LOS HECHOS 13:17-34

¹⁷Ti kwiꞌ Ndiose nu ngiꞌniin tnuan ꞌin, ti kwiꞌ Ni lka nu ngulo suwi ꞌin ayman kula ꞌñaan chaꞌ ka neꞌ kaꞌan la nten nde loo la. Ti mdiꞌin ayman ꞌñaan lo yuu Egipto loꞌo kaꞌan ꞌa nten ngwa neꞌ, ni siya ja lka kichen kanꞌ kichen tyi neꞌ. Bra kanꞌ tlyu ꞌa tñan yꞌni Ndiose, chaꞌ ngulaa ꞌin ayman kula ꞌñaan lo yuu Egipto kanꞌ. Ngwañaꞌan ngwa biyaꞌ tiꞌ xka ta nten chalyuu chaꞌ tnun ꞌa chaꞌ ngiꞌni Ndiose lo chalyuu.

¹⁸Xa nu mdaꞌan yuꞌwi neꞌ kanꞌ lo yuu wtyi xa tuꞌwa yijan, mdalo ꞌa Ndiose ꞌin ayman kula ꞌñaan bra kanꞌ, ni siya kaꞌan ꞌa chaꞌ kuxi yꞌni neꞌ kanꞌ.

¹⁹Yꞌni tyii Ndiose chaꞌ ꞌin kati nasiyun nten nu mdiꞌin nde lo yuu ꞌin Canaán, ti kwiꞌ nten nu mdiꞌin lo yuu kanꞌ ti kulo la; mda Ndiose yuu kanꞌ chaꞌ kaja seꞌen tyiꞌin ayman kula ꞌñaan bra kanꞌ.

²⁰Loꞌo ngulo suwi Ndiose nten nu mduun loo la ꞌin ayman kula ꞌñaan chabiyaꞌ ꞌin Ni. Bra kanꞌ wa mdiya jakwa siyentu jluꞌwe yijan, ti bra nu ngala neꞌ lo yuu Canaán kanꞌ, sa ñaꞌan bra nu mdiꞌin ayman Samuel nu ykwiꞌ loꞌo nten chabiyaꞌ ꞌin Ndiose.

²¹Chunꞌ ndiꞌin la mjñan neꞌ ꞌin Ndiose chaꞌ ta Ni ska ree chaꞌ tyuun loo la ꞌin neꞌ, kanꞌ chaꞌ ngulo suwi Ndiose ayman Saúl sñiꞌ Cis chaꞌ ka ndloo ꞌin neꞌ; ngwa yu kanꞌ ndloo tuꞌwa yijan bra kanꞌ. Ayman Saúl kanꞌ ngwa taꞌa nten ꞌin neꞌ Benjamín.

²²Bra wa mdaꞌa tuꞌwa yijan, bra kanꞌ ngulaa yaꞌ Ndiose ꞌin yu kanꞌ, ngulo suwi Ni ꞌin xka yu nu ka ndloo la ꞌin neꞌ tñan loo Saúl. Kanꞌ nu naan David. Wa ykwiꞌ Ndiose chaꞌ ꞌin ayman David kanꞌ: “Suꞌwe ꞌa nka tiyeěn naꞌaǎn ꞌin David sñiꞌ Isaí” ndukwin Ndiose. “Jlyo tiǎnꞌ chaꞌ lka yu kanꞌ ska nten nu xlyaa kuꞌni nchga tñan nu nchka tiǎnꞌ chaꞌ kuꞌni yu.”

²³Nu ngwa sꞌni ytsaꞌ Ndiose ꞌñaan chaꞌ nde loo la kan ska nten taꞌa ayman David kanꞌ, nu kulaa ꞌin taꞌaan nu lkaan neꞌ Israel ꞌin chaꞌ kuxi; ti kwiꞌ Jesús lka yu kanꞌ.

²⁴Bra nu ja ya tyisnan Jesús kwaꞌu chaꞌ ꞌin Ndiose Sti yu ꞌin neꞌ taꞌa kichen tyian, ti bra kanꞌ ykwiꞌ ꞌa ayman Xuwa loꞌo nchga neꞌ taꞌaan, chaꞌ kulo chunꞌ neꞌ taꞌaan kiꞌya nu ndiꞌin ꞌin neꞌ loꞌo Ndiose. Mdukwatya ayman Xuwa kanꞌ ꞌin neꞌ nu msñi chaꞌ kanꞌ bra kanꞌ.

²⁵Bra wa tyii ti tñan nu yꞌni ayman Xuwa kanꞌ, bra kanꞌ ykwiꞌ yu chaꞌ re loꞌo neꞌ taꞌa kichen tyian: “Xka nten lka nu ndiꞌin ta wan ꞌin” ndukwin Xuwa ꞌin neꞌ; “siꞌi naꞌ lkaǎn” ndukwin yu. “Nde loo la kan ska nten nu tlyu la chabiyaꞌ nsuꞌwi ꞌin. Loꞌoǔn, kuꞌniǐn tnuǔn ꞌin nten kanꞌ; suꞌwe ꞌa ka tiyeěn ni siya xtiǐnꞌ tiǎn ti kanan nu nsuꞌwi kiyaꞌ nten kanꞌ”. Ngwañaꞌan ykwiꞌ ayman Xuwa chaꞌ ꞌin Jesús.

²⁶’Taꞌaan nu lkaan ti kwiꞌ taꞌa nten ꞌin ayman Abraham, loꞌo taꞌa wan nu ndukwa wan chaꞌ ꞌin Ndiose, chaꞌ ꞌin taꞌaan lka chaꞌ suꞌwe nu ykwiꞌ Ndiose loꞌoan, chaꞌ suꞌwe nu nchkwiꞌ sa ñaꞌan nka tiye Ndiose kulaa Ni ꞌin nten chalyuu ꞌin chaꞌ kuxi.

²⁷Loꞌo ja ngwa biyaꞌ tiꞌ neꞌ nu nka ndloo la kichen Jerusalén ti ka nu lka Jesús, loꞌo neꞌ kichen kanꞌ ja ngwa biyaꞌ tiꞌ neꞌ ti ka nu lka yu. Ja ngwiꞌya neꞌ kwenta ni sa ñaꞌan ndyoꞌo chaꞌ nu ngwaꞌan ayman kula nu ykwiꞌ loꞌo nten chabiyaꞌ ꞌin Ndiose nu ngwa sꞌni; ni siya ynan neꞌ bra nu ykwiꞌ neꞌ lo kityi kanꞌ niꞌ lyaa nchga tsan nu nxitñaꞌ neꞌ judío, ja ngwiꞌya neꞌ kwenta chaꞌ nchkwiꞌ kityi kanꞌ chaꞌ ꞌin Jesús. Kanꞌ chaꞌ kuxi ꞌa yꞌni neꞌ loꞌo Jesús xa nu mstya neꞌ kiꞌya ꞌin yu. Ti kwiꞌ chaꞌ kuxi nu ykwiꞌ ayman nu ngwaꞌan kityi kanꞌ, chaꞌ kuꞌni nten loꞌo yu, kwiꞌ ngwañaꞌan yꞌni neꞌ kanꞌ bra kanꞌ.

²⁸Ni siya ja mdiꞌin ꞌa kiꞌya ꞌin Jesús, mjñan neꞌ ꞌin gobernador Pilato kanꞌ, chaꞌ kulo yu tñan chaꞌ kaja Jesús.

²⁹Bra wa mdyii yꞌni neꞌ nchga chaꞌ kuxi nu ykwiꞌ kityi kanꞌ, nchga chaꞌ kuxi nu mdiꞌin chaꞌ ka ꞌin Jesús, bra kanꞌ mbiꞌya neꞌ ꞌin ayman kanꞌ seꞌen ndukwi lo wsi, mtsiꞌ neꞌ ꞌin ayman kanꞌ bra kanꞌ.

³⁰Loꞌo yꞌni Ndiose chaꞌ ndyuꞌu yu xiyaꞌ bra kanꞌ.

³¹Tyun tsan mdoꞌo tukwa ti kwiꞌ Jesús seꞌen mdiꞌin neꞌ taꞌa mdaꞌan yu. Ti kwiꞌ neꞌ kanꞌ lka nu mdaꞌan loꞌo yu ti la mdoꞌo neꞌ nde Galilea mdiyan neꞌ kichen Jerusalén; kanꞌ lka nu nchkwiꞌ chaꞌ nu ñi ꞌin Jesús loꞌo nten ni.

³²’Loꞌo ni, wa mdiyan ba nde re chaꞌ kwaꞌu ba chaꞌ suꞌwe ꞌin Ndiose kanꞌ ꞌwan. Ti sꞌni wa mskanꞌ Ndiose chaꞌ loꞌo ayman kula ꞌñaan, chaꞌ suꞌwa Ni ska nu kan chaꞌ kulaa ꞌñaan,

³³loꞌo sa bra ni ndyaa toꞌo chaꞌ kanꞌ nu mskanꞌ Ndiose loꞌo ayman ꞌñaan, xa wa ndyuꞌu Jesús xiyaꞌ. Nde lka chaꞌ nu nchkwiꞌ kityi Salmos seꞌen nka tukwa chaꞌ ꞌin Jesús: “Sñiěnꞌ lkaa” ndukwin Ndiose ꞌin Jesús. “Chabiyaꞌ ꞌñaǎn ngulaa lo chalyuu re.”

³⁴Ndiya xka seꞌen nu nchkwiꞌ kityi kula, chaꞌ tyuꞌu Jesús xiyaꞌ xa wa yjwi neꞌ ꞌin yu; kwiꞌ ngwañaꞌan nchkwiꞌ kityi kanꞌ, chaꞌ ja ka ñuꞌun kunaꞌ Jesús niꞌ kwaa: “Taǎn nchga chaꞌ suꞌwe ꞌiin, ñaꞌaan chaꞌ suꞌwe nu ykwiǐnꞌ loꞌo David chaꞌ kaja ꞌiin” ndukwin Ndiose.