LOS HECHOS 2:9-14

⁹Nttihi ngayá na te chojni que joixin de Partia, Media, Elam, Mesopotamia, Judea, Capadocia, Ponto, co de ngain nonttehe Asia,

¹⁰de Frigia, Panfilia, Egipto, co cai te chojni que joixin de lugar ngain Africa que jí icha ndaha de ciudad de Cirene. Cai tsje chojni romano te nttihi. Co de cain chojni romano, canxion na goan na chojni judío, co icanxin na goanha na de razé chojni judío pero ditticaon na religioen chojni judío.

¹¹Cai jí chojni que joixin de Creta, co Arabia. Pero cainxin na ján na tettinxin na tti ndac̈ho jehe na ixin nichja na de ixin tsje cosa jian que Dios nchehe co nichja na cain ojejé nguigoaha na ján na.

¹²Co vinttegoan admirado cain chojni mé co noeha na quehe ẍaxaon na co joanchianguihi chó na, co ndac̈ho na: ―¿Quehe rroc̈ho cain jihi?

¹³Pero icanxin na cjoanoa na na co ndac̈ho na: ―Ixin diguinttecoan chojni yá, mexinxin jañá tec̈ho.

¹⁴Cottimeja Pedro conixin ittejngo representanté Jesús vingattjen co Pedro nichja sén co ndac̈ho: ―Chojni de nonttehe Judea co cainxin chojni que te ngain ciudad de Jerusalén, tonoha ra co ttinhi ra jian tti rrondattjo ra.