LOS HECHOS 4:7-28

⁷Cottimeja rroanha na joajna para joiẍacoa Pedro co Juan. Co coín na Pedro co Juan ngosine para joanchianguihi na, co ndac̈ho na: ―¿Quehe joachaxin chonda ra, o quensen chjá ra joachaxin para jaha ra nchehe ra cain jihi?

⁸Cottimeja Pedro, conixin joachaxín Espíritu Santo, ndac̈ho ngain na: ―Soixin ra ẍo ttetonha ra ngain chojni Israel, co soixin ra ẍo chonda ra joachaxin ngain nihngo icha importante:

⁹jai soixin ra danchianguina ra ixin queẍén cjoenguijna na ná tti rrengo co queẍén jointtaxingamá na.

¹⁰Rrondac̈hjan na ngattoxon con ra, para que tsonohe cainxin chojni Israel ixin xí jihi que jí ngattoxon con ra, jehe xa xingamehe xa pero de ixin nombré co joachaxín Jesucristo tti joixin de rajna Nazaret. Co Jesucristo mé ẍajeho tti soixin ra joinchecrucificá ra. Co Dios joinchexechon jehe.

¹¹Inchin ndac̈ho ngain tti jitaxin Palabré Dios de ixin Jesús: “Jehe mé tti ẍo que soixin ra, ẍo ttette ra nchia, joinaoha ra. Pero jehe goan tti ẍo icha importante de ngain nchia.”

¹²Ni ná chojni nchao rrochjá na ján na iná vida naroa, ixin Dios ndac̈ho que ẍonhi iná chojni ngataha nontte jihi chonda joachaxin mé; jeho Jesús.

¹³Are cainxin nivaquetonha coinhi na tti nichja Pedro co Juan, jehe na goan na admirado ixin venohe na que Pedro co Juan venoeha ẍón jian, co ixin cayoi jehe na inchin chojni que ẍonhi chonxin. Pero masqui jamé, ẍaonha na para nichja na. Cottimeja vinttegatsoan na ixin cayoi nimé vacao na Jesús.

¹⁴Co tti xí que joinchexingamehe Pedro co Juan nttiha tajingattjen ngayé na, mexinxin c̈hoha joinchecaxin na Pedro co Juan ni ná cosa.

¹⁵Cottimeja coetonhe na Pedro co Juan vac̈hjeyexin de ngain na co jeho na vittohe na nttiha para cjoao na ixin queẍén sinchehe na.

¹⁶Co ndac̈ho na: ―¿Quehe sonttoho na ngain cayoi xí tehe? Cainxin chojni que te nttihi Jerusalén nohe na ixin cayoi xí tehe joinchehe milagro jihi. Co ján na c̈hoha rrondac̈ho na ixin ndoaha.

¹⁷Pero para tsonoeha icha chojni ixin quehe joinchehe cayoi xí tehe, ján na sonttoẍaon na de soen na para que iẍonhi chojni rronichjexin conixin nombré co joachaxín Jesús.

¹⁸Cottimeja vayé na Pedro co Juan para coetonhe na ixin c̈hoha rrondac̈ho na ni tsjago na conixin nombré co joachaxín Jesús.

¹⁹Pero Pedro co Juan ndac̈ho ngain na: ―Ẍaxaon ra, soixin ra, ¿andac̈ho Dios ixin icha jian jí si sitticanho na tti rrondac̈ho ra soixin ra co sitticaonha na tti ndac̈ho Dios, o ani nahi?

²⁰Janha na c̈hoha tsinttoa na de rronichja na cain cosa que vicon na co coian na.

²¹Cottimeja cain xittetonha nichja xa icha para joincheẍaon xa na, pero coanc̈hjanda xa Pedro co Juan para sacjoi, ixin ẍonhi razón vittja xa para rroquiaxinhi xa icha, ixin cainxin chojni nichja jian de ixin Dios are vicon na tti joinchehe Pedro co Juan.

²²Co tti xí que xingamehe de ixin joachaxín Dios vechonda icha que cuarenta nano.

²³Are Pedro co Juan ocoanc̈hjanda na, cayoi jehe na sacjoi na para tti vintte tti icha nirepresentanté Jesús co ndache na cain tti ndac̈ho cain xidána que vaquetonha ngain icha xidána, co cain nichonda joachaxin ngain nihngo.

²⁴Co are tti icha nirepresentanté Jesús coinhi cain yá, cain na joinchecoanxinhi na Dios, co ndac̈ho na: ―Ndodana na, soixin tti Dios, tti joinchechjian ngajni, co nontte, co ndachaon, co cainxin cosa que jí.

²⁵Co soixin tti ndac̈ho ngain Espíritu Santo para jehe joinchenichja xinchehe ẍá David. Mexinxin David ndac̈ho: ¿Quedonda cain nación toñao nganji? ¿Quedonda cain chojni ẍaxaon cosa que ẍonhi ẍé?

²⁶Cainxin xirey ngataha nontte co cainxin xittetonha coato chó xa para tsetocaho xa Dios co para tsetocaho xa Cristo tti coinchiehe Dios para rey, jañá c̈ho David.

²⁷’Co ndoa, ngain ciudad jihi Herodes, Poncio Pilato co chojni que joixin ojé nación, co chojni Israel coato chó na para coetocaho na Jesús, tti Xanha jian, tti soixin rroanha para ttjenguijna na.

²⁸Jañá joinchehe na cainxin tti soixin ndac̈ho are icha saho que chonda que rroguiconhe.