Lucangundru 22:10-49

¹⁰Nau pudlangu jatana wonti: “Mai, judla ngurani wirinani, kana kulno judlangu mandurila nganai, nulu ngapakoko mandrai; nunkangu karipaterialumai pungaia, woderi nau wiriai,

¹¹Ja punga ngamalkanietjani jatalumai: Ngujangujara jinkinietja jinkangu jatai: Woderi tajini piri nganai, nunkangu ngato Passa kuparu ngakani milintali tajinanto?

¹²Ja nulu judlangu tajini piri pirna, matja ngankingana wondrala nganai, naka nina ngankingalumai.”

¹³Pudla matja wapana, pudlali jeruja mankamankana wonti, worderu Nau pudlangu jatana warai: ja pudlali Passa kuparu ngankingana wonti.

¹⁴Ja ditji matja wokarana, Nau ngamana ngarina wonti, ja Apostel marapratjana ja mandru nunkangunto.

¹⁵Ja Nau tanangu jatana wonti: “Ngani wolkareli ja ngalkujeli nganana warai ninapini Passa kuparu jurangu jelali tajila ngakani ketjaketjanani ngopera.

¹⁶Ngangau ngani jurangu jatai: Ngato ninaia wata morla tajila nganai, jenia Godaia mililani morlalu pantjinantulu.”

¹⁷Ja Nulu koko patana wonti ja jurakokana wonti ja Nau jatana wonti: “Ninapini patanau ja jura muntali puntibijiribamalianau.

¹⁸Ngangau ngani jurangu jatai: Ngato wata morla waina nindri tandrandru tapala nganai Godaia milila wokaranantulu,”

¹⁹Ja Nulu buka patana wonti ja jurakokana wonti ja nina wokaribana wonti ja tanangu jinkina wonti ja jatana wonti: “Naupini ngani palku nganai, ninaia ngani jurangu jinkiteriai; jeruja ngankanimai ngakangu ngundrala!”

²⁰Jeruja bakana koko tajinani ngadani, ja jatana wonti: “Naupini koko Testamenta marra nganai ngakani kumarani ninaia ngani jurangu nangateriai.”

²¹Ja mai, ngakani wontawontanietjaia mara ngakangunto kurlini nganai.

²²Ja Kanaia Ngatamura wapai worderu morlalu kurana wonti; ja jakajai nunkangupara kanani, nulia ninaia wontawontala nganai.

²³Ja tanali wonina wonti jakalkijiribamalila, warlenulu tanangundru nganai, nulia jenia ngankala nganai.

²⁴Tana bakana jatamalina wonti jendrangundruja, worananau morla pirna nganai tanangundru.

²⁵Nau tanangu jatana wonti: “Kana wolaraia kaparali tanangu jirijiribai, ja ngurula ngamalkanietja tanani tanali dikai: “kapara ngumu.”

²⁶Jura wata jeruja, a-ai, worananau morla pirna jurangundru nganai, wakani jeribaka pantjinanto; ja kapara milini jeribaka.

²⁷Ngangau worananau morla pirna nganai, nau kurlini ngamai kara, nau mili nganai kara? Wata jeruja nganai, nau kurlini ngamai? Ngani jurangu terti nganai mili jeribaka.

²⁸Jura tanaia nganai, tanaia ngakangunto wonki nganana warai ngakani wontjanani;

²⁹Ja ngato jurangu milila jinkiai, worderu Ngaperali ngakanali matja jinkina; ngangau jura tajinanto ja tapananto ngakani kurlini mililani ngakanani.

³⁰Ja jura kaparaia pirini ngamala nganai Israelani kapara marapratjana ja mandruni kalala kurala.”

³¹Kapara jatana wonti: “Simoniai, Simoniai, mai, Satanali wontjana warai jurana buka tandra jeribaka tarauala.

³²Ngani jinkangundru ngatjina warai, morlalu ngundrana jinkani wata mudananto; ja jidni ngadani matja madlentjandru karitjina, ngatata jinkani ngurunguru ngankau!”

³³Nau nunkangu jatana wonti: “Kaparajai, ngani matja ngankaterina, jinkangunto bakana kanjangaria ja naria wapala.”

³⁴Nau jatana wonti: “Ngani jinkangu jatai Petrujai: Karari paia ngaperi wata jatala nganai, windrila jundru ngana pota parkulu jedieli worarala nganai ngana ngujamala.”

³⁵Ja Nau tanangu jatana wonti: “Ngato jurana marakala jinpanala, billi ja pailtji ja tidnaputa pani, jura palpa wata ngamalkanala?” Tana jatana wonti: “Pani.”

³⁶Nau tanangu jatana wonti: “Karari, warle billi ngamalkai, ninaia maniatimai, jeruja bakana pailtji; ja warlenulu wata ngamalkai, kati nunkani kalalaia jinkiatimai ja mardakirra burungankaiatimai.

³⁷Ngangau ngani jurangu jatai: Bakana jenia, mina ngakagundru morla dakanala parai, morlalu pantjinanto; jenia: Tanali nina madlentji ngankanietjani terti kurana wonti; ngangau mina ngakangundru dakanala parai, matja mudana.”

³⁸Tana jatana wonti: “Kaparajai, najiau ninkida mardakirra mandru parai!” Nau tanangu jatana wonti: “Matja.”

³⁹Ja Nau dunkana wonti ja maninindri mardawonpaia wapana wonti, worderu Nulu milingeru ngankana wonti; ja nunkangu bakana mili nunkani karipaterina wonti.

⁴⁰Nau pirini matja wokarana, Nau tanangu jatana wonti: “Ngatjianimai jura wontjanilani wiriati.”

⁴¹Ja Nau tanangundru kulnulu tjiringana wonti, diani marda worita jeribaka, ja pantjaterkana ngarina wonti ja ngatjina wonti ja jatana wonti:

⁴²“Ngaperiai, jidni jertapaterinani ninapini koko ngakangu wirilkingala; wata jertapaterina ngakani, a-ai, jinkani pantjinanto.”

⁴³Angela kulno pariwilpandru nunkangu wondraterina wonti nina ngurunguru ngankala.

⁴⁴Ja Nau naritirimalini wirinani, Nau morla parparali ngatjina wonti; ja kangu nunkani kumari jeribaka ngakana wonti.

⁴⁵Ja Nau ngatjinandru matja terkana tarana, Nau milini nunkanani wokarana wonti, ja Nulu tanana ngaurongaurojeli mukaturaranani mankamankana wonti,

⁴⁶Ja tanangu jatana wonti: “Minandru jura mukaturarai? Terkakanau ja ngatjianau, jura wontjanilani wiriati.”

⁴⁷Nau jenia jatanani, mai, kana wolara, ja Judas marapratjana ja mandrundru kulno, tanangu ngopera wapana wonti, ja Jesungu karakararina wonti nina manatapala.

⁴⁸Jesus nunkangu jatana wonti: “Judajai, manatapanali jundru Kanaia Ngatamura wontawontai?”

⁴⁹Tanali nunkangunto matja najina, mina pantjiati, tana nunkangu jatana wonti: “Kaparajai, ngaiani mardakirrali nandrananto?”