LOS HECHOS 2:7-29

⁷Te xíǎⁿ ío ní cuñúhu ñáyiu véxi dava‑gá ñuú, te ní xítnàhá‑yu: —Ñáyiu ducaⁿ xǐcáháⁿ cúǔ‑yu ñáyiu distrìtú Galìleá.

⁸¿Te nása ní quidé‑yu ní cutúha‑yu nàcuáa càháⁿ‑ó ɨ̀ɨⁿ ɨɨⁿ‑o ndéé lǐhli‑o?

⁹Te iha véxi ñáyiu dava nàcióⁿ, chi véxi ñáyiu Pàrtiá, véxi ñáyiu Mèdiá, véxi ñáyiu Èlám, véxi ñáyiu Mesopòtamiá, véxi ñáyiu Jùdeá, véxi ñáyiu Capàdociá, véxi ñáyiu Pòntó, véxi ñáyiu Àsiá,

¹⁰véxi ñáyiu Frìgiá, véxi ñáyiu Pànfiliá, véxi ñáyiu Ègiptú, véxi ñáyiu Áfricá ñáyiu ndècu ndéé núú‑gǎ‑xi ñuú Cìrené. Te tnàhá ñáyiu ñuú Ròmá véxi, te ñáyiu‑áⁿ chi ñá dɨ́ú mèe‑ni ñáyiu isràél cúǔ‑yu nchaá‑yu, dico ɨɨⁿ‑ni cùu sá dácuàhá‑yu.

¹¹Te véxi ñáyiu Crětá, véxi ñáyiu Àrabiá. Te nchaa‑o sa ndèdóho‑o càháⁿ‑yu nàcuáa cuáháⁿ tnúhu mee‑o ɨ̀ɨⁿ ɨɨⁿ‑o. Te nchaa ñáyiu xǐcáháⁿ tnúhu‑o càháⁿ‑yu cuèndá nchaa sá vǎ yǒo tnàhí ndàcu cada ní quide Yá Ndiǒxí —càchí‑yu xǐtnàhá‑yu.

¹²Te ní cuñúhu vìhí‑yu, te ñá ná sàá iní‑yu nása ní cuu, te xǐtnàhá‑yu: —¿Nása ní cuu duha càháⁿ‑yu tnúhu‑o? —càchí‑yu xǐtnàhá‑yu.

¹³Te davá‑yu ní sácú ndeé yíchí ñáhǎ‑yu, te xǐtnàhá‑yu: —Xǐxíni ñáyiu‑áⁿ nǔu ñá náhǎ‑yu tnúhu càháⁿ‑yu —càchí‑yu xǐtnàhá‑yu.

¹⁴Te ní ngúnutnɨ́ɨ té Pèlú ndɨhɨ úxí ɨɨⁿ cue tée ní táúchíúⁿ Jèsús dacuàha ñaha xii ñáyiu tnúhu‑gá, te níhi ní cáháⁿ‑dé, te xǎhaⁿ‑dě xií‑yu: —Nchaa nchòhó ñáyiu distrìtú Jùdeá ndɨhɨ nchòhó ñáyiu ñuú Jerusàlén, cundedóho váha‑ndo tnǔhu na càháⁿ‑í‑a.

¹⁵Ñá ndàá tnúhu càháⁿ‑ndó, chi ñá túú xǐni‑ndɨ́ te ducaⁿ càháⁿ‑ndó, chi davitna cùu‑xi caá ɨ́ɨ́ⁿ dátnéé, vátá tnàhá‑gá òré coho ñáyiu ndidí.

¹⁶Te yúhú ná càchí tnúhu‑í xii‑ndo vìtna nacuáa ní xáhaⁿ Yǎ Ndiǒxí xii ndíi Jòél tée ní xóo cáháⁿ tnúhu‑gá ndéé sanaha nàcuáa cada ñaha‑gǎ xii ñáyiu, te ndíi‑áⁿ nǐ chídó tnùní ndíi nàcuáa ní cáháⁿ‑gá.

¹⁷Te duha ní xáhaⁿ‑gǎ xii ndíi: Cùmání‑gǎ sáá nduu nàa ñuyíú, te cuáñaha‑ǐ Espíritú‑í cundecu ndɨhɨ nchaa ñáyiu na quɨ̀ndáá iní ñáhá xìi‑í. Te cue déhe‑yu cáháⁿ‑yu tnúhu‑í, te cue tée cuechi dacòto núú ñáhá‑xí xìi‑güedé, te ducaⁿ‑ni cuè tée ni sàhnu cáháⁿ saní‑güedé, te dɨu‑ni cuèndá nchaa sá quídè‑í ducaⁿ dàcoto núú ñáhá‑xí xìi‑güedé.

¹⁸Te nchaa ñáyiu xìnu cuechi núù‑í cáháⁿ‑yu tnúhu‑í, te cuáñaha‑ǐ Espíritú‑í cundecu ndɨhɨ́‑yu.

¹⁹Te ndéé andɨu, yàcáⁿ vài sá cádà‑í nàcuáa cuñúhu vìhí‑yu, te núú ñùyíú‑a cada‑í ɨɨⁿ sá vǎtá quìní tnàhí‑gá‑yu, te ngoyo nɨ́ñɨ́ te ngoyo ñuhú te quene vìhi ñúhmá.

²⁰Te vá dáyèhé‑gá nchícanchii, cuu nee ñuyíú te cuu tɨcuèhé núú yǒó dàtná tɨcuèhé nɨ́ñɨ́. Te dàvá‑áⁿ sǎá nduu quìxi Yaá cúú Xǐtohó‑yu, te nduu‑ǎⁿ cuu‑xi ɨɨⁿ nduu càhnu vihi, chi cada‑gá nchaa sá ñà túú xìní‑yu, te cuñúhu vìhí‑yu.

²¹Te òré xíáⁿ te nchaa ñáyiu càháⁿ ndɨhɨ ñaha xìi Yaá cúú Xǐtohó‑yu‑áⁿ naníhí tàhú‑yu. Duha ní xáhaⁿ Yǎ Ndiǒxí xii ndíi Jòél ní chídó tnùní ndíi.

²²’Te nchòhó ñáyiu isràél, cundedóho váha‑ndo tnǔhu na càháⁿ‑í‑a cuèndá Jèsús tée ñuú Nazàrét. Te Jèsús ní quide‑gá chìuⁿ Yá Ndiǒxí, chi mee Yǎ Ndiǒxí ní chindee ñàha‑gá ní quide Jèsús ná daha núú chìuⁿ, núu xíǎⁿ ní ndacu‑gá ní quide‑gá nchaa sá vǎ yǒo tnàhí ndàcu cada, te xíǎⁿ ní cuñúhu vìhi‑ndo. Te sa nàha‑ndo nacuáa ní quide‑gá cútnàhá ní xica cuu‑gá ñuyíú.

²³Te ndíi Jùdás ní taxi cuèndá ñáhá ndǐi Jèsús xii nchòhó cue tée ní cuu úhú iní ñáhá xìi‑gá, te ní ndúcú‑ndó cuè tée úhú iní‑xi ní tnɨɨ ñaha‑güedě xii‑gá te ní sata caa ñaha‑güedě núú cùrúxí, te núú cùrúxí‑áⁿ nǐ xíhí‑gá. Dico sa ní cutnùní iní Yǎ Ndiǒxí sá dúcáⁿ càda‑ndo Jesús, te mee Yǎ Ndiǒxí ní cachí‑gá sá dúcáⁿ ndòho Jesús.

²⁴Te dɨu‑ni mee Yǎ Ndiǒxí ní dándótó‑gǎ Jèsús, chi sa ní cáháⁿ‑gá sá òré cuú‑gá te vá cùú dúcáⁿ‑gǎ.

²⁵Te ndíi Dàvií tée ní xɨ́ndaha ñàha xii cue ñaní tnáhá‑ó nǐ xíndecu ndéé sanaha nǐ chídó tnùní ndíi nàcuáa ní cáháⁿ Jèsús, te duha ní cáháⁿ‑gá: Cùtnuní iní‑í sá ncháá ndùu ndecu ndɨhɨ‑í Yǎ Ndiǒxí, te ío chìndee ñaha‑gá xii‑í, te ñá túú tnàhí sá yùhú‑í.

²⁶Te ío ndàcáⁿ táhù‑í núú Yǎ Ndiǒxí chi cùdɨ́ɨ́ ìní‑í, chi sa nàha‑í sá cùú‑í dico ndoto‑í,

²⁷chi vá dáñá‑gǎ quɨ́hɨ́ⁿ dúcáⁿ àlmá‑í núú ndécú ñǎyiu ní xíhí, te vá dáñá‑gǎ téhyú yɨquɨ cùñú‑í chi cùu‑í Déhe‑gá, te yúhú sa nàha‑í sá cúú ìní ñáhá‑gǎ xii‑í.

²⁸Te sa ní cachí tnúhu‑gá nàcuáa cada‑í cundecu‑í ichi váha, te cuèndá sá ndécú ndɨ̀hɨ ñaha‑gá xii‑í nǔu ío cùdɨ́ɨ́ ìní‑í. Duha ní cáháⁿ Jèsús, te ducaⁿ nǐ chídó tnùní ndíi Dàvií.

²⁹’Te nchòhó cue ñaní tnáhà‑í, na càchí tnúhu ndáá‑í xii‑ndo cuèndá ndíi Dàvií tée ní xíndecu ndéé sanaha vìhi, chi ní xíhí‑dé, te ní chindúxi ñaha‑güedě, te nàha‑o tnavíí núú nǐ chindúxi ñaha‑güedě.