LOS HECHOS 1:16-26

¹⁶―Cuꞌma̱ tyaꞌa ndiꞌi̱ na re ―nacui̱ Pedro jiꞌi̱ nguꞌ biꞌ―, nu ngua saꞌni nguxtyucua Xtyiꞌi ycuiꞌ Ndyosi jiꞌi̱ jyoꞌo cusuꞌ David loꞌo nguscua jyoꞌo biꞌ lo quityi ñiꞌya̱ caca cña nu cuaꞌni jyoꞌo Judas nde loo la. Ycuiꞌ Judas nguluꞌu tyucui̱i̱ jiꞌi̱ nguꞌ xñaꞌa̱ loꞌo ngusñi nguꞌ jiꞌi̱ Jesús preso; pana ñiꞌya̱ nu ndyanu chaꞌ caca jiꞌi̱ yu, juaꞌa̱ ngua chaꞌ biꞌ.

¹⁷Stuꞌba ti ngutaꞌa̱ jyoꞌo Judas loꞌo na, stuꞌba ti nguaꞌni yu cña loꞌo na nquichaꞌ.

¹⁸Loꞌo liꞌ ndyaa jyoꞌo biꞌ ngüiꞌya sca yuu loꞌo cayaꞌ nu nda nguꞌ jiꞌi̱ yu chaꞌ nguaꞌni yu chaꞌ cuxi, nu loꞌo ndyujuiꞌ yu cresiya jiꞌi̱ Jesús jiꞌi̱ nguꞌ xñaꞌa̱ biꞌ. Ycuiꞌ ca yu nguxtyú yu jiꞌi̱ yu lo yuu, ngutaaꞌ neꞌ yu nduꞌu tri seꞌi̱ yu, ngujuii yu liꞌ.

¹⁹Hora ti ngua cuayáꞌ tiꞌ lcaa nguꞌ quichi̱ Jerusalén, biꞌ chaꞌ nchcuiꞌ nguꞌ chaꞌcña jiꞌi̱ nguꞌ chaꞌ Acéldama naa yuu su nclyú yu; ndiꞌya̱ ndyuꞌu chaꞌcña biꞌ: “Yuu su ndyalú tañi ñati̱”.

²⁰Loꞌo juaꞌa̱ ngutuꞌu tucua chaꞌ nu nguscua jyoꞌo cusuꞌ lo quityi Salmos nu nchcuiꞌ ndiꞌya̱: Laja ti tyanu tyi yu, ngaꞌaa tyanu ñati̱ luꞌú cajua. Loꞌo xaꞌ nchcuiꞌ quityi biꞌ chaca quiyaꞌ: Cuaꞌni xaꞌ ñati̱ cña su ndu̱ yu. ’Juaꞌa̱ nchcuiꞌ quityi biꞌ ―nacui̱ Pedro jiꞌi̱ nguꞌ―,

²¹biꞌ chaꞌ juani tsoꞌo si cuaꞌni xaꞌ ñati̱ tyaꞌa na cña loo jyoꞌo Judas. Ñati̱ biꞌ caca sca nguꞌ tyaꞌa na nu ndyaꞌa̱ loꞌo na lcaa tsa̱ loꞌo ngutiꞌi̱ Jesús loꞌo na chalyuu re. Ndyaꞌa̱ yu loꞌo na, masi clyo loꞌo ntyucuatya jyoꞌo Juan jiꞌi̱ ñati̱, masi tsubiꞌ ti loꞌo nduꞌu Jesús ndyaa nde cua̱. Ñati̱ biꞌ cua naꞌa̱ ñiꞌya̱ ngua loꞌo ndyuꞌú Jesús chaca quiyaꞌ loꞌo cua ngujuii, biꞌ chaꞌ taca chcuiꞌ yu loꞌo xaꞌ ñati̱ chaꞌ caca cuayáꞌ tiꞌ nguꞌ ñiꞌya̱ nu ngua chaꞌ biꞌ.

²³Liꞌ ngusubi nguꞌ tucua tyaꞌa nu quiꞌyu; sca yu nu naa José Barsabás nu nchcuiꞌ nguꞌ chaꞌ Justo naa yu, loꞌo chaca yu nu naa Matías.

²⁴Liꞌ nchcuiꞌ lcaa nguꞌ biꞌ loꞌo ycuiꞌ Ndyosi: ―Ndyosi nu Xuꞌna ya ―nacui̱ nguꞌ―, jlo tiꞌ nuꞌu̱ ñiꞌya̱ nu ntsuꞌu tyiquee lcaa ñati̱ chalyuu. Culuꞌu nuꞌu̱ jiꞌi̱ ya ti jiꞌi̱ nu tucua tyaꞌa nu quiꞌyu re nu cua ngusubi ycuiꞌ nuꞌu̱ jiꞌi̱,

²⁵chaꞌ taca tsaa yu biꞌ xaꞌ quichi̱, chaꞌ chcuiꞌ yu chaꞌ jinuꞌu̱ cña su ndu̱ jyoꞌo Judas nquichaꞌ. Na cua nguxtyanu jyoꞌo biꞌ cña chaꞌ xñaꞌa̱ tsa biꞌ, loꞌo liꞌ ndyaa ca su ndyanu chaꞌ tsaa.

²⁶Liꞌ nguaꞌni nguꞌ sca cña chaꞌ ngusubi nguꞌ jiꞌi̱ tsaca nguꞌ, ti jiꞌi̱ tyanu cña biꞌ. Juaꞌa̱ nquijeloo jiꞌi̱ nguꞌ chaꞌ Matías caca ñati̱ biꞌ. Liꞌ stuꞌba ti ndyaꞌa̱ yu biꞌ loꞌo nu tii chaca tyaꞌa nguꞌ chaꞌ caca tyaꞌa nguꞌ nu nda Ni cña jiꞌi̱ chaꞌ chcuiꞌ chaꞌ jiꞌi̱ Jesucristo nde lo yuu chalyuu.