Los HECHOS de los apóstoles 9:4-14

⁴Quiaj tajmiüc a Saulo. Condom tanguiay andeac nop nendeac, tapiüng: ―Saulo, Saulo ¿neol tapots meyamb ximbas mejcüy mejaw xique? ―aw.

⁵Nej, quiaj tapiüng: ―¿Jan ic teat? ―aw. Quiaj tasaj nej aaga nendeac quiaj: ―Xique aaga Jesús, leaw ique tenguial meyamb ombas mejcüy mejaw. Ngo majneaj mejcüy, cos andüy miün wüx imbas irang memongoch ngo majneaj, atnej nop jayats wacüx wüx atoel, quiaj atileran ―aj nej.

⁶Quiaj mbayaw, ancambeapmbeapeay. Tapiüng: ―Jow nganüy Teat ¿cuane indiüm mejaw naranga? ―aw. Quiaj tasaj nej Teat Jesús: ―Witiür, quiür itüch tiül aaga cambaj quiün. Quiaj apmesoic cuane netam merang ―aj nej.

⁷Ajcüwa monxey monquiiüb Saulo alombomoj quiaj, xeyay lambayajow aton. Cos anguiayayej andeac aaga nendeac, pero naleaing ngo maxomüw majawüw nejinguind.

⁸Quiaj witiüt tiüt a Saulo; pero wüx taleaaig oniiüg ngo maxom majaw nicuajind. Quiaj taquiüraab mamb, naneteteran owix, tamb andüy Damasco.

⁹Tajlüy quiaj er nüt ngo maxom majaw nicuajind nicuajind, ngo met, ngo manganeow.

¹⁰Tiül aaga nüt quiaj altiül Damasco nop minipilan Teat Jesús nenüt Ananías. Aaga naxey quiaj aleaic tajaw atnej aǘm, cos Teat Jesús tejüiquichay majaw nej. Tasaj: ―¡Ananías! ―aj. Ananías tapiüng: ―Sal ningüy Teat ―aw.

¹¹Quiaj tasaj nej Teat Jesús: ―Ernguialeateay, quiür iquiiüb aaga calle nasoic Naleainguiay, itün menguiay aniüng Judas. Alquiaj nop naxey nenüt Saulo naw Tarso, nej nganüy nganüy cam tenguial ataag orar.

¹²Nej aton lanüüch majaw atnej aǘm, nop naxey nenüt Ananías lajmel niüng nej axood, apmayac owix nej wüx omal nej, quiaj aprram oniiüg nej alinomb ―aj nej.

¹³Ananías wüx tanguiay aag ayaj, tapiüng: ―Teat, xique lananguiay xeyay nipilan andeacüw wüx aaga naxey quiaj, apiüngüw nej xeyay ngo majneaj teamarang wüx ombasüw minipilan tiül Jerusalén.

¹⁴Nganüy lapeay ningüy, ajamiün nawiig ocueajiw montangtang miteaats, quiaj alndom masap matsaag meáwan mondüüb ic ―aw.