Lucas 12:4-18

⁴ana betsa jaki chiti ikabu yuikin: —En jaibuaibuun, ana matu yuinun ninkakanwen. Tsuabunda matun yuda besti tenantidubuwen dateyamakanwen, tenanxun matu ana ichakawapaketidubumakidan.

⁵Jakia jaki besti mesei man datekubainunbun matu yuinun ninkakanwen. Tsuanda matun jiwea tenantan chi nukaismanu jawen kushipawen matu yunutidu bestiki mesei datekubainkanwen, Dioskidan. Chanima en matu yuiaidan, ja bestiki datei mesekubainkanwen.

⁶Jaska inun, isa mishtin meken besti bikin pei jexe pishta dabeswen bitidubuki, kadumadan. Jabiaskabiaken isa tibi tanai Dios jakimaismaki.

⁷Jamen matun bu dasibi midimabiaken Diosun ma tana keyumistun isa mishtin ichapa bechipaibiakin Diosun isa mishtin binumakin matu bechipaijaidamiski. Jaskaken jawaki dateyamakubainkanwen— iwanan,

⁸ana jatu yusinkin: —Tsuabunda ea ikunwain dakeama ea datan akin yudabu jatu yuikin: “En Jesúsunaki”, ikubainmisbu eandi Diosun nai tsumabu bebun nixun mekekin: “Nadan, enabuki”, akin en jatu yuixunxanaii.

⁹Jakia tsuabunda ea chibanma en janchaki dakei: “En Jesús ikunwanmaki”, eki ikubainmisbudan, eadi Diosun nai tsumabu bebunxun: “Nadan, enabumaki”, akin en jatu janchaxunamadi ixanaii.

¹⁰Jamen tsuabunda en matun Juchi Kayabi Iyua ea yuanbiaibun Diosun jatun chakabu buaxuntiduki. Jamen betsadan, tsuabunda Diosun Yushin Pepa yuainbu jatun chakabu Diosun buaismaki.

¹¹Jaska inun, matuki sinatakin jau matu kupinunbun jatun ichati jiwe anu kasmai xanen ibu betsa anu kasmai matu iyuxun jatun xanen ibubu anu matu nichianbu: “¿Jadakidi yuixanpa?” iki dateyamaxankanwen.

¹²Matu jaska waibu jabiatian matu janchamakin Diosun Yushin Pepatun matu unanmakin jaska matu janchamaxanikiki— jatu waya

¹³januxun mapuabu anuxun juni betsan jau Jesúsun ea medabewanun ixun yuikin: —Yusinaan, en ibu mawashinken en juchin jawen mabu ea paxkaxunamaki. Jau ea paxkaxunun ea yuixunwen— aka

¹⁴nemakin Jesúsun yuikin: —En matun xanen ibumaki. Jaska watan en matu paxkaxuntidumaki— iwanan,

¹⁵yudan kaian yuikin: —Man mabuwen kemuaidan, matu yuinun ninkakanwen. Man mabuyabia jatun matu jiwematidumawen taea jamapai mabu shadabu besti bechipai ja jayanun ika man kemukunkainaidan, uindakanwen— iwanan,

¹⁶januxun jaskakidi miyuiwen jatu yusinkin —Juni betsa mabu midimayatun jawen bai anu yunu betsa betsapa waxun ichawatan

¹⁷jawen shinanen shinankin: “En xekiwan midima en jani adutidumaki. ¿Jaska waxanpa?” iwanan,

¹⁸“En shinanan, en xekiwan aduti betsa betsapa apakin keyutan ana janu aduti jiwe ewapa wakin janu en xekiwan inun en mabu en aduxanaii”.