten

⁷¹ang ilibri ita nandia ong mga kasoay ta, ig ong gaem tang tanan ang mga pamandegdeg ong yaten.

⁷²Minaning tang Dios ang ate-bekan na tang mga kamepet-mepetan ta, Ig tomanen na ono tang sagradong inigoan

⁷³ang bindoat na ong kamepet-mepetan tang si Abraham. Nangako tanandia

⁷⁴ang ilibri ita nandia ong mga kasoay ta agod mapagsirbi ita ong nandia ang anday eled ta,

⁷⁵ig para magimong limpio ig mato-lid ita ong pama-dek na, mintras gaboi ita pa.

⁷⁶Ig yawa, anao, goyana ta propita tang Kalawig-lawigan ang Dios. Tenged tongkawa ong Gino para simpanen tang dalan ang panawan na.

⁷⁷Yawa tang magpatako ong banoa tang Dios ang patawaden na tang mga kasalanan nira, ig ong maning ta si malibri tanira.

⁷⁸Tenged masine-bekanen ang enged tang Ampoan tang Dios. Papaningen na ong yaten tang Maniglibri ang magalin ong langit, ig ang pagkabot na magkapario ong kaldaw mga te-la ra.

⁷⁹Tenged magtorol tanandia ta kayagan ong mga taw ang gangabo-wan ong maki-lep ig ong gaem tang kamatayen. Ig antabayen ita nandia ong dalan tang kao-yan.” Asia tang binitala ni Zacarias.

⁸⁰Nambael tang molang si Juan ig namoirsa tang sinangoni na ig pinabaked tang Gino tang nem na. Ministar tanandia ong kabobokidan, ong logar ang anday gistar ang taw, asta ong kaldaw ang magpaita ra tanandia ong mga inampo ni Israel para magtoldok ong nira.