Lucas 18:26-38

²⁶Minikagi se menge doma otaw dimineg kenyan, “Aw iling kenyan, wedad palos otaw mekelowà lekat te pelumun te Timanem.”

²⁷Timaba si Jesus, “Betogen te Timanem se eked kebatog te otaw.”

²⁸Minikagi si Pedro, “Meneng sikami, tinenanan day den se kedakel te kedònan day amon tomaking kay kamno.”

²⁹Minikagi si Jesus, “Eneng-enengi niyo se kagi ko seini. Se otaw timanan den te kedònan din, aw esawa din, aw kedowa din, aw amay din, aw inay din, aw batà din, amon megtoladà te doma otaw tepad te peglowan te Timanem,

³⁰yan se metoman kominawà te ontong labi pa dakel diyà te tinenanan din dalem te eked pa kematay, aw penga niyan, begayan heman sikandin te kaling pedowan wedad temanan te modi aldaw.”

³¹Nayan, migtipon si Jesus te sìyan sempolò teg dowa tinoledaan din, aw minikagi sikandin, “Na, domoton kidon den te Jerusalem amon metoman se kedita te pakang insolat te menge telekeliwat te kagi te Timanem tepad kanak Timanem Migpekeotaw.

³²Metoman a ibegay diyà te belad te menge otaw kenà Judiyo. Kebebeyatan a, aw pemilangen a, aw teptepan a.

³³Bedasen a dan, aw penga niyan imetayan a dan. Meneng meantay a lekat te nematay te iketelo te aldaw.”

³⁴Meneng wedà pekelabet se tinoledaan din te sìyan inikagi i Jesus. Wedà petega-tegahi se kedegdagan niyan diyà kandan, aw yan se doun te wedà dan pekelabet.

³⁵Pegkedapag i Jesus doton te lonsod te Jeriko, doen otaw bota nenenoo kidoen te kilid te dalan aw egpemoyò.

³⁶Pegdineg din te medita otaw limaklak, mig-insà sikandin aw eden se neinang.

³⁷Minikagi se menge doma, “Minokit dini si Jesus tege Nasarit.”

³⁸Penga niyan, timawal sikandin, “Jesus, bowad-bowad i David, keidowi a bag.”