Los HECHOS de los apóstoles 18:12-22

¹²Pero wüx Galión tarang nenajiüt tiül iüt Acaya, quiaj a judíos sonongotoj nóiquian mapiüngüw masapüw a Pablo. Quiaj tasapüw, taquiüjpüw mamb andüy awan.

¹³Condom quiaj tasajüw nenajiüt: ―Aaga naxey cam tenguial maquiaach ombeay nipilan müjchiw omeajtsüw Teat Dios, pero naleaing alinoic aquiaach, ngome atnej apiüng aaga poch tüünd Moisés ―ajüw.

¹⁴Pablo laámb apmendeac, quiaj tendeac a Galión masaj ajcüwa judíos: ―Sitiül aaga naxey quiaj ajiür alngün nisoet, tengwüy alngün xeyay ngo majneaj arang, najneaj sananguiay leaw apmepiüngan cuane arang.

¹⁵Pero nganüy cos ijcüyíünan mejawan ajcan aleaic aquiaach, ajcan andeac wüx minüt aljane, aton aag ayaj wüx poch leaw icona indüjpiün; pues ijawan coen ninguiaj, xique ngo nandiüm najaw wüx aag ayaj ―aj nejiw.

¹⁶Ndoj quiaj tawün nejiw tiül awan.

¹⁷Condom ajcüwa nipilan griego tasapüw a Sóstenes, nop nej natang tiül sinagoga. Tapots matoeliw nej quiaj mbeay awan. Aaga Galión ngo mapiüng nicuajind, masey teamajaw.

¹⁸Teat Pablo tacül tiül Corinto alacas nüt, condom wüx taw quiaj, tatepeay meáwan monyar andeac Teat Jesús monlüy quiaj, cas tamb andüy Siria amb tiül müx, taquiüjpüw nej mamb a Priscila y Aquila. Quiaj tambüw ambüw wüx iüt andüyiw Cencrea majtepiw tiül müx. Tiül Cencrea tajerep omal nej a Pablo nangwing, majüic nej lamarang leawa lamasaj Teat Dios apmarang. Condom quiaj tawüw quiaj, tambüw.

¹⁹Wüx tapeayiw tiül Éfeso, quiaj a Pablo tecueatayej maquiüjpüw a Priscila y Aquila. Ndoj nej tamb andüy tiül a sinagoga, mandeac maquiüjpüw nipilan judío.

²⁰Condom tasajüw nej macül quiaj xeyay nüt maquiüjpüw, pero nej ngo mandiüm.

²¹Wüx tandiüm maw quiaj, tatepeay nejiw, tapiüng: ―Netam namb najaw aaga nangos nüt laliüc majlüy tiül Jerusalén. Ndoj saliüc alinomb najaw icon sitiül Teat Dios mapiüng ―aj nejiw. Quiaj taw Éfeso amb tiül nadam müx.

²²Wüx tapeay Cesarea, quiaj tamb andüy Jerusalén, matepeay meáwan minipilan Teat Cristo monlüy quiaj. Ndoj naw quiaj, tamb andüy Antioquía.