LOS HECHOS 2:10-44

¹⁰la ko Frigia, la ko Panfilia, la ko Egipto la ko nkuíxín Africa a̱ntsí nó ntaha Cirene. La ko kja̱xin chojni romano tjejó ntihi. Iso tí sín a mé chaxín tsíkokjíexín judío, la í so la tinkáchónki sín Dios éxí tí sín judío xi̱kaha.

¹¹La kja̱xin siín chojni tsíkji̱xi̱n Creta, la ko Arabia. Mé xi̱kaha kaín ni tsíkji̱xi̱nni tí chjasin a mé tsíkinhinni tjejónixja tí sín a tí kjuaxroan kuènte Dios jnkojnko nkíve̱eni ―mé xi̱kaha ichro sín.

¹²Ntá tóxakonhen kaín sín la chrakon sín ntá kjuanchankíhi kíchó sín kíxin: ―¿Nkehe tꞌaxrjexín kaín tíha? ―ichro sín.

¹³A̱ ntá iso sín kjuanoá sín ntáchro sín kíxin: ―Tsékoan tí sín a ―ichro sín.

¹⁴Ntá jehe chꞌín Pedro mé kꞌuínkatjen chꞌán, kjuákꞌexín to̱té chꞌán la ko tí tejnko sín apóstol mé kꞌuínkatjen sín la ntá chꞌín Pedro mé itsen nixja chꞌán. Ntáchro chꞌán kíxin: ―Jahará chojni judío la ko jahará tjejorá chjasin Jerusalén. Kaínrá tjejorá tinhínrá tí nkehe tso̱xrja̱nka.

¹⁵Tí sín tjejó ntihi la jehya tsékoan sín éxí ntáchrorá, kíxin na ntá las nueve nchítjen la kohya nkexro tsékoan.

¹⁶Tíhi mé tsíchrónka chꞌín profeta Joel:

¹⁷Ntáchro Dios kíxin: Itsi ijnko ya̱on tsjixixín ntá tsochrꞌan Ncha̱kuenná ntá tsꞌáyéhe̱ chojni. Ntá tí xja̱anrá ntoa la ko tí xja̱anrá chjin mé tsonixja tan kuènta̱na. La ko tí sín ntasoá mé titàya̱ tsꞌíkuèn sín tí nkehe tsjáko̱ha̱ sín. La ko tí sín ó táda la kotáchrién sín tsꞌikonxín sín kíxin nkexrí tjinkaon Dios.

¹⁸Tí ya̱on tso̱nhen kaín tíha la tsochrꞌan tí Ncha̱kuenná tsꞌáyéhe̱ kaín tí sínntoa chꞌena xra̱ la ko tí síchjin kja̱xin la tsochrónka sín tanná.

¹⁹Ntá janhan mé tsjáko̱xia̱n ijnko kjuachrakon nka̱jní. A̱ ntá chjasintajni tsjáko̱xia̱n kjuaxroan: mé tsꞌixin ijni̱ la ko xrohi la ko itjui̱ tsíkꞌóna ihnchi.

²⁰Mé tí ya̱on la tsꞌinkaséyanxínhya, tsꞌóna tsꞌixin tie. A̱ ntá tí nitjó mé tsꞌóna ijni̱. Xi̱kaha senó tso̱nhen ntá itsi Ìnchéni. Tíhi mé ijnko ya̱on imá jié la imá náxrjón.

²¹A̱ ntá kaín tí nkexro tsjanchehe ihni̱é Ìnchéni kíxin tsjinki̱tsa sín mé tsaá sín. Mé xi̱kaha tsíchrónka chꞌín Joel.

²²ꞌJahará chojni israelita tinhínrá tí nkehe tso̱xrja̱nka. Tí chꞌín Jesús tsíkji̱xi̱n chjasin Nazaret mé Dios kjua̱ko̱xi̱n chꞌán kíxin tsíchrꞌán chꞌán kíxin kjuasin chꞌán itsjé kjuaxroan jié kꞌuíkonrá la ko kjuako chꞌán kíxin Dios tsíchjéhe chꞌán kjuachaxin kíxin tjinkaon chꞌán chrókꞌuikonrá. Jahará ó jína nohará kaín tíha.

²³Kjónté xi̱kaha kꞌuíkonrá la jahará itse̱rá chꞌán éxí tsíkjenka̱yáxin Dios ósé. A̱ ntá jahará kjui̱nchekꞌayéhérá chꞌán tí sín jínahya, a̱ ntá tí sín jínahya mé kꞌóyán sín chꞌán, kjua̱kꞌe̱nka̱ni sín chꞌán ijnko ntacruz.

²⁴Kjánchó Dios la kjuínchexechón chꞌán ínaá la kjua̱tse̱n chꞌán tí kjuatjoté kuènte kjuachꞌén kíxin ntá ti kjuachꞌén xitjahya tsꞌe̱tue̱nhen tí jehe chꞌán.

²⁵A̱ ntá ósé tí chꞌín rey David tsíchrónka chꞌán kuènte Jesús ntáchro chꞌán kíxin: Jaha Ìnchéni tꞌíkua̱n kíxin jnkochríxín tjétaón nti̱a tí xritjakꞌé janhan. Jaha mé itjen tjaná chjina kíxin chrókohya jie̱ chrókjuásian.

²⁶Méxra̱ imá chéhe̱ a̱senná. Irꞌva̱ tsje̱xia̱n tí nkehe náxrjón. Ó nòna kíxin kohya nkehe tsꞌatsínka kjónté itsꞌén.

²⁷Ó nòna kíxin tí jaha tsi̱to̱éhya a̱senná chríkjan tí siín chojni tsíkꞌen. Tsjánjonhya kjuachaxin kíxin tso̱xíka nto̱na kíxin janhan mé ijnko nkexro tꞌa̱ha xra̱ jína tjuèhe.

²⁸Jaha mé kjuáko̱na tí nti̱a tsjanjon kjuachón. Jaha mé nchechàna kíxin tꞌayakonna. Mé xi̱kaha tsíkjin chꞌín David.

²⁹ꞌKíchóni ti̱to̱hérá tsontáxrja̱n kíxin chꞌín David, tí nkexro kꞌuaxrjeníxinni mé tsíkꞌén chꞌán la ko tsíkji̱xravá chꞌán. Ntá na̱xa̱ noheni nketí tsíxravá chꞌán.

³⁰A̱ ntá chꞌín David mé ijnko nkexro tsíchrónka itén Dios la ó nohe chꞌán kíxin chaxín Dios chrónka kíxin ijnko nkexro tsꞌaxrjeníxin chꞌán mé tsꞌóna rey mé tsꞌe̱to̱an éxí jehe chꞌán kꞌue̱to̱an chꞌán.

³¹Mé xi̱kaha chꞌín David la ósé ó nohe chꞌán nkehe tso̱nhen la mé chrónka chꞌán kíxin tsoxechón Cristo la ko ntáchro chꞌán kíxin tí a̱sén chꞌán tsito̱ehya tí siín tí sín tsíkꞌen la tsꞌitjáyanhya tí cuerpo kuènte chꞌán.

³²Méxra̱ Dios kjuínchexechón tí chꞌín Jesús, mé kꞌuíkonni kaín ni la mé chrónkani kíxin chaxín tíha.

³³Ntá ijie Jesús mé sákjui̱ko chꞌán Dios la nànko itja chjina Dios mé tjen chꞌán. Ntá tsíntáchro Itꞌé chꞌán Dios kíxin tsochrꞌán chꞌán tí Ncha̱kuen chꞌán. Ntá jie ó kui la ó kꞌuíkonrá la ko kuínhínrá nkehe kónhen.

³⁴Tí chꞌín David la jehya jehe chꞌán sákjui̱ nkaya nka̱jní, kíxin jehe David ntáchro chꞌán kíxin: Ìnchéni Dios mé ntáche tí Ìnchéni kíxin: “Tjakꞌe tjaná chjina ntihó tséto̱an,

³⁵tsjixinjian kaín xín tí sín nínkakonhan la tsjachahya sín tsꞌe̱to̱an sín kíxin jahvá mé tséto̱an.” Mé xi̱kaha tsíkjin chꞌín David.

³⁶ꞌNtá kaín rá chojni israelita chrókónohará chaxín kíxin jehe tí chꞌín Jesús ó kjuakénka̱nirá tí ntacruz la Dios mé kjuíchꞌéna Ìnchárá ijie, mé tí Cristo ―mé xi̱kaha chrónka chꞌín Pedro.

³⁷Ntá ti kuínhin sín tíha ntá imá kóxakonhen a̱sén sín. La ntá kjuanchankíhi sín chꞌín Pedro la ko tí í so sín kjueyá chꞌín Jesús. Ntáchro sín kíxin: ―Kíchóni, a̱ ntá jie la ¿nkexrí chrókjuichꞌeni?

³⁸Ntá kjuáte̱he chꞌín Pedro ntáchro chꞌán kíxin: ―Chrókui̱to̱hérá tí iji̱árá la chróxráxinkáonrá Dios. Ntá chrókuikitiaxínrá ihni̱é Jesucristo ntá Dios mé tsjakjìinhanrá tí iji̱árá ntá jehe chꞌán tsjanjon chꞌán Ncha̱kuen chꞌán tsꞌayéhérá.

³⁹Dios mé sincheki̱to̱nhanrá chꞌán tí Ncha̱kuen chꞌán tsꞌayéhérá jahará la ko xja̱anrá la ko kja̱xin tsochjéhe chꞌán Ncha̱kuen chꞌán kaín xín tí sín tjejó ikjín. Mé jehe chꞌán tsochjéhe chꞌán Ncha̱kuen chꞌán jnkojnko tí nkexro tsjeyá chꞌán.

⁴⁰Mé xi̱kaha ntáchro chꞌín Pedro la ko í so nkehe ntáchro chꞌán. Nta nixje̱he̱ chꞌán sín ínaá, ntáchro chꞌán kíxin: ―Chrókui̱to̱hérá tí jínahya tjenka̱yáxin tí chojni siín chjasintajni kíxin jahará me jína chrókuaárá.

⁴¹Ntá kaín tí sín kuítekaon tí nkehe chrónka chꞌán la ntá kuíkite sín la tí ya̱on a kóchjina iní mil chojni kjuankíxin tinkáchónki Ìnchéni Jesús la kꞌuíto tí sín ó xráxín siín.

⁴²Ntá kaín sín mé jína kꞌuékꞌejó sín mé kuítekaon sín tí nkehe kjuako tí sín kjueyá Jesús la kjuínki̱tsa sín kjuanjon sín tí nkehe chrókjóne tí í so sín la ko chjéhe sín Dios kjuasáya la ko kójnkotsé sín kíxin sine sín nio̱tja̱ xraxinkakonxín sín kíxin ikꞌuén Ìnchéni.

⁴³La ntá kaín tí í so sín mé chrakon sín kíxin tí sín tsíkjeyá Jesús kjuasin sín itsjé kjuaxroan.

⁴⁴La kaín tí sín tinkáchónki Jesús mé jnkoko̱á kꞌuéjó sín la jnkoko̱á chónta sín tí nkehe sine sín.