Loum 3:7-18

⁷Epedeme oplami haletapo epo atlowe sepena, “Na꞉ta mala-atlamde kokotapo Godta ikadepe koko siyapo tlo atlamhala kokoye botomastamdepo. Epedeme na꞉ta poka꞉dle koko halomdetapo Godta ka꞉dle koko mate hela꞉dle mate nati-ilipiye, ya꞉ asiyama poka꞉dena, na꞉ watle na꞉ batalimale asiyama hamiloweye.” Epapele tlope ipapele malamale haloweye poka꞉dena.

⁸Epame ma oplami haletapo epo atlowe sepena, “Di batalimale koko me-halomha꞉ha꞉lowa. Epalati ka꞉ka꞉dle kokotapo woyamelepe.” Amasiyama malamale epo momalamha꞉ha꞉loweye pta batalimana. Epapele tlope opa opitapo koko iye na꞉ta imuwayo depame na꞉ hi mate mala-atlamyapo. Epedeme ka꞉dena, ipapele so dla Godtapo yia꞉ batalimale asiyama hamiloweye.

⁹Epapedeme di Yu so dia꞉ tlo ka꞉ka꞉dle so depo ha꞉ha꞉mama po-Yu so tlo batalimale so depo ha꞉ha꞉ma꞉? Hao, pe-epapena. Epapele dulu dla na꞉tapo wua꞉ watle ma-atlamuwapo, Yu so mate epo po-Yu so mate dita yimkata batalimale dulu dla me-ha꞉ha꞉po.

¹⁰Ame adipalati, God yu bukatapo epo atlapo, “Oplami haletapo God mila꞉pi tle ka꞉depo pohalasema. Ka꞉dle oplami hale hawa ikadepe.

¹¹Epame God koko malastale oplami hale hawa ikadepe. Epame God totamalalo oplami hale hawa ikadepe.

¹²Ame adipalati, opa hapulomatapo God tle mo-kokotipo tamalemama sikemte batalipo ha꞉ha꞉po. Epapele dulu dla ka꞉depo halale oplami hale hawa ikadepe.

¹³Epame yia꞉ta yuhamde kokoye wabasi dulu tle hutallu woyamde epapele some halapo. Epame yia꞉ta yuhalë oloma edla mala-atlamale yu tlo atlamha꞉ha꞉po. Epame yia꞉ yu opiye ilama mitikape some opa dla wotiyalle hamimdepo.

¹⁴Epame yia꞉ alila hapuloma yimkadulo dla elle himha꞉ha꞉mama bulumale yu yuhamha꞉ha꞉mdepo.

¹⁵Epame yia꞉ yimkadulo potimolowe koko dla mo-dinapopo siyamdepo.

¹⁶Epapele dulu dla yia꞉ tamalemama wotiyalle koko mate epo upiyele koko mate yimkadulo watle hapimtamalemdepo.

¹⁷Epedeme yia꞉ dla yimkadulo mate sadepo ha꞉ha꞉lowe kokoye poyia꞉malamana.

¹⁸Epapedeme yia꞉ dla God wowota꞉le hawa ikadepe.”