Lucas 12:33-58

³³Boligya row kos koniyun korotuwan woy boggoy row riyot worowora iddos bayad tadda. Na ukit ka‑ay, od pokolimud kow riyot datas to langit to korotuwan no diid korattan woy diid kowora, oyyos dutun, waa en minuvu nod ponakow woy waa od kotkot.

³⁴Su otik ingkon nokota‑aw kos koniyun korotuwan, diyon en mandad kos ginawa row.”

³⁵Na mid ungketen pe‑en si Disas to, “Ko‑ilangan no nopanoy kow inaayun iling to mgo sudsuhuwon no waa ran ovukki kos mgo suu ran.

³⁶Ilingi row iddos mgo sudsuhuwon no nopanoy to kod‑inguma to amu ran no pomon diyot kosalan, amoy ahad kannu sikandin od inguma woy'd ponoktok, go‑os dan sikandin od kolukatan.

³⁷Moppiya kod kotomanan taddot mgo sudsuhuwon no diid tintinuhon nod aangat to kod‑inguma to amu ran. Bonnaavonnaa nod ikohiyon ku koniyu, no od po‑unsaron taddot amu iddos mgo sudsuhuwon woy sikandin kos od sondad kandan.

³⁸Ahad tongngovulli o asow ron od ka‑allow nod ko‑umannan din iddos mgo sudsuhuwon no waa id tintinuhon, moppiya kod kotomanan dan.

³⁹“Poomdomma row ini. Otid kosorollan to komunoy to baoy ko kannu od inguma kos tokawon, od bantoy en sikandin amoy dii od poko‑usok iddon tokawon.

⁴⁰De‑en sikiyu mandad, ko‑ilangan no nopanoy kow, su siyak no Anak to Minuvu, od inguma en diyot timpu no waa kow id imman nod inguma a.”

⁴¹Na kahin Pedro to, “Longaggon, moka‑atag taddot ponunggelengan no id nonaw ru, atag da vo idda konami o atag to langun?”

⁴²Mid tavak si Disas ukit to ponunggelengan, kahi rin to, “Iddos sudsuhuwon nod kosolihan woy moraom kos koovottan, sikandin kos od solihan to amu to kodtamong to duma rin no mgo sudsuhuwon woy to kodtaadtaad to koka‑an dan diyot ollog no timpu.

⁴³Moppiya kod kotomanan taddot sudsuhuwon, no riyot kodlivod to amu rin, od kokita no id puung sikandin taddot langun nid popuungan kandin.

⁴⁴Bonnaavonnaa nod ikohiyon ku koniyu, no id salig en taddot amu iddos langun no koruwonnan din diyot od kosolihan no sudsuhuwon.

⁴⁵Piru ko morat iddon sudsuhuwon, od popoomdom sikandin to, ‘Kouhoy pa od uli kos amu ku.’ Na, od pomodasan din iddos duma rin no mgo sudsuhuwon ahad iddos mgo ba‑ay woy iyon din da en od puungan, iddos kodka‑an woy kod‑oinom duma to mgo polohubug.

⁴⁶Na, od inguma iddos amu rin diyot allow woy uras no waa rin immana. Iyon din od ingumannon, iddos moka‑arat‑arat no kodsilut woy id poommung sikandin taddot mgo minuvu no diid pomakoy no riyot lugaa no waad tomanon kos koosayan.

⁴⁷“Dos sudsuhuwon no nokosaddoo taddot id suhu to amu rin, piru waa rin puungi, od ingumannon din iddos movoggat no silut.

⁴⁸Piru iddos sudsuhuwon no waa nokosaddoo taddot id kopi‑i to amu rin woy nokopuung sikandin to saa, mahan da kos silut kandin. Dos ahad ondoy no id solihan to dakkoo, od sukutan mandad to dakkoo. Woy iddos id solihan to lampas pe‑en no dakkoo, lampas pe‑en mandad kos od sukuton kandin.”

⁴⁹Na mid ikahi mandon si Disas to, “Id undini a to ampow't ingod nid piyod to apuy woy id kopi‑i ku nod lotomman don en ini.

⁵⁰Piru od ukit a to mo‑uraan kodposuppit woy diid lonna kos ginawa ku taman tod kopongnga idda.

⁵¹Yo row poomdomma no mid undini a amoy duwon kosunayan ka‑ay to ampow't ingod! Su iyon bonnaa, od kova‑ad iddos mgo minuvu pomon koddi.

⁵²Pomon ko‑ungkay, od kova‑ad kos pomilya. Ponunggeleng, iddos pomilya no duwon limmon sakup, dos otollu, od supak taddot oruwa woy dos oruwa, od supak tat otollu.

⁵³Dos amoy, od pokodsupak taddot anak din no mama, ungketen dad en mandad iddos inoy woy dos anak din no ba‑ay. Idda mandad so onuhang no ba‑ay woy dos moka‑amung din no ba‑ay, od pokodsupak.”

⁵⁴Na mid ikahi mandon si Disas diyot mgo minuvu to, “Otid kokita row nod mosukirom kos souhapun lomig tid saop, od ikahi kow no, ‘Asow ron od uran.’ Na diid kouhoy, od uran en.

⁵⁵Otid kokaamag pomon diyot boovahan, od oungketen kow to, ‘Od tollak be‑en moho ko‑ungkay,’ woy od kovonnaa en idda.

⁵⁶Sikiyu no oray'd po‑uvag‑uvag! Od kotuig kow nod otuk to timpu ukit to kod‑ontong dow to livuta woy ko‑oowayan, piru mambot dii kow moho od kotuig nod otuk to kohulugan to mgo kotomanan to inin timpu?”

⁵⁷“Mambot dii kow moho od poko‑anong‑anong ko ondan kos ollog nod puungan dow?

⁵⁸Ponunggeleng, otik duwon minuvu nod popenek to kasu kuntra kikow, noonokkaliyu nod pokod‑uli kow to dii kow pa od inguma riyot tohodhukum. Su otid poko‑uma kowd dutun, saddook od goyoron ka nikandin po‑undiyot hukumanan, woy id boggoy ka to tohodhukum diyot pulis woy id poprisu ka.