LOS HECHOS 2:13-38

¹³Pero icanxin na cjoanoa na na co ndac̈ho na: ―Ixin diguinttecoan chojni yá, mexinxin jañá tec̈ho.

¹⁴Cottimeja Pedro conixin ittejngo representanté Jesús vingattjen co Pedro nichja sén co ndac̈ho: ―Chojni de nonttehe Judea co cainxin chojni que te ngain ciudad de Jerusalén, tonoha ra co ttinhi ra jian tti rrondattjo ra.

¹⁵Xí tehe dicoanha xa inchin jaha ra ẍaxaon ra, ixin jaxon ẍa ndoyo; nandá las nueve.

¹⁶Tti jaha ra vicon ra jaxon, jihi tti ondac̈ho profeta Joel are nichja co ndac̈ho:

¹⁷Dios ndac̈ho: ngain tiempo are ochiaon ndatsjexin mundo, rrorroanha Espíritu Santo ngain cainxin chojni. Co chjan sayé joajnana para rrondache xan icha chojni de ixin janha, co janha sinttaguicon xanxí co xannc̈hí tsje cosa ẍá are toxinxin xan. Co cain chojni que ojonchjan tsoxinxin tsje cosa de ixin janha.

¹⁸Rrorroanha Espíritu Santo nchanho mé ngain cain ninchehe ẍana. Co jehe na sayé na joajnana para rrondache na icha chojni de ixin janha.

¹⁹Co de ngajni noi tsjagoa na tsje cosa que vaguiconha chojni are saho. Co ngataha nontte tsjagoaxin na tsje señal. Tsjagoa na jni, ẍohi co ttjoi de joxon jihnchin.

²⁰Are mé nchanho isinchengasanha co ndatsonttie, co conittjao ndarrocjan va inchin jni. Cain yá tsonhe saho; cottimeja tsí nchanho are Jesús rrocjan tsí ngataha nontte, co tsjago ngain cain chojni joachaxin que jehe chonda.

²¹Co cainxin chojni que nichja jian de ixin Jesús, tti chonda cain joachaxin, ngain cain chojni mé jehe sanjo iná vida naroa.

²²Cai Pedro ndac̈ho: ―Ttinhi ra ẍo jaha ra chojni Israel, tti rrondac̈hjan: Janha nichja de ixin Jesús tti joixin rajna Nazaret. Dios cjoagoha ra ixin jehe coinchiehe Jesús are chjé jehe jie joachaxin para joinchehe tsje cosa jian co para joinchehe tsje milagro, co para joinchehe tsje señal inchin jaha ra onoha ra.

²³Co anto icha saho Dios ochonxin ixin jaha ra sinchehe ra nchaoha ngain Xenhe. Co ndoa, jaha ra tse ra Jesús co joinchechienhe ra ngá rá chojni jianha. Co jehe na joinchecrucificá na Jesús ixin jaha ra joinao ra.

²⁴Pero Dios joinchexechon Jesús. Dios vantsje jehe de ngain tti nindadiguenhe ixin Jesús c̈hoha sittohe ngayé nindadiguenhe.

²⁵Jañá conhe ixin Jesús joinchenichja rey David co ndac̈ho: Janha cainxin nchanho chonxin ixin Dios jí nganji janha. Jí ngain lado jian na para que ẍonhi cosa sincheẍaon na.

²⁶Mexinxin ansenna anto c̈hjoin tonohe, co neje na nichjaxin palabra jian ixin anto chahna. Mexinxin masqui cuerpona ndasenhe, pero janha ẍonhi rroẍagoan

²⁷ixin soixin tsinttoeha almana ngain lugué chojni ndadenhe, ni sanjoha joachaxin para rroxantte cuerpona janha tti nttaha ẍá soixin ixin soixin anto rinao na.

²⁸Cjoagohna na nttiha que danjo iná vida naroa. Co anto rrochahna are janha sicon soixin.

²⁹Co Pedro joinchehe sigue nichjé chojni co ndac̈ho: ―Janha ndattjo ra ndoa ixin David ndogoelitoa na ndavenhe co ẍavá. Co lugar tti jehe ẍavá, mé ẍa jí jai.

³⁰Pero David cjoi ná profeté Dios co nichja lo que Dios cjoagoe, co venohe ixin Dios ndac̈ho ngain jehe ixin ná de xannttí ẍanc̈hjen rrojiguehe xan rey inchin David co jehe rey mé Cristo.

³¹Mexinxin osé tiempo vatto David chonxin quehe siconhe ngain Cristo. Co jehe nichja ixin queẍén rroxechon Cristo. Co ndac̈ho ixin almé rroguittoeha nttiha tti dittohe cain nindadiguenhe ni cuerpoe rroxantteha.

³²Co ján Dios joinchexechon jehe Jesús, co cain janha na vicon na que Jesús ndoa xechon.

³³Co jehe sacoajín para ngajni co jí ngain lado jian de Dios. Co jehe Ndo chjé Ndo Jesús joachaxin para rroanha Espíritu Santo inchin jehe Ndo ndac̈ho Ndo. Co Jesús rroanha Espíritu Santo nttihi, co Espíritu Santo mé tti nchehe cosa jihi que jaha ra dicon ra co ttinhi ra.

³⁴Ixin jeha David tti sacjoi para ngajni. Ixin David ndac̈ho: Tti Ttetonha ndac̈ho ngain tti Ttetonna: “Darihi ngaca lado jian na,

³⁵hasta que janha sinttagacha jaha de ngain cainxin tti ningaconha.”

³⁶’Mexinxin cainxin chojni ngain nación Israel chonda que tsonohe na seguro ixin Jesús, tti jaha ra coenganito ra cruz, Dios ndac̈ho ixin jehe Jesús chonda cain joachaxin para ixin ján na, co jehe mé Cristo.

³⁷Co are jehe na coinhi na cain tti ndac̈ho Pedro, anto coá na joachjaon co joanchianguihi na Pedro co icha representanté Jesús co ndac̈ho na: ―¿Quehe nchao sinttaha na?

³⁸Cottimeja Pedro ndac̈ho ngain na: ―Ttentoxinhi ra vidá ra ngattoxon con Dios, co diguitte ra cada ra de ngain nombré Jesucristo para que sitjañaha ra cain tti jianha que joinchehe ra. Co jamé Dios rrorroanha Espíritu Santo nganji ra,