Los Hechos 2:14-30

¹⁴Limbamaj nuli lan apóstole jouc'a Pedro enaj'moƚtsi locuenaye lapimaye nomana' jiƚpe, ecaxoƚai'me. Pedro ipalai'ma ujfxi, ipalaic'o'mola' lefoƚya, timila': ―Capalaic'olhuo' jahuay imanc' olafot'ƚeyoƚtsi fa'a Jerusalén. Hualca imanc' noƚmana' fa'a olamats' Judea, locuenaye imanc' ocuena colamats'. Itsiya cami'molhuo', cuhuaƚc'e'e'molhuo' iƚe li'ipa. ¡Aƚquimf'eƚa'!

¹⁵’Imanc' toƚcuayi: Iƚnu'hua lan xanuc' joupa imeyojpola'. A'ij ƚinca loƚnespa. Itsiya apuqui'iya. Le'a apelƚa 'hora.

¹⁶Itsiya i'ipa to luya'apa Joel cal profeta. Iƚque uya'apa toƚta'a ti'i'ma, inespa:

¹⁷ȽanDios tuya'e': Iƚna'a ƚitiné, ai'a tijou'ma li'a ƚamats', iya' cumme'ma ƚai'Espíritu. Lan xanuc' ni petsi lomana' li'a ƚamats' tepenuf'me. Loƚnaxque' camijcanó jouc'a loƚnaxque' cahuats'la, tuya'a'me laifnu'iyacola'. Litine lolamijcanó tixim'me laifmuc'iyacola', lipuqui' litojpola' xanuc' tipaiyo'me, iya' capi'i'mola' quiƚpaiyo.

¹⁸Lan xanuc' jouc'a lacaƚ'no', pe nalimetsaicopa iya' iƚPoujna, iƚniya tepenuf'me ƚai'Espíritu, tuya'a'me laifmiyacola'. Ma' iya' cumme'ma ƚai'Espíritu, ticuaita pe lomana' iƚniya.

¹⁹Lan xanuc' tixim'me acueca' laifmuc'iyacola' fa'a li'a ƚamats'. Tehuenaf'le al toncay lema'a tixim'me al cueca'. Tixim'me to lajuats', jouc'a ƚunga, jouc'a juaiconapa quicuxis.

²⁰Ƚalapalai'enga' timufc'o'ma. Cal mut'ƚa ti'i'ma to lajuats'. Tijouƚa' ti'iƚa' toƚta'a ticuaihuo jiƚe Litine ȽanDios. Jahuay tixim'me acueca' Litine iƚe; acueca' juaiconapa lo'eya ȽanDios.

²¹Naitsi nojoc'iya ȽanDios, naitsi noxa'hueya titoc'iƚa', iƚque ƚinca tunƚu'ma.

²²’Imanc' ixanuc' Israel, aƚquimf'eƚa' laifnu'iyacolhuo': Cal xans Jesús ƚas Nazaret ma ȽanDios epi'ipa limane, toƚta'a imuj'moxi ma' anDios. Iƚque Jesús li'huamma icuaitsi pe loƚmana', i'e'ma al cueca', i'e'ma ma to lo'eya ȽanDios. Toƚta'a imuc'ipolhuo' naitsi ƚummepa. Joupa oƚsina' iƚe li'ipa.

²³Lijou'ma i'i'ma ma to quixina' ȽanDios lo'iya, ma to lixpic'e'ma. Iƚque cal xans Jesús ȽanDios icupa, epi'ipolhuo' imanc'. Imanc' oƚcu'me icuaitsi quiƚmane ts'iƚpenic'. Toƚmila' lan xanuc', iƚne pe aimihuejcoyi ȽanDios: “Tonlapaƚts'ijntsa lancruz”. Toƚta'a qui'ic' imanc' oƚma'apá.

²⁴Lijou'ma ȽanDios imaf'i'ina'ma. Aiquipo'nohuo quimac'. Unƚu'e'ma. Lamaya aiqui'ic' culiqui nulemma.

²⁵Li'ipa to linespa David mipalaicojma Jesús, tuya'e': Iya' aiximpa lo'iya, ƚaƚPoujna aimaƚpo'noya caituca'. Itine itine aƚmajm'me anuli, iƚque tipa'a al c'a camane, aƚtoc'i. Ailopa'a caƚspaic'eya.

²⁶Toƚta'a caxina amaf'ca ƚainunxajma'. Cuya'a'ma: Iya' tixoqui neta juaiconapa. Aixina' cuyaico'ma al c'a jouc'a laicuerpo. Tijouƚa' laipitine fa'a li'a ƚamats' cunxaj'ma tixoj'ma neta.

²⁷Iya' ƚai'alma aimaƚpo'noya pe lomana' lamizhua. Iya' o'huexi, ima' aiPoujna, aƚtoc'i'ma, laicuerpo aimihuet'ƚya.

²⁸Iya' aixina' laif'eya, joupa aƚmuc'ipa, culij'ma laipitine. Capajn‑na'ma pe lofpa'a, ima' toxhuai'ni'ma laixojcoya neta.

²⁹’Cunc'aipimaye, lapi'iƚa' lane capalaic'o'molhuo' al cuajmaica cataiqui'. Imanc' joupa oƚsina' li'ipa ƚaƚtatahuelo David. Iƚque imanapa, temuya. Lipu'hua tipanenni fa'a liƚya' Jerusalén.

³⁰Iƚque David aprofeta. ȽanDios u'i'ma lo'iya. Joupa epi'ipa cataiqui' imipa: Ima' lofcuxeya aimijouya. Ima' ti'i'ma itatahuelo cal Cristo iƚque ƚaifnummeya ticuxeƚa'. David aiquimenc'ejma iƚe litaiqui' ȽanDios limipa. Ixina' lo'eya ȽanDios, ipalaico'ma lo'iya cal Cristo, ticua timaf'ina'ma. Toƚta'a li'ipa. Iƚque cal Cristo ƚi'alma ȽanDios aiquipo'nohuo nulemma pe lomana' lamizhua, licuerpo aiquihuet'ƚqui.